မကြာသေးမီက အစိုးရဆန့်ကျင်ရေး ဆန္ဒပြပွဲတွေမှာ အဖမ်းခံထားရသူတချို့ အပါအဝင် အကျဉ်းသား ထောင်ပေါင်းများစွာကို အီရန် ထိပ်တန်းခေါင်းဆောင်က လွတ်ငြိမ်းချမ်းသာ ခွင့်ပေးလိုက်ပြီလို့ နိုင်ငံပိုင်မီဒီယာက ဖေဖော်ဝါရီ ၅ ရက်မှာ ဖော်ပြခဲ့ပါတယ်။

ဒါပေမဲ့ အီရန်ဘာသာရေးခေါင်းဆောင် အယာတိုလာအလီခါမေးနီက အတည်ပြုခဲ့တဲ့ လွတ်ငြိမ်းချမ်းသာခွင့်ဟာ အီရန်မှာ ထိန်းသိမ်းထားတဲ့ နိုင်ငံသား ၂ မျိုး ခံယူထားသူတွေနဲ့ မသက်ဆိုင်ဘူးလို့လည်း ပြောပါတယ်။

အကျင့်ပျက်ခြစားမှုနဲ့ စွပ်စွဲထားတဲ့ ဆန္ဒပြသူတချို့ကို ခွင့်လွှတ်မှာ မဟုတ်ဘဲ သူတို့ထဲက ၄ ယောက်ကို သေဒဏ်ပေးပြီးပြီလို့ အီရန်တရားရေးဌာနကို ကိုးကားပြီး နိုင်ငံပိုင် သတင်း အေဂျင်စီ IRNA က ပြောပါတယ်။ 

“နိုင်ငံခြားအေဂျင်စီတွေအတွက် သူလျှိုလုပ်ခြင်း” ဒါမှမဟုတ် “အစ္စလာမ္မစ်သမ္မတနိုင်ငံအပေါ် ရန်လိုတဲ့ အုပ်စုတွေနဲ့ ဆက်နွှယ်မှု”နဲ့ တရားစွဲဆိုခံရသူတွေနဲ့လည်း ဒီလွတ်ငြိမ်း ချမ်းသာခွင့်က သက်ဆိုင်မှာ မဟုတ်ဘူးလို့လည်း နိုင်ငံပိုင်မီဒီယာက ဖော်ပြခဲ့ပါတယ်။  

ခါမေနီဆီ လွတ်ငြိမ်းချမ်းသာခွင့် တောင်းခံတဲ့ စာတစ်စောင်ထဲမှာ တရားရေးဌာန အကြီးအကဲ ဂိုလမ်ဟူစိန် မိုဆီနီ အီးဂျေးက “မကြာသေးမီက အဖြစ်အပျက်တွေအတွင်း လူအများအပြား အထူးသဖြင့် လူငယ်တွေဟာ ရန်သူ လှုံ့ဆော်မှုနဲ့ ဝါဒဖြန့်မှုကြောင့် မှားယွင်းတဲ့ လုပ်ရပ်တွေနဲ့ ရာဇ၀တ်မှုတွေကို ကျူးလွန်ခဲ့ကြတယ်လို့ ရေးထားပါတယ်။

ကြိုးမိန့် သေဒဏ်စီရင်ချိန်က စပြီး ဆန္ဒပြမှုများ သိသိသာသာ နှေးကွေးလာခဲ့ပါတယ်။

၇၅  နှစ်မြောက် စိန်ရတု လွတ်လပ်ရေးနေ့အထိမ်းအမှတ်အဖြစ်  နိုင်ငံတဝန်း အကျဉ်းထောင်တွေရှိ အကျဉ်းသား ပေါင်း ၇၀၁၂ ဦးကို ပြစ်ဒဏ်လွတ်ငြိမ်းခွင့် ပေးလိုက်တယ်လို့ စစ်ကောင်စီ အတွင်းရေးမှူး ဒုဗိုလ်ချုပ်ကြီး အောင်လင်းဒွေးက ဇန်နဝါရီ ၄ ရက်  နေ့စွဲနဲ့ ထုတ်ပြန်ပါတယ်။

လွတ်လပ်ရေးအထိမ်းအမှတ်အဖြစ်လည်းကောင်း၊ ပြည်သူလူထုနှလုံးစိတ်ဝမ်း အေးချမ်းစေဖို့နဲ့ လူမှုရေးအရ ငဲ့ညှာထောက်ထားတဲ့ အနေနဲ့လည်းကောင်း၊ နိုင်ငံတော်ရဲ့ မေတ္တာနဲ့ စေတနာကို နားလည်စေဖို့ ရှေးရှုတဲ့အနေနနဲလည်းကောင်း အကျဉ်းထောင်၊ အချုပ်ထောင်နဲ့ စခန်းအသီးသီးမှာ ပြစ်ဒဏ်ကျခံနေရတဲ့ အကျဉ်းသား အကျဉ်းသူ ပေါင်း  ၇၀၁၂ ဦးကို စစ်ကောင်စီ ခေါင်းဆောင်က ပြစ်ဒဏ်လျှော့ပေါ့ လွတ်ငြိမ်းခွင့် ပြုလိုက်တာလို့ ဆိုပါတယ်။

ဒါပေမဲ့ ရာဇဝတ်ကျင့်ထုံး ဥပဒေပုဒ်မ ၄၀၁ ပုဒ်မခွဲ ၁ အရ နောက်တကြိမ် ပြစ်မှုထပ်မံကျူးလွန်ပါက ဒီပြစ်ဒဏ်အပြင် အခု ကျခံဖို့နဲ့ ကျန်တဲ့ ပြစ်ဒဏ်တွေကိုပါ ဆက်လက်ကျခံဖို့ဆိုတဲ့ စည်းကမ်းသတ်မှတ်ချက်နဲ့ လွတ်ငြိမ်းခွင့်ပြုတာလို့လည်း  ထုတ်ပြန်ချက်မှာဖော်ပြပါတယ်။

ဒါ့အပြင်  လူသတ်မှု၊ မုဒိမ်းမှု၊ မတရားအသင်းဆက်သွယ်မှု၊ အကြမ်းဖက်မှု၊ အဂတိမှု စတဲ့ အမှုတွေကလွဲပြီး ကျန်တဲ့ ပြစ်မှုတွေနဲ့ ကျခံနေရသူတွေကိုလည်း ပြစ်ဒဏ်ရဲ့ ၆ ပုံ ၁ ပုံ သက်သာခွင့် ပြုလိုက်တယ်လို့ သီးခြားထုတ်ပြန်ထားပါတယ်။

အင်းစိန်ထောင်ကနေ ဒီကမွန်းလွဲပိုင်း ပြန်လည် လွတ်မြောက်လာတဲ့နိုင်ငံရေး အကျဉ်းသားတွေထဲမှာ ရန်ကုန်မြို့တော် စည်ပင်သာယာရေးကော်မတီဝင် စာရေးဆရာမ ဒေါ်သန်းမြင့်အောင်၊ စာရေးဆရာ ထင်လင်းဦးနဲ့ ရန်ကုန်တက္ကသိုလ်၊ အရှေ့တိုင်းပညာဌာန ပါမောက္ခ ဆရာ​ ဒေါက်တာအာကာမိုးသူတို့ပါဝင်ပါတယ်။ 

သာသနာရေးနဲ့ ယဉ်ကျေးမှုဝန်ကြီး သူရဦးအောင်ကိုကတော့ မနေ့ည ၇ နာရီလောက်ကတည်းက လွှတ်ပေးလိုက်တယ်လို့ အကျဉ်းဦးစီးဌာနနဲ့ နီးစပ်တဲ့ ရှေ့နေတယောက်ကပြောပါတယ်။ 

စစ်တပ်က အာဏာသိမ်းပြီးနောက် သမ္မတ၊ နိုင်ငံတော်အတိုင်ပင်ခံပုဂ္ဂိုလ်၊ အစိုးရအဖွဲ့ဝင်တွေ၊ ဝန်ကြီးတွေ၊ လွှတ်တော်အမတ်တွေ၊ အန်အယ်လ်ဒီပါတီဝင်တွေ၊ အနုပညာရှင်တွေ၊ တက်ကြွလှုပ်ရှားသူတွေ၊ သတင်းသမားတွေ စတဲ့ စစ်အာဏာရှင်ဆန့်ကျင်တဲ့ အင်အားစုတွေများစွာဟာ ဖမ်းဆီးတရားစွဲဆို ပြစ်ဒဏ်တွေ ချမှတ်ခံခဲ့ရပါတယ်။

ဝန်ကြီး သူရဦးအောင်ကို အဂတိလိုက်စားမှုစွဲချက်နဲ့ ပြီးခဲ့တဲ့နှစ်ဆန်းပိုင်းမှာ စစ်ကောင်စီက ထောင်ဒဏ် ၁၂ နှစ် ချမှတ်ခဲ့ပြီး ပရဟိတကူညီလုပ်ဆောင်မှုတွေနဲ့ လူသိများတဲ့ စာရေးဆရာမ ဒေါ်သန်းမြင့်အောင်ကိုလည်း ပုဒ်မ ၅၀၅-က နဲ့ ၂ဝ၂၁ ခုနှစ် အကုန်ပိုင်းမှာ အလုပ်ကြမ်းနဲ့ ထောင်ဒဏ် ၃ နှစ် ချခဲ့တာဖြစ်ပါတယ်။

ဒီနေ့ ဇန်နဝါရီ ၄ ရက်မှာ ကျရောက်တဲ့ ၇၅ နှစ်မြောက် စိန်ရတု လွတ်လပ်ရေးနေ့မှာ အကျဉ်းသားတွေ ပြန်လွှတ်မယ်ဆိုတဲ့ သတင်းကြောင့် ရန်ကုန်မြို့၊ အင်းစိန်ထောင် အပါအဝင် အကျဉ်းထောင်တွေမှာ မိသားစုဝင်တွေ လာရောက်စောင့်ဆိုင်းနေကြပါတယ်။

ပြီးခဲ့တဲ့ ၂၀၂၂ ခုနှစ် နိုဝင်ဘာလကလည်း နိုင်ငံတဝန်းက အကျဉ်းသား အကျဉ်းသူ ၅,၇၀၀ ကျော်ကို ပြန်လွှတ်ခဲ့ပေမဲ့ နိုင်ငံရေးအကျဉ်းသား အနည်းငယ်ပဲ ပါဝင်ခဲ့ပါတယ်။

လွတ်လပ်ရေးနေ့မှာ အကျဉ်းသားလွှတ်မယ်ဆိုတဲ့ သတင်းကြောင့် လာရောက် စောင့်ဆိုင်းသူတွေဟာ ရန်ကုန်မြို့တွင်းကအပြင် ရန်ကုန်မြို့ အနီးဝန်းကျင် မြို့တွေကပါ ကားစီးလုံးငှားပြီး ဒီနေ့မနက်ပိုင်းကတည်းက လာရောက် စောင့်ဆိုင်းနေကြတာလည်း ဖြစ်ပါတယ်။