ရခိုင်ပြည်လွတ်မြောက်ရေးပါတီ (ALP) ဗဟိုအလုပ်အမှုဆောင် ကော်မတီဝင်နဲ့ ရခိုင်ပြည်လွတ်မြောက်ရေးတပ်မတော် (ALA) စစ်ဦးစီးချုပ် ဗိုလ်ချုပ်ခိုင်စိုးမြ အပါအဝင် ဒုဗိုလ်မှူးကြီးတဦးနဲ့ ဗိုလ်ကြီးတဦးတို့ကို ရခိုင်အမျိုးသားအဖွဲ့ချုပ်/ရက္ခိုင့်တပ်တော် (ULA/AA) က လုပ်ကြံသတ်ဖြတ်ခဲ့တာလို့ ALP က ဇန်နဝါရီ ၅ ရက်မှာ ထုတ်ပြန်ပါတယ်။
ALP စစ်ဦးစီးချုပ် ဗိုလ်ချုပ်ခိုင်စိုးမြ၊ အမှတ် (၁၀၁) တပ်ရင်းမှူး ဒုဗိုလ်မှူးကြီး ခိုင်ကျော်စိုးနဲ့ ဗိုလ်ကြီး ခိုင်သူရိန္ဒတို့ဟာ ဇန်နဝါရီ ၄ ရက် မနက်ပိုင်းက စစ်တွေမြို့မှာ ကားနဲ့သွားနေစဉ် ရက္ခိုင့်တပ်တော် (AA) ဘက်က လုပ်ကြံသတ်ဖြတ်ခဲ့တာလို့ ထုတ်ပြန်ချက်မှာ ဖော်ပြထားပါတယ်။
အခုလိုအကြမ်းဖက်လုပ်ကြံတာဟာ ရခိုင်တမျိုးသားလုံး စည်းလုံးညီညွတ်ရေးကို ပျက်စီးစေတာသာမက ရခိုင်ပြည်သူတွေကိုပါ တုန်လှုပ်ချောက်ချားစေတာကြောင့် ပြင်းပြင်းထန်ထန် ကန့်ကွက်တယ်လို့ ALP ကဆိုပါတယ်။
စစ်ဦးစီးချုပ် ဗိုလ်ချုပ်ခိုင်စိုးမြနဲ့ အရာရှိ ၂ ဦး သတ်ဖြတ်ခံမှုနဲ့ ပတ်သက်ပြီး ရက္ခိုင့်တပ်တော် (AA) ဘက်က ထုတ်ပြန်ထားတာတော့ မတွေ့ရသေးပါဘူး။ ALP ရဲ့ထုတ်ပြန်ချက်ပါ စွပ်စွဲချက်တွေနဲ့ ပတ်သက်လို့ ရက္ခိုင့်တပ်တော် (AA) ထံက တုံ့ပြန်ချက်ရနိုင်ဖို့ ဆက်သွယ်နေဆဲ ဖြစ်ပါတယ်။
အသတ်ခံလိုက်ရတဲ့ စစ်ဦးစီးချုပ် ဗိုလ်ချုပ်ခိုင်စိုးမြဟာ နှစ်ပေါင်း ၄၀ လောက် ပါတီကပေးအပ်တဲ့ တာဝန်တွေကို ထမ်းဆောင်ခဲ့တဲ့ စစ်ဘက်ဆိုင်ရာ ခေါင်းဆောင်တဦး ဖြစ်ပြီး သေဆုံးသွားသူ ၃ ဦးမှာ ရခိုင်ပြည်အတွက် အစားထိုးမရတဲ့ ဆုံးရှုံးမှု ဖြစ်တယ်လို့ ALP က ဆိုပါတယ်။
ULA/AA ဘက်က ALP ပါတီရဲ့ ခေါင်းဆောင်တွေ၊ တပ်ဖွဲ့ဝင်တွေကို ဖမ်းဆီးတာတွေ၊ လုပ်ကြံသတ်ဖြတ်တာတွေ အပါအဝင် တခြားရခိုင်နိုင်ငံရေးပါတီတွေက ပါတီခေါင်းဆောင်တွေနဲ့ ပါတီဝင်တွေ၊ ရဟန်းသံဃာတွေပါမချန် အရပ်သားပြည်သူ လူထုကိုပါ ဥပဒေမဲ့ ဖမ်းဆီးနှိပ်စက်တာ၊ လုပ်ကြံသတ်ဖြတ်တာတွေကို ဆက်တိုက် ပြုလုပ်နေတာကြောင့် တရားမျှတမှုရအောင် လုပ်ဆောင်သွားမယ်လို့လည်း ALPက ထုတ်ပြန်တယ်။
ALP စစ်ဦးစီးချုပ် ဗိုလ်ချုပ်ခိုင်စိုးမြနဲ့ အရာရှိ ၂ ဦးဟာ စစ်ကောင်စီရဲ့ လွတ်လပ်ရေးနေ့ အခမ်းအနားက အပြန် စစ်တွေမြို့ စက်ရုံစုရပ်ကွက်ရှိ ALP ရုံးရှေ့မှာ သတ်ဖြတ်ခံလိုက်ရတာ ဖြစ်ပါတယ်။
ပြီးခဲ့တဲ့ သြဂုတ်၊ စက်တင်ဘာနဲ့ နိုဝင်ဘာလတို့မှာ ရခိုင်ပြည်လွတ်မြောက်ရေးပါတီ (ALP) ရဲ့ ဗဟိုကော်မတီဝင် နှစ်ဦး အပါအဝင် ရဟန်း ၄ ပါးကို အေအေက ဖမ်းဆီးတာတွေ ရှိခဲ့ပါတယ်။
ALP ဟာ လက်ရှိ စစ်ကောင်စီနဲ့ ငြိမ်းချမ်းရေးဆွေးနွေးမှုတွေ ပြုလုပ်နေတဲ့အဖွဲ့ဖြစ်ပြီး ALP ခေါင်းဆောင်တွေဟာလည်း စစ်ခေါင်းဆောင်နဲ့ မကြာမကြာ နေပြည်တော်မှာ သွားရောက်တွေ့ဆုံ နီးစပ်မှုရှိတာကြောင့် ရခိုင်ပြည်သူတွေရဲ့ ဝေဖန်တာတွေ ခံနေရတဲ့ အဖွဲ့အစည်းလည်း ဖြစ်ပါတယ်။
ဟေတီရဲတပ်ဖွဲ့ဟာ သမ္မတ ဂျိုဗစ်နလ်မိုအိဇ် လုပ်ကြံသတ်ဖြတ်မှုမှာ ပါဝင်တဲ့ သံသယရှိသူတွေထဲက ၄ ဦးကို ပစ်သတ်ခဲ့ပြီး ဟေတီလူမျိုးအမေရိကန်နိုင်ငံသား ၂ ဦး အပါအ၀င် နောက်ထပ် ၆ ယောက်ကိုဖမ်းဆီးခဲ့တယ်လို့ ဇူလိုင် ၈ ရက်မှာ ရဲတပ်ဖွဲ့က ပြောပါတယ်။
ဆက်လက်ပြီး ဟေတီအာဏာပိုင်တွေဟာ ဒီဆင်းရဲနွမ်းပါးတဲ့ ကာရစ်ဘီယံနိုင်ငံ ဟေတီကို အံ့အားသင့်စေတဲ့ လုပ်ကြံသတ်ဖြတ်မှုရဲ့နောက်ကွယ်က ကြိုးကိုင်သူတွေကို ရှာဖွေနေပါတယ်။
အသက် ၅၃ နှစ်အရွယ် သမ္မတမိုအိဇ် ဟာ သူ့ရဲ့နေအိမ်မှာ ဇူလိုင် ၇ ရက် အစောပိုင်းက သေနတ်နဲ့ပစ်သတ်ခံခဲ့ရတာဖြစ်ပြီး တာဝန်ရှိသူတွေရဲ့ပြောဆိုချက်အရ လေ့ကျင့်ထားကြတဲ့ နိုင်ငံခြားသား သတ်ဖြတ်သူတွေလို့ ထင်ရတဲ့ ကွန်မန်ဒိုအဖွဲ့တဖွဲ့ရဲ့လက်ချက်လို့ ဆိုပါတယ်။
ဒီလက်နက်ကိုင် ကွန်မန်ဒိုအဖွဲ့ထဲမှာ ကိုလံဘီယာ ၂၆ ဦးနဲ့ အမေရိကန်နိုင်ငံသား ၂ ဦးတို့ ပါဝင်ဖွဲ့စည်းထားတယ်လို့လည်း ဆိုပါတယ်။
အာဏာပိုင်တွေက လူသတ်သမားများကို ဖမ်းဆီးနိုင်ရေး ကူညီဖို့ ၁၅ ရက်ကြာ အရေးပေါ်အခြေအနေကြေညာခဲ့ပါတယ်။
ကြိုတင်သတင်းအချက်အလက်တွေအရ ဟေတီသမ္မတလုပ်ကြံခံရမှုမှာ ပါဝင်တဲ့ ကိုလံဘီယာနိုင်ငံသားတွေဟာ ကိုလံဘီယာစစ်တပ်ကနေ အငြိမ်းစားယူထားသူတွေ ဖြစ်တယ်လို့ ကိုလံဘီယာကာကွယ်ရေးဝန်ကြီး ဒီရေဂိုမိုလာနိုက ဇူလိုင် ၈ ရက်က ပြောပါတယ်။
စုံစမ်းစစ်ဆေးမှုမှာ ကိုလံဘီယာရဲ့ ဘိုဂိုတာအစိုးရလည်း ပူးပေါင်းပါဝင်လိမ့်မယ်လို့လည်း ပြောပါတယ်။
