ကမ္ဘာ့အကြီးမားဆုံးပီဇာကြီးကို အမေရိကန်နိုင်ငံ လော့စ်အိန်ဂျလိစ်မြို့မှာ ဇန်နဝါရီ ၁၈ ရက်က စတင်ဖန်တီးနေပါတယ်။

အခုပြုလုပ်နေတဲ့  ပီဇာမျက်နှာပြင် အကျယ်အဝန်းဟာ စတုရန်းပေပေါင်း ၁၄,၀၀၀ ကျော် ရှိမှာဖြစ်ပြီး ဒီဧရာမပီဇာချပ်ကြီး ပြုလုပ်ပြီးစီးသွားတဲ့အခါမှာလည်း အချပ်ရေ ၆၈,၀၀၀ အထိ စိတ်ပိုင်းမှာဖြစ်တယ်လို့ ပီဇာဟတ်ကုမ္ပဏီရဲ့ ဥက္ကဋ္ဌ ဒေးဗစ်ဂရေ့ဗ်က ပြောပါတယ်။

“ကမ္ဘာ့အကြီးမားဆုံးပီဇာအဖြစ် ကမ္ဘာ့စံချိန်ချိုးနိုင်ဖို့အတွက် လော့စ်အိန်ဂျလိစ် ကွန်ဗင်းရှင်းစင်တာကို ရောက်ရှိနေတာပါ။ ဒီလို အလွန်ကြီးမားတဲ့ ပီဇာကြီးကို ပြုလုပ်ပြီးစီးနိုင်ဖို့အတွက် လူဒါဇင်ပေါင်းများစွာက အလုပ်လုပ်နေကြပါတယ်”လို့ ဂရေ့ဗ်က ပြောပါတယ်။

ဒီဧရာမပီဇာကြီးကို လုပ်ဖို့အတွက် ထောင့်မှန်စတုဂံပုံစံ နယ်ထားတဲ့ ဂျုံအစိမ်းချပ်တွေကို ပီဇာရဲ့အောက်ခြေပုံစံအတိုင်း စီရီထားပြီးနောက် ချိစ်နဲ့ အသားပြားတွေ မထည့်ခင် ဂျုံအစိမ်းချပ်တွေပေါ်မှာ ဆော့စ်ကို အရင်သုတ်လိမ်းနေကြတာပါ။

အဲ့ဒီအဆင့်တွေပြီးမှ ပီဇာဖုတ်ဖို့အတွက် ချက်ပြုတ်ရေးကိရိယာတခုကို အပေါ်ကနေ ချိတ်ဆွဲထားမယ်လို့ သိရပါတယ်။

ဒီပီဇာချပ်ကြီးထဲမှာ စုစုပေါင်း ပါဝင်ပစ္စည်းအဖြစ် ဂျုံအစိမ်းပေါင်း အလေးချိန် ပေါင် ၁၃,၀၀၀ ကျော်၊ ပီဇာဆော့စ်ပေါင် ၅,၀၀၀ နီးပါးနဲ့ ဒိန်ခဲ အလေးချိန် ပေါင် ၈,၈၀၀ ကျော်နဲ့အတူ အကြမ်းဖျင်းအားဖြင့် ပုံမှန်အတိုင်း အဝိုင်းလိုက်လှီးဖြတ်ထားတဲ့ အသားပြားအချပ်ရေ  ၆၃၀,၀၀၀ ကျော် ပါဝင်မယ်လို့ ဆိုပါတယ်။

ဒီဧရာမပီဇာကြီး ပြုလုပ်ပြီးစီးသွားတဲ့အခါ အကြီးမားဆုံးစံချိန်ကို ဂရင်းနစ်စံတော်ချိန် ချိုးဖျက်နိုင်ဖို့ မျှော်လင့်ထားကြတာပါ။

ကမ္ဘာ့အကြီးမားဆုံး ဒီပီဇာချပ်ကြီးကို ချက်ပြုတ်လှီးဖြတ်ပြီးတာနဲ့ တပြိုင်နက် ဒေသတွင်းမှာ ရှိတဲ့ အစားအသောက်စုဆောင်းရာနေရာတွေနဲ့ ပရဟိတအဖွဲ့တွေဆီ လှူဒါန်းသွားမယ်လို့လည်း ဂရေ့ဗ်က အတည်ပြု ပြောကြားပါတယ်။

ဒါရိုက်တာ ကိုပေါက်ရိုက်ကူးတဲ့ “မသောက်မိသော မိုးခါးရေ” ရုပ်ရှင်အထူးပွဲကို အမေရိကန်နိုင်ငံ လော့စ်အိန်ဂျလိစ်မြို့ Baldwin Park Performing Arts  စင်တာမှာ အောက်တိုဘာလ ၃၀ ရက်က ပွဲစဥ် ၂ ပွဲ ရုံပြည့် ပြသခဲ့ပြီး ရန်ပုံငွေ ဒေါ်လာ ၄၀၀၀၀ ကျော်ရရှိခဲ့တယ်လို့ ပွဲစီစဉ်သူထံက သိရပါတယ်။

ဒီရုပ်ရှင်ပြပွဲမှာ အထူးအစီအစဉ်အနေနဲ့ မော်တော်ကားမဲဖောက်တာကို ပွဲစဥ် ၂ ပွဲကြားမှာ တိုက်ရိုက်ထုတ်လွှင့်ပြသခဲ့တယ်လို့လည်း ပွဲစီစဉ်သူတွေက ပြောပါတယ်။

ရုပ်ရှင်ပွဲကို အယ်လ်အေမြို့အနီးတ၀ိုက်က မြန်မာပြည်ဖွားတိုင်းရင်းသားမိသားစုတွေ ၆၀၀ ကျော်အပြင် အမေရိကန်မိတ်ဆွေတွေလည်း လာရောက်အားပေးခဲ့တာပါ။

ဒီပွဲမှာရန်ပုံငွေစျေးရောင်းပွဲကိုလည်း ပြုလုပ်ခဲ့ကာ ရရှိလာတဲ့ ရန်ပုံငွေတွေကို မြန်မာနိုင်ငံအနှံ့ အရေးပေါ် လိုအပ်နေတဲ့ မြို့ရွာတွေနဲ့ PDF တပ်ဖွဲ့တွေကို အမြန်ဆုံး‌ ပေးအပ်လှူဒါန်းသွားမယ်လို့ ပွဲစီစဉ်သူတွေကဆိုပါတယ်။

မသောက်မိသော မိုးခါးရေ ရုပ်ရှင်ဇာတ်လမ်းတိုကို ဒါရိုက်တာ ကိုပေါက်က တောတွင်း တနေရာမှာ iphone 11 ကင်မရာနဲ့  ရိုက်ကူးခဲ့ပြီး CDM စစ်ဗိုလ်တစ်ဦးရဲ့ ဖြစ်ရပ်မှန်ကို အခြေခံ ရိုက်ကူးထားတာ ဖြစ်ပါတယ်။

မသောက်မိသော မိုးခါးရေ ရုပ်ရှင်ကို လတ်တလောမှာ အမေရိကား၊ လန်ဒန်၊ ဂျပန်၊ ကိုရီးယား၊ မလေးရှား၊ သြစတြေးလျနဲ့ နိုင်ငံတကာမြို့ကြီးတွေမှာ လှည့်လည်ပြသနေတာ ပရိသတ်အားပေးအောင်မြင်မှုများ ရရှိနေပါတယ်။