ပါကစ္စတန်တောင်ပိုင်း ကရာချိမြို့မှာ ဖေဖော်ဝါရီ ၁၇ ရက်က အစ္စလာမ္မစ် အစွန်းရောက်တွေက ရဲစခန်းကို ဝင်စီးခဲ့ပြီးနောက်မှာ လုံခြုံရေးတပ်ဖွဲ့ဝင်တွေကလည်း စခန်းအဆောက်အဦကို ပြန်သိမ်းယူခဲ့တာကြောင့် ပေါက်ကွဲသံတွေနဲ့ ပစ်ခတ်သံတွေ အကြားမှာ လူ ၂ ဦး သေဆုံးခဲ့ကြောင်း တာဝန်ရှိသူတွေက ပြောပါတယ်။

အထူးလုံခြုံရေးယူနစ်မှ ရဲအရာရှိတစ်ဦးနဲ့ ပါကစ္စတန် အရန်တပ်ဖွဲ့ဝင်တစ်ဦး အပြင် စစ်သွေးကြွ ၃ ဦး သေဆုံးခဲ့ကြောင်း အကြီးတန်းရဲအရာရှိ မာ့ခ်ဆွတ်မဲမန်က ပြောကြားပါတယ်။ 

ဒီစခန်းဟာ မြို့တော်ရဲ့ ထိပ်ပိုင်းရဲအရာရှိကြီးတွေရဲ့ ရုံးခန်းတွေရှိတဲ့နေရာ ဖြစ်ပါတယ်။ ဗုံးရှင်းလင်းရေးအဖွဲ့ဟာ အဆောက်အအုံအတွင်းကို ဝင်ရောက်လာပြီး လုံခြုံရေးရှင်းလင်းမှုတွေ  ဆောင်ရွက်နေကြောင်းလည်း မဲမန်က ပြောဆိုပါတယ်။

တိုက်ခိုက်မှုဖြစ်ပွားချိန်က စခန်းထဲမှာ ရဲတပ်ဖွဲ့ဝင်အယောက် ၃၀ အထိ ရှိနိုင်ကြောင်း ဒုတိယစစ်ဆေးရေးမှူးချုပ် အီဖှန် ဘာ့လွတ်ခ်က ရိုက်တာကို ပြောပါတယ်။

ပါကစ္စတန် တာလီဘန်အဖွဲ့ (TTP) က ဒီတိုက်ခိုက်မှုကို သူတို့တာဝန်ခံကြောင်း  (TTP) ရဲ့ ပြောရေးဆိုခွင့်ရှိသူက သတင်းထောက်တွေဆီ မက်ဆေ့ချ်ပေးပို့ခဲ့ပါတယ်။

အိမ်နီးချင်း အာဖဂန်နစ္စတန်မှာ အုပ်ချုပ်နေတဲ့ တာလီဘန်ကနေ ခွဲထွက်ထားတဲ့ အစ္စလာမ္မစ် TTP အဖွဲ့ဟာ အစ္စလာမ်မာဘတ်မှာ အစိုးရဆန့်ကျင်ရေး လှုပ်ရှားမှုရဲ့ တစ်စိတ်တစ်ပိုင်းအဖြစ် ပါကစ္စတန် အနောက်မြောက်ဘက်မှာ ရဲတပ်ဖွဲ့ကို တိုက်ခိုက်မှုတွေ လတ်တလောမှာ တိုးမြှင့်ခဲ့ပါတယ်။ 

ရန်ကုန်-ရေး-ထားဝယ်-မြိတ် ကားလမ်းပေါ်ရှိ ရေးမြစ်ကူးတံတားမှာ လုံခြုံရေးယူထားတဲ့ စစ်ကောင်စီတပ်ကို သြဂုတ် ၂၅ ရက် မနက် ၁၁ နာရီလောက်မှာ ရေး PDF က ထပ်မံဝင်ရောက် တိုက်ခိုက်ခဲ့တယ်လို့ ဒေသခံတွေက ပြောပါတယ်။

စစ်ကောင်စီဘက်က ရေးမြစ်ရိုးတလျှောက်လုံး နေရာတွေမှာ ကင်းပုန်းထူထပ်စွာချထားပြီး လုံခြုံရေးတွေ တင်းကျပ်ထားတဲ့ကြားကနေ အခုလို ရေး PDF တွေက ထပ်မံ တိုက်ခိုက်ခဲ့တာဖြစ်ပြီး စစ်ကောင်စီတပ်က လမ်းကို ပိတ်ဆို့ထားကာ လုံခြုံရေးပါ တင်းကျပ်ထားတယ်လို့ ဆိုပါတယ်။

စစ်ကောင်စီတပ်ကို ရေးဘီလူးအဖွဲ့က ဝင်ရောက်တိုက်ခိုက်ခဲ့တာဖြစ်ပြီး နှစ်ဖက်ထိခိုက်ကျဆုံးမှု အခြေအနေကိုတော့ မသိရသေးဘူးလို့ PDF တာဝန်ရှိသူတယောက်က ပြောပါတယ်။

ရန်ကုန်-ရေး-ထားဝယ်-မြိတ် ကားလမ်းပေါ်က ရေးမြစ်ကူးတံတားမှာ လုံခြုံရေးယူထားတဲ့ စစ်ကောင်စီတပ်ဖွဲ့ဝင်တွေဟာ ရေး PDF တွေရဲ့ မကြာခဏ တိုက်ခိုက်ခံရလေ့ရှိပြီး စစ်ကောင်စီဘက်က ဒီနေ့အထိ အနည်းဆုံး ၅ ယောက်လောက် သေဆုံးခဲ့ပါတယ်။

အခုလို ရေးမြစ်ကူးတံတားမှာ လုံခြုံရေးယူထားတဲ့ စစ်ကောင်စီတပ် တိုက်ခိုက်ခံရတာနဲ့ ပတ်သက်ပြီး စစ်ကောင်စီဘက်က သတင်းထုတ်ပြန်တာ မရှိသေးသလို ရေးဘီလူး အဖွဲ့ကလည်း ထုတ်ပြန်တာမျိုး မရှိသေးပါဘူး။

ဒေသဆိုင်ရာ PDF တွေကတော့ စစ်ကောင်စီတပ်ဘက်က လုံခြုံရေးတွေ တင်းကျပ်ထားတဲ့ ကြားကနေ စစ်ကောင်စီလက်အောက်ခံ စစ်တပ်၊ ရဲ၊ အုပ်ချုပ်ရေးမှူးတွေ၊ သတင်းပေးတွေကို သုတ်သင် ရှင်းလင်းထားခဲ့တာ ၁ ဒါဇင်ကျော်လောက်ရှိပြီး စစ်ဆင်ရေးကိုလည်း ထပ်မံအရှိန်မြှင့်သွားမယ်လို့ ပြောဆိုထားပါတယ်။

ရေးဘီလူးအဖွဲ့ဟာ ပြီးခဲ့တဲ့ သြဂုတ် ၃ ရက်နေ့ကလည်း လဝကရုံးကို ဝင်ရောက်တိုက်ခိုက်ခဲ့ရာ လဝက ဒုဦးစီးမှူး အပါအဝင် ၃ ယောက် သေဆုံး၊ ၁ ယောက် ဒဏ်ရာရရှိခဲ့ပြီးနောက် ရေးမြို့နယ်က ဌာနဆိုင်ရာ ဝန်ထမ်းတွေ ဒီနေ့အထိ ရုံးမတက်ရဲဘဲ ဖြစ်နေကြပါတယ်။