အာဏာသိမ်းစစ်ခေါင်းဆောင် မင်းအောင်လှိုင်ဟာ အောက်တိုဘာ ၄ ရက်မှာ ပဲခူးတိုင်း၊ ပြည်မြို့ကိုလာရောက်ပြီး ရွှေဆံတော်ဘုရားမှာ ယတြာချေဖို့ရှိနေတာကြောင့် တမြို့လုံးအနှံ့ အရပ်ဝတ်၊ စစ်ယူနီဖောင်းဝတ်တွေ လုံခြုံရေးတင်းကျပ်ချထားတယ်လို့ မြိုခံတွေထံက သိရပါတယ်။
စစ်ခေါင်းဆောင်ဟာ ပြည်မြို့ကို လေယာဉ်နဲ့လာမှာဖြစ်ပါ တပ်ထဲက လေယာဉ်ကွင်းမှာဆင်းဖို့ ရှိတဲ့အကြောင်းနဲ့ စစ်ကောင်စီခန့် ပဲခူးတိုင်းဝန်ကြီးချုပ်က ပြည်မြို့မှာ ဒီကနေ့ ကြိုရောက်နေပြီး ဘုရားမှာယတြာချေဖို့ရှိတာကြောင့် သာသနာရေးဦးစီးဌာနက လူတွေကိုလည်း ဘုရားကိုခေါ်ထားတယ်လို့ Non-CDM ဝန်ထမ်းတယောက်ကပြောပါတယ်။
“သူတို့အထဲကပဲသိရတာက သူ(မအလ)က အခုအသစ်ထပ်ဖောက်ထားတဲ့ ရွှေတောင်အထွက်က ဘို့လည်ကုန်း တပ်ထဲကလေယာဉ်ကွင်းမှာဆင်းမှာ လေယာဉ်နဲ့လာမှာ။ အဲ့ဒိကနေ ပြည်ကိုလာမယ်။ (ဒကစ)ကိုဝင်မယ်။ ရွှေဆံတော်ဘုရားကိုလာမယ်။ မင်းကြီးတောင်ပေါ်တက်မယ်။ အနောက်ဘက်ကမ်းက ညောင်ခြေထောက်ကိုသွားမယ်။ ညောင်ခြေထောက်မှာတော့ လက်နက်စက်ရုံတော့ရှိတယ်။”
ရွှေဆံတော်ဘုရားမှာလည်း ဒီညနေကတည်းက ဂေါပကအဖွဲ့အရေးပေါ်အစည်းအဝေးလုပ်နေပြီး ဘုရားဓာတ်လှေခါးရှေ့က လမ်းကိုလဲပိတ်ထားကာ ဘုရားဈေးဆိုင်တွေလည်း ၂ ရက်ပိတ်ခိုင်းထားတယ်လို့ ဆံတော်ရပ်ကွက် နေသူတယောက်က ပြောပါတယ်။
“သူကမနက်ဖန်လာမယ်လို့တော့ကြားတယ်။ ဘုရားပေါ်ကိုတက်မယ် ယတြာချေမယ်။ နောက် ပြည်ဝင်၊ ပြည်ထွက်လုပ်မယ်။ မင်းကြီးတောင်ပေါ် ဝန်ချတောင်ကိုလည်းသွားမယ်လို့တော့ ကြားတယ်။ ဘုရားကတည်းခိုခန်းတွေမှာတော့ စစ်ကောင်စီတပ်သားတွေထင်တယ် အပြည့်ပဲ။ ဘုရားမှာက တည်းခိုဆောင်တွေအများကြီးရှိတာ အခုအပြည့်ပဲ အားလုံးကအရပ်ဝတ်တွေနဲ့။ အပြင်လမ်းမနဲ့ချောင်ကြိုချောင်ကြားတွေမှာတော့ စစ်ယူနီဖောင်းဝတ်တွေနဲ့ ရဲတွေ စောင့်နေတယ်။ ဗိုလ်ချုပ်လမ်းဘက်အထိပဲ။ နောက် အာဏာသိမ်းကတည်းက ပိတ်ထားတဲ့ ဝါတွင်း နိဗ္ဗာန်ဆော်အဖွဲ့ကိုလည်း အရေးပေါ်လှမ်းခေါ်ပြီး မနက်ဖန်ကစပြီး နိဗ္ဗာန်ဆော် လှည့်ခိုင်းထား တယ်။”
စစ်ခေါင်းဆောင်လာမှာကြောင့် ပြည်နဲ့ ရွှေတောင်လမ်းတလျှောက်မှာ စစ်ကောင်စီတပ်တွေ ကင်းပုန်းတွေချထားသလို မြို့အဝင်ဂိတ်တွေမှာလည်း ကားတွေကို လုံခြုံရေးတင်းကျပ်ရှာဖွေနေတဲ့အကြောင်းနဲ့ မြို့ထဲက ဗိုလ်ချုပ်လမ်းတလျှောက်ကိုလည်း ညပိုင်းအထိ သန့်ရှင်းရေးလုပ်နေကြတယ်လို့ မြို့ခံတွေက ပြောကြပါတယ်။
ပြီးခဲ့တဲ့နှစ်ကလည်း အာဏာသိမ်းစစ်ခေါင်းဆောင် မင်းအောင်လှိုင် ပြည်မြို့ကို လာမယ့် သတင်းထွက်ပေါ်ခဲ့ပြီး သတင်းဌာနတွေက အရင်သတင်းထုတ်လိုက်တာကြောင့်အစီအစဉ် ပျက်သွားခဲ့ပါတယ်။
အရင်က မဆလအာဏာရှင်ဟောင်း ဦးနေဝင်းဟာလည်း ပြည်ရွှေဆံတော်ဘုရားကို တက်ပြီး မကြာခဏ ယတြာလာခြေတာ၊ အောင်မြေလာနင်းတာ ၊ ပြည်၀င် ပြည်ထွက် ယတြာချေတာတွေ ပြုလုပ်လေ့ရှိပြီး သူ့နောက် စစ်အာဏာရှင်ခေါင်းဆောင်ဟောင်း ဦးသန်းရွှေနဲ့ စစ်ထောက်လှမ်းရေး ဟောင်း ဦးခင်ညွှန့်တို့လည်း အလားတူ လာရောက် ယတြာချေခဲ့ဖူးပါတယ်။
ပဲခူးတိုင်း၊ ပြည်မြို့ကို အာဏာသိမ်းစစ်ခေါင်းဆောင်တွေ ယတြာချေဖို့ ရည်ရွယ်ပြီး လာရောက်ဖို့ အစီအစဉ်ရှိနေတာကြောင့် ထင်ရှားတဲ့နေရာတွေကို ပြင်ဆင်နေပြီး စစ်အင်အားအလုံးအရင်းနဲ့ လုံခြုံရေးတင်းကျပ်ချထား စစ်ဆေးနေတယ်လို့ ဒေသခံတွေက ပြောပါတယ်။
အခုရက်ပိုင်း မတ် ၂၇ ရက် တော်လှန်ရေးနေ့မတိုင်ခင် အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်နဲ့ ဒုဗိုလ်ချုပ်မှူးကြီး စိုးဝင်းတို့ လာမယ်ဆိုပြီး ပြည်မြို့ရဲ့ ထင်ရှားတဲ့ သရေခေတ္တရာရှေးဟောင်းဇုန်၊ ရွှေဆံတော်ဘုရား၊ ၀န်ချတောင်တွေကို ပြုပြင်မွမ်းမံနေတယ်လို့ ရှေးဟောင်းပြတိုက်အနီးနေသူတယောက်က ပြောပါတယ်။
“သူတို့က အခုရက်ပိုင်းလာမှာသေချာတယ်။ အခု သရေခေတ္တရာရှေးဟောင်းဇုန်ထဲက ပြတိုက်ကို ကျည်ကာမှန်တွေ တတ်ခိုင်းလို့လည်း ပြီးသွားပြီ၊ သူတို့အတွက်လုပ်တာတော့မဟုတ်ပါဘူး။ ဒါပေမဲ့ သူတို့က တိတ်တိတ်ကလေးလုပ်နေတာ၊ တန်ဖိုးကြီးတဲ့ ရှေးဟောင်းပစ္စည်းတွေကို ကျည်ကာမှန်တတ်တာပါ။ အခုရက်ပိုင်းပြတိုက်ထဲကို လာသူမှန်သမျှ ဓာတ်ပုံရိုက်ဖို့ နေနေသာ ဖုန်းထုတ်တာနဲ့ တန်းပြီး ခေါ်စစ်တာ။ အစစ်အဆေးလည်း အရမ်းကြမ်းတာ၊ သူတို့က ၂၅ ရက်နေ့ လာမယ်လို့တော့ ပြောတာပဲ။”
ဒါ့အပြင် ပေါက်ခေါင်းမြို့နယ်ထဲက ကန်ချင်းကျေးရွာမှာလည်း အကြီးစားပြင်ဆင်တာတွေ ပြုလုပ်နေတယ်လို့ ဆိုပါတယ်။
“ကန်ချင်းကျေးရွာကိုလည်း သွားမှာ။ အဲ့ဒိမှာက ဆေးရုံလား၊ အထက်တန်းကျောင်းလားတော့ မသိဘူးဖွင့်ပွဲလုပ်မှာ၊ အဲ့ဒီမှာလည်း အကြီးစားပြင်ဆင်မှုတွေလုပ်နေတယ်။ ကန်ချင်းရွာက ပေါက်ခေါင်းမြောက်ဘက် ၁၄ အုပ်စုမှာ အစွန်ဆုံးမှာရှိတယ်၊ ရွှေပန်းတောနဲ့လည်း နီးတယ်။ အဲ့ဒီနယ်က အစိမ်းတွေများတယ်။ အရင်ကတော့ တွဲဖက်အထက်တန်းကျောင်းရှိတာ အဲ့ဒါကို အဆင့်မြှင့်ပေးဖို့ရှိတယ်လို့လည်း ကြားတယ်။ သူကတိုက်နယ် အဆင့် ရှိတယ်။ အခုအဲဒီမှာ စစ်ကောင်စီတပ်သား ၁၀၀ လောက်လာချထားတယ်၊ အစစ်အဆေးတွေည်း လုပ်နေတယ်။”
ပြီးခဲ့တဲ့ရက်တွေကတည်းက ပြည်လေယာဉ်ကွင်းမှာလည်း စစ်ကောင်စီတပ်သား ၁၀၀ လောက်ချထားပြီး ရွှေဆံတော်ဘုရားနဲ့ ၀န်ချတောင်တွေကို လာတဲ့ ဘုရားဖူးတွေကို စစ်ဆေးနေပါတယ်။
အရင် မဆလ အာဏာရှင် ဦးနေဝင်းဟာလည်း ပြည်၀င်ပြည်ထွက်လုပ်တာ၊ ၀န်ချတောင်းပန်တာတွေလုပ်ဖို့ ပြည်မြို့ကို မကြာခဏလာလေ့ရှိပြီး ရွှေဆံတော်ပေါ်က အောင်မြေကိုလည်း လာနင်းတတ်တာတွေ အမြဲလုပ်လေ့ရှိပါတယ်။
မြန်မာနိုင်ငံတဝန်း လှည့်လည် ယတြာချေနေတဲ့ အာဏာသိမ်းစစ်ခေါင်းဆောင် မင်းအောင်လှိုင်ဟာ ပြီးခဲ့တဲ့ ဖေဖော်ဝါရီ ၂၇-၂၈ ရက်နေ့တွေတုန်းကလည်း ပြည်မြို့ကို လာမယ်လို့ စီစဥ်ထားပြီးနောက် ခါးဝေဒနာ ပြင်းထန်စွာခံစားနေရတာကြောင့် အစီအစဥ်ပျက်သွားတယ်လို့ စစ်အုပ်စုနဲ့နီးစပ်တဲ့ အသိုက်အဝန်းဆီက သိရပါတယ်။
ပြည်မြို့မှာ အခုရက်ပိုင်း စစ်ဆေးမှုတွေ တင်ကျပ်စွာ ပြုလုပ်နေသလို ညဘက်တွေမှာလည်း မကြာခဏ သေနတ်သံတွေ ကြားနေရတာကြောင့် ပြည်သူတွေလည်း ထိတ်လန့်နေတယ်လို့ ဒေသခံတွေဆီက သိရပါတယ်။
