မွန်ပြည်နယ် သံဖြူဇရပ်မြို့ကနေ ရေးမြို့ကို နိုဝင်ဘာ ၁၁ ရက် မနက် ၇ နာရီ ၁၀ မိနစ်လောက်မှာ စစ်ကောင်စီတပ်က အရပ်သားကား ၃ စီးနဲ့ ဆန်တွေ တင်ဆောင်ပြီး ဖြတ်သန်းသွားနေစဥ် အေးကမ္ဘာရွာနဲ့ ဘေးလမိုင်းရွာကြားမှာ ချုံခိုတိုက်ခိုက်ခဲ့ရာ စစ်ကောင်စီတပ်ဖွဲ့ဝင်တဦးသေဆုံးပြီး နှစ်ဦးဒဏ်ရာရခဲ့တယ်လို့ တောင်ညိုပြည်သူ့ပြောက်ကျားတပ်ဖွဲ့က ထုတ်ပြန်ပါတယ်။
အလားတူ နိုဝင်ဘာ ၁၀ ရက် ည ၁၀ နာရီခွဲလောက်ကလည်း စစ်ကောင်စီတပ်ဖွဲ့ဝင်တွေ သံဖြူ ဇရပ်ဘက်ကနေ ရေးမြို့ဘက်ကို အရပ်သားကား ၄ စီးနဲ့သွားနေတုန်း လိမ္မော်ခြံရွာနဲ့ အောင်သပြေ ရွာကြားမှာ တောင်ညိုပြည်သူ့ပြောက်ကျားတပ်ဖွဲ့က မိုင်းဆွဲတိုက်ခိုက်ခဲ့ပေမဲ့ စစ်ကောင်စီဘက်က ထိခိုက်တာမရှိဘူးလို့ ထုတ်ပြန်ချက်မှာ ဖော်ပြထားပါတယ်။
အဆိုပါ ရေး-သံဖြူဇရပ် ကားလမ်းပိုင်းမှာ စစ်ကောင်စီတပ်ဖွဲ့ဝင်တွေ မကြာခဏ အလစ်အငိုက် ချုံခိုတိုက်ခိုက်ခံရလေ့ရှိပြီး စစ်ကောင်စီတပ်ဘက်ကလည်း အထိအခိုက် အကျအဆုံးတွေ များပြားခဲ့ပါတယ်။
ရေး-သံဖြူဇရပ်ကားလမ်းမှာ စစ်ကောင်စီတပ်ကို ဒေသကာကွယ်ရေးတပ်တွေ တိုက်ခိုက်လေ့ရှိ တာကြောင့် ပတ်ဝန်းကျင်က ကျေးရွာနေပြည်သူတွေဟာ စစ်ကောင်စီတပ်ရဲ့ ခြိမ်းခြောက်တာတွေ ခံနေရတယ်လို့ ဒေသခံတွေက ဆိုပါတယ်။
နိုဝင်ဘာ ၁၀ ရက်ညကလည်း တနင်္သာရီတိုင်း ပုလောမြို့နယ်၊ ထမင်းမစားရွာနားမှာ ပုလောဘက်ကလာတဲ့ စစ်ကောင်စီယာဉ်တန်းကို ဒေသခံပြည်သူ့ကာကွယ်ရေးတပ်တွေက မိုင်းဆွဲ တိုက်ခိုက်ခဲ့တယ်လို့ ပြည်သူ့ကာကွယ်ရေးတပ်ဖွဲ့ တာဝန်ရှိသူက ပြောပါတယ်။
စစ်ကောင်စီယာဉ်တန်းကို မိုင်း ၇ လုံးဆွဲ တိုက်ခိုက်ခဲ့တာဖြစ်ပြီး မိုင်း ၅ လုံးက ချက်ကောင်းထိခဲ့လို့ စစ်ကောင်စီဘက်က ထိခိုက်သေဆုံးမှုတွေရှိတယ်လို့ ဆိုပါတယ်။
အဲဒီတိုက်ခိုက်မှုမှာ စစ်ကောင်စီတပ်ဖွဲ့ဝင် ၈ ယောက်သေဆုံးပြီး ၁၀ ယောက်ကျော် ထိခိုက်ဒဏ်ရာ ရရှိခဲ့တယ်လို့လည်း စစ်ကောင်စီနဲ့နီးစပ်တဲ့ သတင်းရင်းမြစ်တွေအရ သိရပါတယ်။
အခုလို တိုက်ခိုက်ခံရပြီးတဲ့နောက် စစ်ကောင်စီတပ်က အနီးနားပတ်ဝန်းကျင်တွေကို လက်နက်ကြီး လက်နက်ငယ်တွေနဲ့ ပစ်ခတ်ခဲ့ပေမဲ့ ပြည်သူ့ကာကွယ်ရေး တပ်ဖွဲ့ဝင်တွေကတော့ ထိခိုက်မှုမရှိဘဲ ပြန်လည်ဆုတ်ခွာနိုင်ခဲ့တယ်လို့ ပြောပါတယ်။
ဒေသတွင်းပြည်သူ့ကာကွယ်ရေးတပ်ဖွဲ့တွေအနေနဲ့လည်း ဒေသတွင်းတိုက်ပွဲတွေ ဆက်ပြီး ပြင်းထန်လာနိုင်တဲ့အတွက် ပြည်ထောင်စုလမ်းမကြီးတလျှောက်မှာရှိတဲ့ ကျေးရွာတွေအနေနဲ့ စစ်ကောင်စီစစ်ကြောင်းတွေ ဝင်လာရင် ကျေးရွာထဲမှာမနေဘဲ ဘေးလွတ်ရာမှာ နေထိုင်ကြဖို့ သတိပေးထားပါတယ်။
တနင်္သာရီတိုင်း ထားဝယ်ခရိုင်၊ သရက်ချောင်းမြို့နယ် ရငဲရွာနဲ့ ကတွဲရွာကြားမှာလည်း လမ်းကင်းယူဖို့ ရောက်လာတဲ့ စစ်ကောင်စီကား ၃ စီးကို ပြည်သူ့ကာကွယ်ရေး မဟာမိတ် ပူးပေါင်းအဖွဲ့က တိုက်ခိုက်ခဲ့တယ်လို့ သရက်ချောင်းမြို့နယ်ပြည်သူ့ကာကွယ်ရေးအဖွဲ့-ပကဖက နိုဝင်ဘာ ၁၁ ရက်မှာ ထုတ်ပြန်ပါတယ်။
နိုဝင်ဘာ ၁၁ ရက် မနက် ၆ နာရီလောက်က နှစ်ဖက်အပြန်အလှန်ပစ်ခတ်မှုဖြစ်ကာ စစ်ကားတစီးပျက်စီးပြီး စစ်ကောင်စီတပ်ဖွဲ့ဝင် အတော်များများ သေဆုံးဒဏ်ရာ ရခဲ့ပေမဲ့ အရေအတွက်အတိအကျကိုတော့ စိစစ်ဆဲဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
ရငဲတိုက်နယ်ဆေးရုံမှာ စစ်ကောင်စီတပ်ဖွဲ့ဝင်တွေ ရောက်ရှိနေကြပြီး ဘယ်သူမှ သွားမကြည့်ရဲတာကြောင့် ဘယ်လောက် သေဆုံး၊ ထိခိုက်ဒဏ်ရာရတယ်ဆိုတာတော့ မသိရဘူးလို့ ဒေသခံတဦးက ဆိုပါတယ်။
ပြည်သူ့ကာကွယ်ရေးမဟာမိတ်အဖွဲ့ဘက်က ထိခိုက်မှုတစုံတရာ မရှိဘဲ အောင်မြင်စွာ ဆုတ်ခွာ နိုင်ခဲ့တယ်လို့ ထုတ်ပြန်ချက်အရ သိရပါတယ်။
အခုလို တိုက်ခိုက်ခံရတာတွေနဲ့ပတ်သက်ပြီး စစ်ကောင်စီဘက်က တစုံတရာ သတင်းထုတ်ပြန် တာ မရှိသေးပါဘူး။
တနင်္သာရီတိုင်း၊ မြိတ်ခရိုင်၊ ပုလောမြို့နယ် ကဒဲရွာနဲ့ သင်္ကန်းတောရွာကြားမှာ စစ်ကောင်စီ ယာဉ်တန်းကို ပြည်သူ့ကာကွယ်ရေးပူးပေါင်းတပ်က ကြားဖြတ် ပစ်ခတ်တိုက်ခိုက်ခဲ့တယ်လို့ Palaw Regional Defense Force (PRDF) က ထုတ်ပြန်ပါတယ်။
စက်တင်ဘာ ၂၇ ရက် ညနေ ၄ နာရီလောက်က ထားဝယ်မြို့ကနေ မြိတ်မြို့ဘက်ကို ဆင်းလာတဲ့ စစ်ကောင်စီယာဉ်တန်းကို Palaw People Defense Force (PPDF) နဲ့ PRDF မဟာမိတ်တပ်ပေါင်းစုတို့ ပူးပေါင်းတိုက်ခိုက်ခဲ့တာပါ။
အဆိုပါ ထားဝယ်မြို့မှထွက်ခွာလာတဲ့ စစ်ကောင်စီ ယာဉ်တန်းဟာ ပုလောမြို့ အခြေစိုက် ခလရ ၂၈၅ တပ်ရင်းကို နေ့လယ် ၁ နာရီလောက်က ရောက်ရှိခဲ့တာဖြစ်ပြီး ၂ နာရီခွဲဝန်းကျင်မှာ မြိတ်ဘက်ကို ဆက်လက်ထွက်ခွာလာစဉ် တိုက်ခိုက်ခဲ့တာလို့ ထုတ်ပြန်ချက် အရ သိရပါတယ်။
ကြားဖြတ်တိုက်ခိုက်ခံရမှုကြောင့် ထိခိုက်ဒဏ်ရာရတဲ့ စစ်ကောင်စီတပ်ဖွဲ့ဝင်တွေကို ပလမြို့မှာ အရေးပေါ်လူနာတင်ယာဉ်လေးစီးနဲ့ လာရောက်တင်ဆောင်သွားတယ်လို့ စုံစမ်းသိရှိရပေမဲ့ သေဆုံးထိခိုက်ဒဏ်ရာရတဲ့ အရေအတွက်ကို မသိရသေးပါဘူး။
အဲဒီတိုက်ခိုက်မှုကို နန်းထိုက်အောင်စစ်ဆင်ရေးရဲ့ တစိတ်တပိုင်းအရ ပုလောဒေသ ကာကွယ်ရေးတပ်ပေါင်းစုက လုပ်ဆောင်ခဲ့တာဖြစ်တယ်လို့ ထုတ်ပြန်ချက်အရ သိရပါတယ်။
တနင်္သာရီတိုင်း၊ ထားဝယ်ခရိုင်၊ သရက်ချောင်းမြို့နယ်၊ အောက်သရက်ချောင်းကျေးရွာမှာလည်း စက်တင်ဘာ ၂၆ ရက် မွန်းလွဲ ၁ နာရီကျော်လောက်မှာ စစ်ကောင်စီယာဉ်တန်းကို ကြားဖြတ်တိုက်ခိုက်ခဲ့တယ်လို့ ကစယ်ဒိုဖက်ဒရယ်စစ်ကြောင်း People’s Defence Force – Federal Column က ထုတ်ပြန်ပါတယ်။
ပုလောမြို့က ထားဝယ်မြို့ဘက်ကို တက်လာတဲ့ စစ်ကောင်စီကား ၃ စီးကို ပြည်သူ့ကာကွယ်ရေးတပ်မတော်၊ ထားဝယ်ခရိုင်တပ်ရင်း (၂)၊ ကစယ်ဒိုကျားတပ်ဖွဲ့၊ ညီနောင်မဟာမိတ်တွေနဲ့ ဖွဲ့စည်းထားတဲ့ ကစယ်ဒိုဖက်ဒရယ်စစ်ကြောင်းတို့က တိုက်ခိုက်ခဲ့တာဖြစ်ပါတယ်။
တိုက်ခိုက်ခံရမှုကြောင့် စစ်ကောင်စီတပ်ဖွဲ့ဝင် ၄ ဦးသေဆုံးပြီး တချို့ဒဏ်ရာရရှိကာ ပြည်သူ့ကာကွယ်ရေးတပ်ဖွဲ့က တစုံတရာထိခိုက်မှုမရှိဘဲ အောင်မြင်စွာ ဆုတ်ခွာနိုင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ရက်ပိုင်းကလည်း ပုလောမြို့နယ်အတွင်း စစ်ကောင်စီယဉ်တန်း နှစ်ကြိမ်တိုက်ခိုက်ခံခဲ့ရတာကြောင့် စစ်ကောင်စီတပ်သား ၁၀ ဦးထက်မနည်း သေဆုံးနိုင်ပြီး ထိခိုက်ဒဏ်ရာရသူများလည်းရှိတယ်လို့ ပုလော ပကဖက ထုတ်ပြန်ထားပါတယ်။
မွန်ပြည်နယ်၊ ရေး-မော်လမြိုင်သွားကားလမ်းရှိ ရေးမြို့နယ်မှာလည်း နှင်းစုံကျေးရွာအနီး ရှိ မိုင်းခွဲခံရတဲ့ ချောင်းကူးတံတားပြုပြင်နေတဲ့ ဆောက်လုပ်ရေးလုပ်သားတွေကို ကင်းစောင့်ပေးနေတဲ့ စစ်ကောင်စီတပ်ဖွဲ့ဝင်တွေကို စက်တင်ဘာ ၂၇ ရက် ညနေ ၅ နာရီလောက်မှာ တိုက်ခိုက်ခဲ့တယ်လို့ YST F ရေးတပ်ဖွဲ့က ပြောပါတယ်။
စစ်ကောင်စီတပ်ကို ကိုက် ၁၅၀ ဝန်းကျင် အကွာအဝေးကနေ သွားရောက်ချုံခိုတိုက်ခိုက်ခဲ့ပြီး စစ်တပ်ဘက်က တောင်ပံဖြန့်ကာ တပ်ဖြန့်ထားတာကြောင့် ထိတွေ့မှု အနည်းငယ် ပြင်းထန်ခဲ့တယ်လို့ ဆိုပါတယ်။
အဆိုပါတိုက်ခိုက်မှုမှာ လက်နက်ငယ်၊ လက်နက်ကြီးတွေနဲ့ မိနစ်အနည်းငယ်ကြာ အပြန်အလှန် ထိတွေ့ တိုက်ပွဲတွေ ဖြစ်ပွားခဲ့ပြီး YST F တပ်ဖွဲ့က အန္တရာယ်ကင်းစွာ ဆုတ်ခွာနိုင်ခဲ့ကာ စစ်ကောင်စီတပ်ဘက်က ထိခိုက်ကျဆုံးမှုကိုတော့ မသိရသေးသလို စစ်ကောင်စီဘက်ကလည်း သတင်းထုတ်ပြန်တာ မရှိသေးပါဘူး။
