လီဗာပူးအသင်းအနေနဲ့ ရီးရဲလ်မက်ဒရစ်နဲ့ ဒုတိယအကျော့ပွဲစဉ်မှာ ပြတ်သားတဲ့ရလဒ်နဲ့ ပြန်လာ နိုင်ဖို့ မဖြစ်နိုင်တော့ကြောင်း နောက်ခံလူဗန်ဒိုက်က ပြောပါတယ်။
လီဗာပူးအသင်းဟာ မနေ့ကယှဉ်ပြိုင်ကစားခဲ့တဲ့ ချန်ပီယံလိဂ်ရှုံးထွက် ပထမအကျော့ အိမ်ကွင်းမှာ ရီးရဲလ်မက်ဒရစ်ကို ၅ ဂိုး ၂ ဂိုးနဲ့ရှုံးနိမ့်ခဲ့တာကြောင့် ဒုတိယအကျော့မှာကစားရမယ့် ရီးရဲလ်အိမ် ကွင်းမှာ ပြန်လာနိုင်ဖို့ မဖြစ်နိုင်တော့ကြောင်း ဗန်ဒိုက်ကသုံးသပ်ခဲ့တာပါ။
၃ ဂိုးပြတ် ပြန်လည်ရရှိဖို့ မဖြစ်နိုင်သလောက်ဆိုပေမဲ့ အသင်းရဲ့ ဂုဏ်သိက္ခာအတွက် ပေးဆပ်ကစားဖို့တော့ ပြင်ဆင်ထားရမှာဖြစ်ကြောင်း၊ အရေးကြီးဆုံးအချက်က မက်ဒရစ်နဲ့ပွဲကို သင်ခန်းစာယူပြီး ပရီးမီးယားလိဂ်ပွဲစဉ်တွေမှာ ထပ်မဖြစ်ဖို့ အရေးဖြစ်ကြောင်း ဗန်ဒိုက်က ပြောပါတယ်။
လီဗာပူးအသင်းဟာ ရီးရဲလ်မက်ဒရစ်အသင်းနဲ့ လာမယ့် မတ်လ ၁၅ ရက်မှာ ယှဉ်ပြိုင်သွားရမှာ ဖြစ်ပါတယ်။
ကစားတဲ့နေရာထက် ပွဲကစားတတ်ဖို့က ပိုပြီးအရေးကြီးကြောင်း လီဗာပူးနောက်ခံလူ အာနိုးလ်က ပြောပါတယ်။
အာနိုးလ်ဟာ လီဗာပူးအသင်းမှာ ခံစစ်ကစားပုံ အားနည်းချက်တွေ ရှိတာကြောင့် ဝေဖန်ခံနေရတာဖြစ်ပြီး GQ မဂ္ဂဇင်းနဲ့ အင်တာဗျူးမှာတော့ နေရာအလိုက် ဘယ်တုန်းကမှ မကစားခဲ့ဘဲ ပွဲကိုသာ ကစားခဲ့တာဖြစ်ကြောင်း အာနိုးလ်က ပြောပါတယ်။
“ခင်ဗျားတို့အနေနဲ့ နေရာအလိုက် ကစားနေရင် ဒါက ကိုယ့်ကိုယ်ကိုယ် ကန့်သတ်လိုက်တာပါ။ ပွဲကိုသေချာကစား၊ နေရာမှန်ပါစေဆိုတဲ့ စိတ်ပဲရှိတယ်။ တချိန်တည်းမှာပဲ မဖြစ်မနေ လုပ်ဆောင်ရမှာက ခံစစ်ပိုင်းစွမ်းဆောင်ရည်တွေကို လိုအပ်သလို လုပ်ဆောင်နိုင်ဖို့လည်း လိုတယ်” လို့ အာနိုးလ်က ပြောပါတယ်။
အာနိုးလ်ဟာ ခံစစ်တာဝန်တွေမှာ ခြေစွမ်းပြသနိုင်ခြင်း မရှိသေးတာကြောင့် လာမယ့် ကာတာကမ္ဘာ့ဖလားမှာ ပါဝင်ခွင့်မရမယ့် အခြေအနေနဲ့ ရင်ဆိုင်နေရပါတယ်။
