တရုတ်နိုင်ငံမှာ ဝီဂါလူမျိုးတွေအပေါ် လူမျိုးတုံးသတ်ဖြတ်မှုနဲ့ ဖိနှိပ်မှုတွေကို လုပ်နေတယ်လို့ အမေရိကန်နိုင်ငံခြားရေးဝန်ကြီး အန်တိုနီဘလင်ကန်က ဇွန် ၂ ရက်က ဝေဖန်ပြောကြားလိုက်ပါတယ်။
နိုင်ငံခြားရေးဌာနကနေ နိုင်ငံတကာ ဘာသာရေးလွတ်လပ်ခွင့်ဆိုင်ရာ ၂၀၂၁ အစီရင်ခံစာကို ဇွန် ၂ ရက် စတင်ထုတ်ဝေတဲ့အချိန်မှာ ဝန်ကြီး ဘလင်ကန်က ပြောကြားလိုက်တာပါ။
“တရုတ်က မွတ်ဆလင် ဝီဂါအများစုနဲ့ တခြား ဘာသာရေး လူနည်းစုတွေကို လူမျိုးတုံးသတ်ဖြတ်မှုတွေ ဆက်လက်လုပ်ဆောင်နေပါတယ်။ ၂၀၁၇ ခုနှစ် ဧပြီလကတည်းက ဝီဂါတွေ၊ ကာဇက်တွေ၊ ကာဂျစ်တွေနဲ့ တခြားလူမျိုးတွေ အားလုံးပေါင်း တသန်းကျော်လောက်ကို ရှင်းကျန်းဒေသရှိ အကျယ်ချုပ်စခန်းတွေမှာ ထိန်းသိမ်းထားကြောင်း” ဘလင်ကန်က ပြောကြားခဲ့ပါတယ်။
ရှင်ကျန်းဒေသမှာ ထိန်းသိမ်းရေးစခန်းတွေ မရှိကြောင်း တရုတ်က ကနဦးမှာ ငြင်းဆိုခဲ့ပေမဲ့ ၂၀၁၈ ခုနှစ်မှာတော့ ဒေသတွင်းမှာ အကြမ်းဖက်ဝါဒ၊ ခွဲထွက်ရေးနဲ့ ဘာသာရေး အစွန်းရောက်ဝါဒတွေ ဆိုတာကို မဖြစ်မနေတိုက်ဖျက်ဖို့ သက်မွေးဝမ်းကျောင်း သင်တန်းကျောင်းတွေကို ထူထောင်ထားတာဖြစ်ကြောင်း ပြောကြားခဲ့ပါတယ်။
ရုရှားသမ္မတဗလာဒီမာပူတင်ဟာ ဖေဖော်ဝါရီ ၁၅ ရက်နေ့က ဂျာမဏီဝန်ကြီးချုပ် အိုလစ်ဖ် ရှို့လ်ဇ်ကို မော်စကိုမှာ လက်ခံဆွေးနွေးခဲ့ပြီး သတင်းစာရှင်းလင်းရာမှာ ယူကရိန်းအရှေ့ဘက် ခွဲထွက်ဒေသတွေမှာ လူမျိုးတုံးသတ်ဖြတ်မှုတွေ ရှိတယ်လို့ စွပ်စွဲလိုက်ပါတယ်။
အဆိုပါပဋိပက္ခကို ၂၀၁၄ မှာ ရုရှား၊ ယူကရိန်း၊ OSCE ဥရောပလုံခြုံရေးအဖွဲ့တို့ ပါဝင်လက်မှတ်ရေးထိုးထားတဲ့ မင့်စ်ငြိမ်းချမ်းရေးစာချုပ် (Minsk peace agreement) ပါအတိုင်း ဖြေရှင်းဖို့ တောင်းဆိုခဲ့ပါတယ်။
ပူတင်က ယူကရိန်းအနီးမှ တပ်တချို့ကို ပြန်ရုတ်ဖို့ ဆုံးဖြတ်ခဲ့ကြောင်းနဲ့ ရုရှားရဲ့ လုံခြုံရေးတောင်းဆိုမှုတွေကို အနောက်အုပ်စုနဲ့ ထပ်မံဆွေးနွေးပြီးမှ တပ်အားလုံး အပြီးတိုင်ရုပ်သိမ်းနိုင်မယ်လို့ ပြောပါတယ်။
ဒုံးကျည်ပြဿနာကို အနောက်အုပ်စုနဲ့ ဆက်လက်ဆွေးနွေးဖို့ ရှိကြောင်းလည်း ပြောပါတယ်။ နောက် ရုရှားကနေ ဂျာမဏီကို သွယ်တန်းထားတဲ့ Nord Stream 2 ဓာတ်ငွေ့ပိုက်လိုင်းကို ဆက်လုပ်မှာ ဖြစ်သလို၊ ဥရောပစွမ်းအင်လိုအပ်ချက်အတွက် ရုရှားက ဆက်ပြီး ပံ့ပိုးသွားမယ်လို့ ပြောခဲ့ပါတယ်။
