ရခိုင်ပြည်နယ်၊ ဖွံ့ဖြိုးတိုးတက်မှု နောက်ကျနေတာဟာ လူမျိုးရေးပဋိပက္ခတွေကြောင့် ဖြစ်တယ်လို့ စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က မတ်လ ၁ ရက် က အနောက်ပိုင်းတိုင်းစစ်ဌာနချုပ်မှာစစ်ကောင်စီတပ်ဖွဲ့ဝင်တွေနဲ့ တွေ့ဆုံစဉ် ပြောကြားလိုက်ပါတယ်။

အရင်က ရခိုင်ပြည်နယ်မှာ အုပ်ချုပ်မှုစနစ်နဲ့ ပညာရေးအားကောင်းခဲ့ပေမဲ့ မူဂျာဟစ် သောင်းကျန်းသူတွေနဲ့ ဒေသတွင်း လူမျိုးရေးပဋိပက္ခတွေစတဲ့ အကြောင်းအမျိုးမျိုးတွေကြောင့် ရခိုင်ပြည်နယ်ဟာ ဒေသဖွံ့ဖြိုးတိုးတက်ရေးမှာ နောက်ကျခဲ့ရတာဖြစ်တယ်လို့ စစ်ခေါင်းဆောင်က ဆိုပါတယ်။

ဖွံ့ဖြိုးတိုးတက်မှု နည်းပါးပြီး လမ်းပန်းဆက်သွယ်ရေး ခက်ခဲမှုတွေကြောင့် ဒေသခံတွေဟာ ခေတ်အဆက်ဆက် အစိုးရတွေကို ရင်းနှီးနားလည်မှု နည်းပါးခဲ့တယ်လို့လည်း ဆိုပါတယ်။ ဒါကြောင့် စစ်ကောင်စီလက်ထက်မှာ ဖွံ့ဖြိုးတိုးတက်ရေးအတွက် ကနဦး အရေးကြီးတဲ့ လမ်းပန်းဆက်သွယ်ရေး တိုးတက်ရေးကို အဓိက လုပ်ဆောင်ခဲ့တယ်လို့ ပြောပါတယ်။

ဒါ့အပြင် တိုင်းစစ်ဌာနချုပ် ကွက်ကဲမှုအောက်မှာရှိတဲ့ တပ်ရင်း တပ်ဖွဲ့တွေ အနေနဲ့လည်း တိုက်ခိုက်ရေးစွမ်းရည် ပြည့်ဝနေဖို့နဲ့ စစ်ကောင်စီအနေနဲ့ နိုင်ငံရဲ့ အနောက်ဘက်အခြမ်းကို လုံခြုံရေးနဲ့ တရားဥပဒေစိုးမိုးရေးအတွက် အလေးထား ဆောင်ရွက်တာတွေ ရှိနေတယ်လို့ စစ်ခေါင်းဆောင်က ပြောပါတယ်။

စစ်ခေါင်းဆောင်ရဲ့ ရခိုင်ပြည် ခရီးစဉ်ဟာ ရခိုင်ပြည်သူအကျိုးထက် စစ်တပ်ရဲ့ အကျိုးအတွက် ဖြစ်တယ်လို့ ရခိုင်နိုင်ငံရေးသမားတွေက သုံးသပ်ကြပါတယ်။

အစိုးရအဆက်ဆက်ဟာ ရခိုင်ပြည်ကို ဖွံဖြိုးတိုးတက်ရေးခေါင်းစဉ်နဲ့ ပြည်သူတွေကို ဆွယ်ပေမဲ့လည်း လက်တွေ့မှာ ဘယ်စီမံကိန်းမှ အကောင်အထည်ပေါ်ခဲ့တာ မရှိဘူးလို့ ရခိုင်ဝါရင့်နိုင်ငံရေးလေ့လာသုံးသပ်သူ ပြည်သူလွှတ်တော်အမတ်ဟောင်း ဦးဖေသန်းက ပြောပါတယ်။

“ရခိုင်ပြည်သူတွေကတော့ အစိုးရအသစ်တခု တက်လာတိုင်း ရခိုင်ပြည်နယ် ဖွံ့ဖြိုးတိုးတက်အတွက် လုပ်ပေးလိမ့်မယ်လို့ စိတ်ဆန္ဒတွေကတော့ ရှိကြပါတယ်။ အစိုးရခေါင်းဆောင်တွေကလည်း ရခိုင်ပြည် ဖွံ့ဖြိုးတိုးတက်ရေးဆိုတဲ့ ခေါင်းစဉ်အောက်မှာ ပြည်သူတွေကို စည်းရုံးတယ်၊ အခွင့်အရေး အခွင့်အလမ်းတွေနဲ့ မဲဆွယ်သလို ဆွယ်တယ်ပေါ့၊ ဝါဒဖြန့်တာပေါ့။ ဒါ‌ပေမဲ့ လက်တွေ့မှာကျတော့ ဘယ်စီမံကိန်းမှ အကောင်အထည်မပေါ်ခဲ့ဘူး။ ဥပမာပြောရရင် စိုင်းဒင်စီမံကိန်းတို့ ပုဏ္ဏားကျွန်း စက်မှုဇုန်တို့ ကျောက်ဖြူ စက်မှုဇုန်တို့ အဲလိုပေါ့၊ ပလန်တော့ဆွဲတယ်၊ ဒါပေမဲ့ မဖြစ်လာခဲ့ဘူးပေါ့၊ အဲလို အခြေအနေမျိုးတွေရှိတယ်။ အခု စစ်ကောင်စီဥက္ကဋ္ဌ ခရီးစဉ်မှာလည်းပဲ သူ့အနေနဲ့ အဲလို မစားရ ဝခမန်းပေါ့၊ ပြည်သူတွေကို ဖွံ့ဖြိုးတိုးတက်ရေး လုပ်ပေးမှာတို့ စည်းရုံးတယ်၊ မဲဆွယ်တယ်ပေါ့။ ပြီးတော့ လုပ်ငန်းရှင်တွေနဲ့တွေ့ပြီးတော့ အကူအညီပေးမလိုလို ပြောခဲ့တာတွေကို ကျနော်တို့ ကြားရတယ်။ ဒါ‌ပေမဲ့ လက်တွေ့မှာ သူပြောသလို ရခိုင်ပြည်နယ်ရဲ့ အခွင့်အလမ်းတွေ ဖြစ်လာမလား မဖြစ်လာဘူးလား ဆိုတာတော့ ကျနော်တို့အနေနဲ့ လုံးဝသံသယရှိတယ်။ အရင်လည်း အဲလိုလုပ်ခဲ့တဲ့ နမူနာတွေ ရှိတဲ့အတွက် ရခိုင်ပြည်နယ်ဟာ ရေခံမြေခံ ကောင်းပါလျက်နဲ့ ဒီနေ့အထိ ဖွံ့ဖြိုးမှုအနည်းဆုံး ပြည်နယ်တခုဖြစ်နေတယ်။ ဒါကြောင့်မို့လို့ သူ့ရဲ့ အဓိက ရခိုင်ပြည်နယ် ဖွံ့ဖြိုးရေးဆိုတဲ့ ခေါင်းစဉ်အောက်မှာ ပြည်သူတွေကို စည်းရုံးပြီးတော့ ပြောဆိုနေတာကတော့ ဖြစ်လာမှပဲ ကျနော်တို့ ဟုတ်တယ်၊ မှန်ပါတယ်လို့ သုံးသပ်လို့ရလိမ့်မယ်။ အခုအချိန်မှာတော့ သူတို့ ပြောနေကြအတိုင်း လုပ်နေကြအတိုင်း လုပ်နေတယ်လို့ ကျနော်ကတော့ ပြောချင်တယ်။”

စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ဟာ ရခိုင်ပြည်နယ်ကို ဖေဖော်ဝါရီ ၂၆ ရက်ကတည်းက ရောက်ရှိနေတာဖြစ်ပြီး စစ်တွေတပ်နယ်ရှိ စစ်ကောင်စီတပ်သားတွေကို အမိန့်နာခံဖို့ ပြောကြားခဲ့တာတွေရှိသလို ၂၇ ရက်နေ့မှာ ရခိုင်ပြည်နယ်က စီးပွားရေး လုပ်ငန်းရှင်တွေနဲ့ တွေ့ဆုံကာ အိန္ဒိယ ရေနက်ဆိပ်ကမ်းနဲ့ ကျောက်ဖြူ အထူးစီးပွားရေးဇုန်တွေကိုလည်း သွားရောက်ခဲ့ပါတယ်။

ရခိုင်ပြည်နယ်ရှိ မြို့နယ်တချို့မှာ လူမျိုးရေးပဋိပက္ခဖြစ်ပွားစေနိုင်တဲ့ ထူးခြားဖြစ်စဥ်တွေဟာ ဆက်တိုက်ဖြစ်ပွားလာနေတာကြောင့် ရခိုင်ပြည်သူတွေအနေနဲ့ သတိထားဆင်ခြင်ကြဖို့ကို ရက္ခိုင်အမျိုးသားအဖွဲ့ချုပ် ULA က ဒီဇင်ဘာလ ၁၇ ရက် နေ့စွဲနဲ့ ထုတ်ပြန်ပါတယ်။

ရခိုင်ပြည်မှာ ဒီဇင်ဘာ ၉ ရက်မှ ၁၄ ရက်အတွင်း မြောက်ဦးမြို့နယ် အောက်သကန်ကျေးရွာအတွင်း စပါးရိတ်သိမ်းခြွေလှေ့စက် ၂ လုံး မီးရှို့ခံရတာ၊ မြောက်ဦးမြို့နယ် လောင်းကြက်ရွာအနီး ရိတ်သိမ်းပြီး စုပုံထားတဲ့စပါးစည်း(ကောက်လှိုင်းစည်း)တွေ မီးရှို့ခံရမှု၊ ကျောက်တော်မြို့နယ် တောင်ဘွေကျေးရွာအနီး ရခိုင်အမျိုးသမီး တယောက်ကို  မွတ်ဆလင်အမျိုးသား ၂ ယောက်က မုဒိန်းပြုကျင့်ရန်ကြံစည်မှု၊ ဂွမြို့နယ် ရွာမရပ်ကွက် မင်္ဂလာလမ်းရှိ မူလတန်း(လွန်)ကျောင်းအား မီးရှို့ခံရမှု၊ ကျောက်ဖြူမြို့နယ် စည်မော်ကျေးရွာမှာ လယ်သမား ၃ ယောက် ပိုင်ဆိုင်တဲ့ ရိတ်သိမ်းပြီး စပါးတွေကို ရည်ရွယ်ချက်ရှိရှိနဲ့ မီးရှို့မှု စတဲ့ဖြစ်စဉ်တွေဖြစ်ခဲ့တယ်လို့ ဆိုပါတယ်။

အဆိုပါဖြစ်ရပ်တွေမှာ မွတ်ဆလင်ကျေးရွာတွေနဲ့ နီးကပ်စွာရှိတဲ့ ​လောင်းကြက်ရွာလို ကျေးရွာတွေအနီးမှာ ဖြစ်ပွားခဲ့တဲ့ဖြစ်ရပ်အပါအဝင် ရခိုင်ကျေးရွာတွေထဲမှာပါ တပြိုင်နက်တည်းရှေ့ဆင့်နောက်ဆင့် တိုက်ဆိုင်စွာဖြစ်ပွားခဲ့တယ်လို့ ULA ရဲ့ ထုတ်ပြန်ချက်မှာ ပါရှိပါတယ်။

အခုလို ဖြစ်စဥ်တွေရဲ့နောက်မှာ အဖွဲ့အစည်းတစ်ခုခုက မကောင်းတဲ့ရည်ရွယ်ချက်တစ်ခုခုနဲ့ နိုင်ငံရေးလှုံဆော်မှုကို နောက်ကွယ်ကကြိုးကိုင်ကာ ပြုလုပ်နေတာကို သံသယဖြစ်စေပြီး လုံခြုံရေးဆိုင်ရာစိုးရိမ်မှုနဲ့အတူ လူမျိုးရေးပဋိပက္ခတွေကို ဦးတည်လာမှာကို စိုးရိမ်ဖွယ်ရာဖြစ်စေတယ်လို့လည်း ဆိုပါတယ်။

ဒီလိုဖြစ်စဥ်တွေဟာ လတ်တလော တည်ငြိမ်နေတဲ့ ရခိုင်ပြည်ကို လူမျိုးရေးပဋိပက္ခတွေ ဖန်တီးကာ ဒေသတွင်း ပဋိပက္ခတွေ ဖြစ်ပေါ်လာစေဖို့ တမင်ရည်ရွယ်ကာ  လုပ်ဆောင်နေတဲ့ လုပ်ရပ်၊ မတည်မငြိမ်မှုတွေကို ဖန်တီးလှုံဆော်တဲ့လုပ်ရပ်၊ စိုးရိမ်ထိတ်လန့်မှုတွေကို ရည်ရွယ်ချက်ရှိရှိနဲ့ ဖန်တီးတဲ့ လုပ်ရပ်အဖြစ်  ရက္ခိုင်အမျိုးသားအဖွဲ့ချုပ်က ရှုမြင်တယ်လို့ ဆိုပါတယ်။

ဒါကြောင့် မြို့၊ ရွာတွေမှာရှိတဲ့ လူငယ်တွေအနေနဲ့ လုံခြုံရေး၊ မီးဘေးအန္တရာယ်တွေ ကင်းဝေးစေဖို့  မိမိတို့ရပ်ရွာတွေ၊ မြို့တွေမှာ လူစိမ်းအဝင်အထွက်တွေကို စောင့်ကြည့်ကြဖို့ တိုက်တွန်းထားပြီး ရက္ခိုင်အမျိုးသားအဖွဲ့ချုပ်/ ရက္ခိုင့်တပ်တော်အနေနဲ့လည်း အဆိုပါဖြစ်စဥ်တွေအပေါ်မှာ ပြည်သူတွေနဲ့လက်တွဲကာ သေချာစွာစုံစမ်းပြီး၊ ပြည်သူတွေရဲ့လုံခြုံရေးအတွက် တာဝန်ယူသွားမယ်လို့ ထုတ်ပြန်ထားပါတယ်။