မကွေးတိုင်း၊ မြိုင်မြို့နယ်၊ မန်ကျည်းကန်ကျေးရွာကို ဧပြီ ၁၉ ရက် မနက်ပိုင်းမှာ စစ်ကောင်စီတပ်က လေကြောင်းကနေ ထပ်မံပစ်ခတ်ပြီး ၈ တန်းကျောင်းသားတယောက်ကို သေနတ်နဲ့ပစ်သတ်ခဲ့ကာ ဒေသခံပြည်သူ ၃၀ ကျော်လောက်ကို ဓားစာခံအဖြစ် ဖမ်းဆီးသွားကြတယ်လို့ မြိုင် ပကဖ ကနေ သိရပါတယ်။
မြိုင်မြို့နယ်၊ မန်ကျည်းကန်ကျေးရွာကို ဒီနေ့ ဧပြီ ၁၉ ရက် မနက်ပိုင်းမှာ စစ်ကောင်စီက Mi35 တိုက်ခိုက်ရေးရဟတ်ယာဥ် ၁ စီးနဲ့ လေကြောင်းကနေ ထပ်မံပစ်ခတ်ပြီး ၈ တန်းကျောင်းသားလေးတယောက်ကို ပစ်သတ်ကာ ပြည်သူ ၃၀ ကျော်လောက်ကို ဓားစာခံအဖြစ် ဖမ်းခေါ်သွားကြတယ်လို့ မြိုင်မြို့နယ် မြောက်ပိုင်းဇုန် ပကဖ တာဝန်ခံ ဗိုလ်Cross က ဒီဗွီဘီကို ပြောပါတယ်။
ဒါ့အပြင် ဆေးရုံအနောက်ဘက်က နေအိမ် ၅ လုံးလောက်ကို မီးရှို့ဖျက်ဆီးကာ ဒက်ဘယ်ကပ် ကားတစီးနဲ့ လိုက်ထရပ် ကားတစီးကို မီးရှို့ဖျက်ဆီးခဲ့ကြတယ်လို့ ဆိုပါတယ်။
“စစ်ကောင်စီဘက်က ဒီနေ့ လေကြောင်းကနေ ပစ်ခတ်တာက လမ်းကြောင်းရှင်းတဲ့သဘော ဖြစ်နိုင်တယ်ဗျ။ ဓားစာခံတွေကို ဖမ်းပြီး မန်ကျည်းကန်ရွာကနေ ကန်နီဘက်ကို ထွက်သွားပြီးတဲ့နောက်ပိုင်း ကျနော်တို့တပ်ဖွဲ့က နယ်မြေရှင်းလင်းရေး ပြုလုပ်ခဲ့ကြတော့ အသက် ၁၄ နှစ်လောက်ရှိတဲ့ ၈ တန်းကျောင်းသား မောင်ဖြိုးထက်မောင် သေနတ်ဒဏ်ရာနဲ့ သေဆုံးနေတာ တွေ့ရတယ်” လို့ ဗိုလ် Cross က ပြောပါတယ်။
မန်ကျည်းကန်ဆေးရုံကို ဧပြီ ၁၈ ရက်နေ့မှာ လေကြောင်းတိုက်ခိုက်မှုပြုလုပ်ကာ ဆေးရုံပင်မအဆောက်အဦက ပစ္စည်းတွေထားတဲ့ ဓာတ်မှန်ခန်းတွေကို မီးရှို့ဖျက်ဆီးခဲ့ကြတယ်လို့ ဆိုပါတယ်။
မြိုင်မြို့နယ်၊ ညောင်ရွာနားက ကာကွယ်ရေးစခန်းခွဲတခုကိုလည်း ဧပြီ ၆ ရက်နေ့မှာ စစ်ကောင်စီတပ်က Mi35 တိုက်ခိုက်ရေးရဟတ်ယာဥ် ၁ စီးနဲ့ လေကြောင်းတိုက်ခိုက်မှု ပြုလုပ်ကာ Mi17 ၂ စီးနဲ့ ဝင်ရောက်စီးနင်းပြီး ကာကွယ်ရေးစခန်းနဲ့ ကား ၂ စီးကို မီးရှို့ဖျက်ဆီးကာ ငွေကျပ်သိန်း ၁၀၀ ကို ယူဆောင်သွားတယ်လို့ မြိုင်ပကဖကနေ သိရပါတယ်။
ချင်းပြည်နယ်၊ မကွေးတိုင်းနဲ့ စစ်ကိုင်းတိုင်းတွေမှာ စစ်ကောင်စီရဲ့ မြေပြင်စစ်ကြောင်းတွေကို ပြည်သူ့ကာကွယ်ရေးတပ်ဖွဲ့တွေက တိုက်ခိုက်လို့ အထိနာနေတာကြောင့် စစ်ကောင်စီဘက်က လေကြောင်းတိုက်ခိုက်တာတွေ ဆက်တိုက်ပြုလုပ်လာနေတယ်လို့ တော်လှန်ရေးတပ်ဖွဲ့တွေ ဆီကနေ သိရပါတယ်။
စစ်ကိုင်းတိုင်း၊ ကန့်ဘလူမြို့နယ်၊ ကိုးတောင်ဘို့တိုက်နယ်အတွင်း စက်တင်ဘာ ၇ ရက် နေ့လယ် ၂ နာရီလောက်မှာ စစ်ကောင်စီတပ်က ဂျက်တိုက်လေယာဉ်တစင်းနဲ့ နာရီဝက်ခန့်ကြာ လာရောက်ပစ်ခတ်ခဲ့တယ်လို့ ဒေသခံတွေက ပြောပါတယ်။
ကိုးတောင်ဘို့တိုက်နယ် ဇီးကနားအုပ်စု ကျေးရွာတွေအနီးကို ဂျက်တိုက်လေယာဉ်နဲ့ ပစ်ခတ်ခဲ့ပြီး Mi 17 ထောက်ပို့ရဟတ်ယာဉ် နှစ်စင်းနဲ့ တပ်ဖွဲ့ဝင်အင်အား ၁၃၀ ခန့်ကို ၄ ကြိမ် ချပေးသွားတယ်လို့ ဆိုပါတယ်။
ဒေသခံတယောက်က “တိုက်ပွဲမရှိဘဲ တိုက်လေယာဉ်နဲ့ ပစ်ခတ်ပြီး လမ်းကြောင်းရှင်းတဲ့ ပုံစံမျိုး လုပ်သွားတာ။ နောက်ပြီး ရဟတ်ယာဉ်နှစ်စင်းနဲ့ နှောကုန်းရွာ အနောက်ဘက်မှာ ၂ ခါ၊ လျှော်ဖြူကုန်းရွာနဲ့ ဇီးကနားရွာ အနောက်ဘက်ကို ၁ ခါစီ၊ စုစုပေါင်း ၄ ခါ လူချသွားတယ်။ အဲ့ဒီချပေးသွားတဲ့ စစ်ကောင်စီတပ်ဖွဲ့ဝင်တွေက ရွာတွေဘက်ကို လက်နက်ကြီး၊ လက်နက်ငယ်တွေနဲ့ ပစ်ခတ်တာတွေလုပ်ပြီး စစ်ကြောင်းထိုးလာတာ။ သူတို့ (စစ်ကောင်စီတပ်ဖွဲ့) က PDF တွေရှိမယ်အထင်နဲ့ ရွာတွေဘက်ကို လာသောင်းကျန်းတာပဲ။ အသေပျောက်တော့ မသိရသေးဘူး။ ရွာကလူတွေတော့ ပြေးနေရတယ်” လို့ ပြောပါတယ်။
စစ်ကောင်စီတပ်ဖွဲ့ဟာ နှောကုန်းကျေးရွာနဲ့ ဇီးကနားကျေးရွာထဲကို လက်နက်ကြီး၊ လက်နက်ငယ်တွေနဲ့ ပစ်ခတ်ဝင်ရောက်ခဲ့တာကြောင့် ကျေးရွာဒေသခံတွေ ထွက်ပြေး တိမ်းရှောင်နေကြရပြီး ထွက်ပြေးချိန်မရဘဲ ပိတ်မိနေလို့ ဖမ်းဆီးခံထားရတာတွေလည်း ရှိတယ်လို့ သိရပါတယ်။
လက်ရှိမှာ နှောကုန်းနဲ့ ဇီးကနားကျေးရွာမှာ စစ်ကောင်စီတပ်ဖွဲ့က တပ်စွဲထားပြီး ဒေသခံတွေက ကျေးရွာအတွင်း ပြန်မဝင်ရဲဘဲ တောထဲတွေနဲ့ ဘေးကင်းနိုင်မယ့် နီးစပ်ရာ နေရာတွေမှာ ခိုကပ်နေထိုင်ကြရတယ်လို့ ဒေသခံတွေက ပြောပါတယ်။
စစ်ကောင်စီတပ်ဖွဲ့ဟာ ပြီးခဲ့တဲ့ ဩဂုတ် ၂၃ ရက်က စတင်ကာ ကန့်ဘလူမြို့နယ် မြောက်ဘက်ခြမ်းက ကျေးရွာတွေကို စစ်ကြောင်းထိုး ဝင်ရောက်တာတွေ ရှိနေပြီး လေကြောင်းက ပစ်ခတ်တာတွေလည်း ရှိနေပါတယ်။
