မြန်မာပေါင်ချိန်ဖိနပ်စက်ရုံမှ အလုပ်ထုတ်ခံထားရတဲ့ လုပ်သားတွေကို လုပ်ငန်းခွင် ပြန်ဝင်ခွင့်ပြုလိုက်တယ်လို့ စက်ရုံအလုပ်သမားတွေက ပြောပါတယ်။

အဲဒီစက်ရုံက တာဝန်ရှိသူတွေနဲ့ အလုပ်သမားတွေ ပြီးခဲ့တဲ့ရက်ပိုင်းက ညှိနှိုင်းမူတွေ လုပ်ပြီးတဲ့နောက် လုပ်ငန်းခွင်ပြန်ဝင်ခွင့်ပြုဖို့ သဘောတူညီချက်ရရှိခဲ့တာလို့ ဆိုပါတယ်။

အလုပ်ထုတ်ခံထားရတဲ့ လုပ်သားတဦးက "အလုပ်ထုတ်ခံထားရတဲ့ ၂၆ ယောက်မှာ ၉ ယောက်က လျော်ကြေးယူလိုက်တယ်။ ကျန်အလုပ်သမားတွေက လုပ်ငန်းခွင်ပြန်ဝင်ဖို့ ဆုံးဖြတ်တယ်။ စက်ရုံက အသစ်ပြဋ္ဌာန်းထားတဲ့ လုပ်ငန်းခွင်စည်းကမ်းချက်တွေကို သဘောတူရင် ပြန်ဝင်နိုင်တယ်ဆိုပြီး ပြောတယ်" လို့ ပြောပါတယ်။

အဲဒီအလုပ်သမား ၁၇ ဦးဟာ ဇန်နဝါရီ ၂ ရက်နေ့ လုပ်ငန်းခွင်ပြန်ဝင်ကြမှာဖြစ်ပြီး စက်ရုံစည်းကမ်းချက်တွေကိုတော့ အဲဒီနေ့မှ သိရမယ်လို့ ဆိုပါတယ်။

မြန်မာပေါင်ချိန်စက်ရုံဟာ adidas အမှတ်တံဆိပ်ဖိနပ်တွေကို ချုပ်လုပ်နေတာဖြစ်ပြီး အဲဒီအလုပ်သမားတွေကို အလုပ်ထုတ်မူအပါအဝင် လုပ်ငန်းခွင်အတွင်း ဖိနှိပ်မူတွေနဲ့ပတ်သက်လို့ ဝေဖန်ခံနေရတဲ့ စက်ရုံဖြစ်ပါတယ်။

အောက်တိုဘာလကုန်ပိုင်းက စက်ရုံလုပ်သားတချို့က အနည်းဆုံးအခကြေးငွေ တိုးမြှင့်ပေးဖို့ ဆန္ဒပြတောင်းဆိုခဲ့ကြပြီး အဲဒီဆန္ဒပြပွဲမှာ ပါဝင်တဲ့ အလုပ်သမား ၂၆ ဦးကို ခွင့်မဲ့ပျက်ကွက်လို့ဆိုကာ အလုပ်ကထုတ်ပယ်ခဲ့တာဖြစ်ပါတယ်။

အဲဒီအလုပ်သမားတွေကို အလုပ်ပြန်ခန့်ဖို့ adidas ကုမ္ပဏီက ကြားဝင်ညှိနှိုင်းပေးခဲ့တာကြောင့် စက်ရုံဘက်က ပြန်လက်ခံတာလို့လည်း သိရပါတယ်။ 

အလုပ်ရှင်တွေအနေနဲ့ ကိုဗစ် - ၁၉ ရောဂါပိုးကူးစက်ခံရတဲ့ မိမိအလုပ်သမားတွေအပေါ်မှာ လုပ်အားခနဲ့ အခြားဝန်ဆောင်မှုတွေ လျှော့ချဖြတ်တောက်ပါက အလုပ်သမားကာကွယ်ရေး ဥပဒေနဲ့အညီ အရေးယူခံရမယ်လို့ ထိုင်းအလုပ်သမားဝန်ကြီးက ပြောပါတယ်။ 

ကိုဗစ် - ၁၉ ကူးစက်ရောဂါပြန့်ပွားနေတဲ့ကာလမှာ အချို့အလုပ်ရှင်တွေဟာ ပိုးကူးစက်ခံရတဲ့ အလုပ်သမားတွေကို လစာဖြတ်တောက်တာ၊ လုပ်အားခလျှော့ချတာ၊ အပိုဆုကြေး မပေးတာတွေရှိနေတယ်လို့ သိရကြောင်း၊ အလုပ်ရှင်တွေအနေနဲ့ မိမိလုပ်ငန်းခွင်မှာ ကိုဗစ် - ၁၉ ကင်းဝေးရေးနဲ့ ပတ်သက်လို့ ဆောင်ရန်ရှောင်ရန် စည်းကမ်းချက်တွေ သတ်မှတ်ခွင့်ရှိပေမယ့်လည်ေ ရောဂါပိုးကူးစက်ခံရသူအလုပ်သမားတွေပေါ် အထက်ပါဝန်ဆောင်မှုတွေ ဖြတ်တောက်ခွင့်မရှိဘဲ အလုပ်သမားကာကွယ်စောင့်ရှောက်ရေးဥပဒေ ပုဒ်မ ၇၆ နဲ့လည်း ငြိစွန်းတယ်လို့  ထိုင်းအလုပ်သမားဝန်ကြီး နိုင်းဆူချတ် ချူမ်းကလင်က ပြီးခဲ့တဲ့ ရက်ပို င်းက သတင်းထောက်တွေကို ပြောပါတယ်။ 

ဒါကြောင့် အလုပ်သမားကာကွယ်စောင့်ရှောက်ရေးဌာနကနေ သက်ဆိုင်ရာအလုပ်ရှင်တွေဆီ အသိပေးအကြောင်းကြားဖို့ ညွှန်ကြားထားတယ်လို့ ဆိုပါတယ်။

အဆိုပါအချက်အတိုင်း မလိုက်နာတဲ့ အလုပ်ရှင်တွေအနေနဲ့  အလုပ်သမား စောင့်ရှောက်ရေး ဥပဒေ ပုဒ်မ ၁၄၄/၁ အရ  ၆ လထက်မပိုတဲ့ ထောင်ဒဏ် ဒါမှမဟုတ် ဘတ် ၁၀၀၀၀၀ ထက်မပိုတဲ့ ငွေဒဏ် ဒါမှမဟုတ် ထောင်ဒဏ်ရောငွေဒဏ်ပါ နှစ်ရပ်လုံးကျခံရမယ်လို့ ဝန်ကြီးက ပြောပါတယ်။ 

ဝန်ဆောင်မှုလျှော့ချခံရတဲ့ အလုပ်သမားတွေအနေနဲ့လည်း အလုပ်သမားစစ်ဆေးရေး ဌာနကို တိုင်ကြားနိုင်ပြီး အလုပ်သမားရေးရာ အရေးပေါ် ဖုံးနံပါတ် ၁၅၀၆ ကိုလည်း ၂၄ နာရီ ဆက်သွယ်မေးမြန်းနိုင်တယ်လို့ ထိုင်းအလုပ်သမားဝန်ကြီးက ပြောသွားပါတယ်။