တရုတ်နဲ့ ရုရှားနိုင်ငံတို့အကြား ဆက်ဆံရေးဟာ အပြန်အလှန် ဆက်ဆံရေး နယ်ပယ်ကို အများကြီးကျော်လွန်ပြီး ကမ္ဘာလုံးဆိုင်ရာ အခင်းအကျင်းနဲ့ အနာဂတ် လူ့အဖွဲ့အစည်းအတွက် အရေးပါတဲ့အဆင့်ကို ရောက်နေပြီလို့ တရုတ် သမ္မတ ရှီကျင့်ဖျင်က ပြောလိုက်ပါတယ်။ 

ရုရှားမြို့တော် မော်စကိုရှိ  ကရင်မလင် နန်းတော်မှာ မတ် ၂၁ ရက်က သမ္မတ ဗလာဒီမီယာ ပူတင်နဲ့ ဆွေးနွေးပွဲတွေ ကျင်းပအပြီး ပူးတွဲသတင်းစာ ရှင်းလင်းပွဲမှာ ခုလိုပြောလိုက်တာပါ။ 

လွန်ခဲ့တဲ့ ဆယ်နှစ်အတွင်း ရှီနဲ့ ပူတင်ဟာ နီးကပ်တဲ့ ဆက်ဆံရေးကို တွန်းအားပေးခဲ့ပြီး နှစ်နိုင်ငံကြား ဗျူဟာမြောက် ညှိုနှိုင်းဆောင်ရွက်ရေးကနေ အသီးအပွင့် ရလဒ်တွေကို ဆောင်ကြဉ်းနိုင်ခဲ့တယ်လို့ ရှီကျင့်ဖျင်က ပြောပါတယ်။

တရုတ်နဲ့ ရုရှားတို့ဟာ နယ်ပယ်အမျိုးမျိုးမှာ အဆင့်မြင့် ဖလှယ်မှုတွေနဲ့ ပူးပေါင်းဆောင်ရွက်မှုတွေ အတွင်း အိမ်နီးချင်းကောင်း၊ မိတ်ဆွေနဲ့ အားလုံး အနိုင်ရတဲ့ ပူးပေါင်းဆောင်ရွက်မှု စည်းမျဉ်းတွေကို လိုက်နာခဲ့ကြပါတယ်။ 

သမိုင်းအခြေအနေသစ် အောက်မှာ ကျယ်ပြန့်တဲ့ အမြင်၊ ရေရှည် ရှုထောင့်တွေနဲ့ ရှုမြင်ပြီး  တရုတ်နဲ့ ရုရှားတို့ဟာ လူသားထု တိုးတက်ရေး အကြီးအကျယ် ပံ့ပိုးကူညီဖို့ ကြိုးပမ်းသွားမယ်လို့ ရှီက ပြောခဲ့ပါတယ်။

တရုတ်သမ္မတ ရှီကျင့်ဖျင်ဟာ အောက်တိုဘာ ၂၃ ရက်မှာ ကျင်းပတဲ့ တရုတ်ကွန်မြူနစ်ပါတီရဲ့ အကြိမ်  ၂၀ မြောက် ဗဟိုကော်မတီ ပထမအကြိမ် မျက်နှာစုံညီ အစည်းအဝေးမှာ အထွေထွေအတွင်းရေးမှူးအဖြစ် ရွေးကောက် တင်မြှောက်ခံရပါတယ်။ 

သမ္မတရှီက သဘာပတိအဖြစ် ကျင်းပတဲ့ ဒီအစည်းအဝေးမှာ တရုတ်ကွန်မြူနစ်ပါတီ ဗဟိုကော်မတီဝင် ၂၀၃ ယောက်နဲ့ တခြားအဖွဲ့ဝင် ၁၆၈ ယောက် တက်ရောက်ခဲ့တာာဖြစ်ပြီး အစည်းအဝေးမှာ ရှီက CPC ဗဟိုစစ်ကော်မရှင် ဥက္ကဋ္ဌအဖြစ်လည်း ခန့်အပ်ခံရပါတယ်။

အစည်းအဝေးမှာ ရွေးချယ်တင်မြှောက်ခံရတဲ့ CPC ဗဟိုကော်မတီ နိုင်ငံရေးဗျူရို အမြဲတမ်း ကော်မတီအဖွဲ့ဝင်တွေကတော့ ရှီကျင့်ဖျင်၊ လီချန်း၊ ကျောက်လဲ့ကျိ၊ ဝမ်ဟူနင်၊ လီကျိ၊ စိုက်ချီ၊ တင်းရွှေရှန်းတို့ ဖြစ်ပါတယ်။ 

တရုတ်ကွန်မြူနစ်ပါတီ ဗဟိုကော်မတီရဲ့ နိုင်ငံရေးဗျူရို အမြဲတမ်းကော်မတီကနေ အမည်စာရင်း တင်သွင်းထားတဲ့ CPC ဗဟိုကော်မတီအတွင်းရေးမှူး အဖွဲ့ဝင်တွေကို အစည်းအဝေးထဲမှာ CPC ဗဟိုကော်မတီ၊ နိုင်ငံရေးဗျူရိုအဖွဲ့ဝင်တွေအဖြစ်လည်း ရွေးချယ်တင်မြှောက်ခဲ့ပါတယ်။

အစည်းအဝေးထဲမှာ ဗဟိုစစ်ကော်မရှင်အဖွဲ့ဝင်တွေကိုလည်း အမည်ပေးခဲ့ပါတယ်။ ပထမအကြိမ် စုံညီအစည်းအဝေးမှာ ရွေးကောက်တင်မြှောက်ခံရတဲ့ ဗဟိုကော်မရှင်ရဲ့ စည်းကမ်းစစ်ဆေးရေး ကော်မရှင် (CCDI) ရဲ့ အမြဲတမ်း ကော်မတီဝင်တွေ၊ အတွင်းရေးမှူးတွေ၊ လက်ထောက်အတွင်းဝန်တွေနဲ့ အဖွဲ့ဝင်တွေကို အစည်းအဝေးက အတည်ပြုခဲ့ပါတယ်။