ဂျာမနီနိုင်ငံ မြို့တော်ဘာလင်မှာ နေထိုင်သူတွေဟာ စွမ်းအင်စျေးနှုန်း မြင့်တက်မှုကို တားဆီးနိုင်ရေးအတွက် ရုရှားအပေါ် ပိတ်ဆို့ အရေးယူမှုတွေကို ရုပ်သိမ်းပေးဖို့ စက်တင်ဘာ ၅ ရက်က ဆန္ဒပြတောင်းဆိုခဲ့ပါတယ်။

ဆန္ဒပြသူတွေဟာ “Nord Stream Gas Pipeline ကိုဖွင့်ပါ” နဲ့ နေတိုး-အလိုမရှိ စတဲ့ ကြွေးကြော်သံတွေကို ကြွေးကြော်ခဲ့ကြပြီး ဂျာမန်အစိုးရကို သူ့ရဲ့နိုင်ငံခြားရေးမူဝါဒကို ပြုပြင်ပြောင်းလဲဖို့ တောင်းဆိုခဲ့ပါတယ်။

“ရုရှားနဲ့ စီးပွားရေးစစ်ပွဲကို ဆင်နွှဲခဲ့ပေမယ့် ရုရှားနဲ့ ယူကရိန်းကြားက ပဋိပက္ခကို မရပ်တန့်ခဲ့သလို ရုရှားကို ထိခိုက်မှုလည်း မရှိခဲ့ဘဲ သန်းနဲ့ချီတဲ့ ဂျာမန်တွေကို ထိခိုက်ခဲ့တယ်” လို့ ဂျာမန် ပါလီမန်အမတ် Sevim Dagdelen က ပြောပါတယ်။

အခု ဂျာမနီနဲ့ EU တို့ဟာ သဘာဝဓာတ်ငွေ့ ပြတ်လပ်နေတာကြောင့် Nord Stream-2 ပရောဂျက်ကို စတင်သင့်ပြီး ပဋိပက္ခအတွက် အဖြေရှာဖို့ ရုရှားနဲ့ တွေ့ဆုံဆွေးနွေးတာ ပိုကောင်းမှာ ဖြစ်ကြောင်းနဲ့ အခု ဂျာမနီက ရုရှားနဲ့ တရားဝင် တွေ့ဆုံဆွေးနွေးမှု လုံးဝမရှိသေးတာဟာ အမှားကြီးတခု ဖြစ်ကြောင်း ဆန္ဒပြသူတဦးက ပြောပါတယ်။

တခြားသူတွေကလည်း ဈေးနှုန်း ၃ ဆ ၄ ဆ တိုးလာတဲ့ သူတို့ရဲ့ ဓာတ်အားခ ငွေတောင်းခံလွှာတွေကို ပေးဆောင်ဖို့ကို စိုးရိမ်နေကြတဲ့ ပြည်သူအများစုရဲ့ ကြောက်ရွံ့မှုကို မီးမောင်းထိုးပြခဲ့ကြပြီး ပြန့်ပွားလာနေတဲ့ အကျပ်အတည်းကို သက်သာစေဖို့အတွက် အစိုးရက စစ်မှန်တဲ့ မူဝါဒချမှတ်ပြီး အရေးယူ ဆောင်ရွက်ဖို့ တောင်းဆိုခဲ့ကြပါတယ်။

ဥရောပဟာ ရုရှားအပေါ် အမေရိကန် ဦးဆောင်တဲ့ ပိတ်ဆို့အရေးယူမှုတွေကြောင့် ဒုက္ခရောက်နေရတာကြောင့် စွမ်းအင်ဈေးနှုန်းတွေ မြင့်တက်နေမှုကို တည်ငြိမ်စေဖို့ လိုအပ်ချက်အပေါ် ပြည်သူတွေရဲ့ စိုးရိမ်ပူပန်မှု ကြီးထွားလာချိန်မှာ ဆန္ဒပြမှု ပေါ်ပေါက်လာတာပါ။ 

စွမ်းအင်စျေးနှုန်းတွေဟာ သြဂုတ်လမှာ ၃၅ ဒသမ ၆ ရာခိုင်နှုန်းအထိ မြင့်တက်လာခဲ့ပြီး ဂျာမနီနိုင်ငံရဲ့ ငွေကြေးဖောင်းပွမှုနှုန်း မြင့်မားမှုနောက်ကွယ်က အကြီးမားဆုံး အကြောင်းအရင်း ဖြစ်ပါတယ်။

ထိုင်းနိုင်ငံမှာ လောင်စာဆီဈေးနှုန်းကြီးမြင့်နေတဲ့ပြဿနာကို အစိုးရအနေနဲ့ ကူညီဖြေရှင်းပေးဖို့  ဘန်ကောက်မြို့မှာ  ရှပ်နီအဖွဲ့က ဦးဆောင်ဆန္ဒပြနေပါတယ်။

“တိုင်းပြည်ကိုဦးစားပေးပါ”လို့ အမည်ပေးထားတဲ့ အဆိုပါဆန္ဒထုတ်ဖော်ပွဲကို  ဘန်ကောက်မြို့၊ ဆောဝ်ချင့်ချားနယ်မြေ၊ ဒင်းဆော်လမ်းရှိကွင်းပြင်မှာ ပြည်သူ့ဟစ်တိုင်နေရာမှာ ဇူလိုင် ၃ ရက် ညနေက စတင်တဲ့ဆန္ဒပြပွဲကို  ရှပ်နီအဖွဲ့က နိုင်းကျဒူးဖွဏ်းနဲ့ ရှေ့နေနုတ်ခေါင်တို့က ဦးဆောင် ပြုလုပ်ခဲ့တာပါ။

ဒီဆန္ဒထုတ်ဖော်မှုဟာ အာဏာရှိသူ ၊ လုပ်ငန်းရှင်စတဲ့ လူတွေအပေါ်မူတည်တာ မဟုတ်ဘဲ ပြဿနာရင်ဆိုင်နေရတဲ့ ပြည်သူတိုင်းနဲ့ သက်ဆိုင်ကြောင်း၊ အရင်ကတော့ မိမိအားပေးတဲ့ အဖွဲ့အစည်းကိုလည်းကောင်း လူပုဂ္ဂိုလ်ကိုလည်းကောင်း မျက်နှာမူပြီးဘက်လိုက်ဆန္ဒပြတာကြောင့် ပြည်သူချင်းချင်းလည်း ဟိုဘက်လူဒီဘက်လူနဲ့ အကွဲကွဲအပြားပြားဖြစ်ခဲ့ကြောင်း၊ ဒီကနေ့ကစတဲ့ ဆန္ဒထုတ်ဖော်မှုမှာတော့ ပြည်သူအချင်းချင်းစည်းလုံးညီညွတ်ပြီး ပြည်သူ့ပြဿနာတွေ ဝိုင်းဝန်းဖြေရှင်းဖို့ဖြစ်တယ်လို့ ဆိုပါတယ်။

ထိုင်းမှာ လောင်စာဆီဈေးတက်ရာက ကုန်ဈေးနှုန်းတွေပါလိုက်တက်လာပြီး ဒီဒဏ်ကို ပြည်သူတွေခံနေရကြောင်း၊ ကမ္ဘာမှာဆီဈေးတက်လို့ နိုင်ငံခြားကနေ ဆီဈေးကြီး ပေးပြီး မှာယူတင်သွင်းရတာမှန်ပေမယ့် ဘယ်လောက်နဲ့ဝယ်ပြီးဘယ်လောက်နဲ့ ပြန်ရောင်းတယ်ဆိုတာ ပြည်သူကို ပွင့်လင်းမြင်သာချပြဖို့ လိုအပ်ကြောင်း၊ စီးပွါးရေးလုပ်ငန်းရှင်တွေအနေနဲ့ ဒါကိုအခွင့် ကောင်းယူပြီး ဈေးကိုပိုမြှင့်တာတွေမလုပ်သင့်ကြောင်း၊ အစိုးရအနေနဲ့လည်း လုပ်ငန်းရှင်တွေကို ဦးစားမပေးဘဲ  ပြည်သူတွေကို ဦးစားပေးဖို့ ဆန္ဒပြသူတွေက စင်မြင့်ပေါ်မှာ ဆွေးနွေးဖလှယ်ကြပါတယ်။

လောင်စာဆီနဲ့ ပတ်သက်တဲ့ဆန္ဒထုတ်ဖော်နေတုန်းမှာဘဲ နာ့်သ်ဆင်ပတိဝပ်အဖွဲ့ကလည်း ပုဒ်မ ၁၁၂ အရ ဖမ်းဆီးထားတဲ့လူတွေ ပြန်လွှတ်ပေးပါ ဆိုတဲ့ဆိုင်းဘုတ်တွေ ကိုင်ဆောင်ပြီး လာရောက်ပူးပေါင်း ဆန္ဒထုတ်ဖော်ကြပါတယ်။

အခုလို ပူးပေါင်းလာတဲ့အပေါ် လောင်စာဆီဆန္ဒပြတဲ့ခေါင်းဆောင်တွေက ခေါင်းစဉ်လာမရောသင့်ဘူးလို့ ပြောဆိုခဲ့ပေမဲ့ နာ့သ်သဆင်အဖွဲ့ကလည်း ပုဒ်မ ၁၁၂ အရေးဟာလည်း ပြည်သူ့အရေးကိစ္စဖြစ်ပဲလို့ အခြေအတင် ပြန်ပြောကြားခဲ့ပါတယ်။ 

လုံခြုံရေးတပ်ဖွဲ့ဝင်တွေ ရောက်ရှိလာပြီး ဒီနေရာဟာ ပြည်သူ့ဟစ်တိုင်လို့ဆိုပေမဲ့ ဘယ်အဖွဲ့မဆို  ဆန္ဒထုတ်ဖော်လိုပါက အရင်ဆုံးခွင့်ပြုချက်တောင်းရမှာဖြစ်တယ်လို့ ပြောတာကြောင့် ပုဒ်မ ၁၁၂ အဖွဲ့က ပြန်ရုပ်သိမ်းသွားကြပါတယ်။ 

ကိုးကား - https://www.voicetv.co.th