မကွေးတိုင်း၊ ထီးလင်းမြို့နယ်၊ သရခါရွာက ဒေသခံ အမျိုးသား ၄ ဦးကို စစ်ကောင်စီတပ်က နိုဝင်ဘာ ၃၀ ရက်မှာ ဖမ်းဆီးခေါ်ဆောင်သွားတယ်လို့ ဒေသခံတွေက ပြောပါတယ်။
ဒေသခံ အမျိုးသား ၃ ဦးဟာ ကျေးရွာကို စစ်ကောင်စီတပ်သားတွေ စစ်ကြောင်းထိုး ဝင်ရောက်စဉ်မှာ ကျေးရွာရဲ့ တောင်ဘက် ဘုန်းကြီးကျောင်းအနီးမှာ ပိတ်မိပြီး ဖမ်းဆီးခံခဲ့ရတာလို့ ဆိုပါတယ်။
အဆိုပါ သရခါကျေးရွာမှာ လူနေအိမ် ၁၃၀ ဝန်းကျင်ရှိပြီး ဒေသခံ ၅၀၀ ဝန်းကျင် နေထိုင်ကြတာ ဖြစ်ပါတယ်။
လက်ရှိစစ်ကြောင်းဟာ ကျေးရွာတွင်းက ထွက်ခွာသွားကာ အောင်မြင်ရွာမှာ တပ်စွဲနေထိုင်နေကြတယ်လို့ သိရပြီး ဒေသခံအမျိုးသား ၄ ဦးကတော့ ရွာထဲကို စစ်ကြောင်းထိုးစဉ် ကျေးရွာအနီးမှာ ဖမ်းဆီးခံလိုက်ရတာလို့ ထီးလင်းနယ်က ဒေသခံတဦးက ဒီဗွီဘီကို ပြောပါတယ်။
“သရခါရွာက ဦးမင်းဇော်၊ ဦးဖိုးအေး၊ ဦးအေးလွင်နဲ့ ဦးသက်နိုင်ထွန်းတို့ ဖမ်းဆီးခံရတာ။ အခုထိ ပြန်မလွတ်သေးဘူး။ မိသားစုဝင်တွေလည်း စိတ်ပူနေကြတယ်။ အရင်လကလည်း ရွာကိုဝင်ပြီး မီးရှို့သွားသေးတယ်။ ဒေသခံတွေတော့ ထုံးစံအတိုင်း ပြေးနေရတာပေါ့ဗျာ။”
အောက်တိုဘာ ၇ ရက်ကလည်း သရခါကျေးရွာက ဒေသခံနေအိမ် ၆ လုံးကို စစ်ကောင်စီတပ်သားတွေက မီးရှို့ဖျက်ဆီးခဲ့ပါသေးတယ်။
ထီးလင်းမြို့နယ်အတွင်းမှာ စစ်ကောင်စီတပ်သားတွေရဲ့ မီးရှို့ဖျက်ဆီးမှုကြောင့် ဒေသခံနေအိမ် ၂၀၀ လောက် မီးလောင်ဆုံးရှုံးထားပြီး စစ်ကောင်စီက ထီးလင်းမြို့နယ်ကို အင်တာနက်လိုင်းတွေ ဖြတ်တောက်ထားတာ ၁ နှစ်ကျော် ကြာမြင့်နေပြီလည်း ဖြစ်ပါတယ်။
မကွေးတိုင်း၊ ပေါက်မြို့နယ်၊ ဒီးဒုတ်ကွင်းကျေးရွာမှာလည်း ကိုသိန်းထွန်း၊ မဌေး၊ မအုံးမြင့်ကြည် (ခေါ်) မိဂျမ်းတို့ ၃ ယောက်ကို နိုဝင်ဘာ ၃၀ ရက်နေ့မှာ ရွာမှာရှိတဲ့ ပျူစောထီးတွေက ဖမ်းဆီးပြီး ရိုက်နှက် နှိပ်စက်နေတယ်လို့ ဒေသခံတယောက်က ဒီဗွီဘီကို ပြောပါတယ်။
“သူတို့ ၃ ယောက်ကို ဘာကြောင့် အခုလို ဖမ်းဆီးနှိပ်စက်တယ်ဆိုတာကို တိတိကျကျ မသိရပေမဲ့ သူတို့ ပျူစောထီးတွေကို မထောက်ခံလို့ နှိပ်စက်တာ ဖြစ်နိုင်တယ်။ တရွာတည်းသားတွေ အချင်းချင်း အခုလို ဖမ်းဆီးနှိပ်စက်တာကတော့ တော်တော် လူမဆန်တဲ့ လုပ်ရပ်ပဲဗျ။ ဒီနေ့ ဒီဇင်ဘာလ ၁ ရက်နေ့အထိ သူတို့ ၃ ယောက်ကို ပြန်မလွှတ်သေးဘဲ ရိုက်နှက်နေကြတာ။”
ပေါက်မြို့နယ် တပ်ကုန်းရွာမှာလည်း ဇူလိုင် ၂၇ ရက်မှာ ပျူစောထီးတွေက NLD ထောက်ခံသူ အယောက် ၂၀ လောက်ကို PDF သတင်းပေးလို့ စွပ်စွဲပြီး ရွာတောင်ဘက်ကို ခေါ်ယူကာ ဝါးဆစ်ပိတ်၊ ဝါရင်းတုတ်တွေနဲ့ ရိုက်နှက်နှိပ်စက်ကြလို့ ဒဏ်ရာတွေရရှိခဲ့တယ်လို့ သိရပါတယ်။
ပေါက်မြို့နယ်မှာ နိုဝင်ဘာ ၁၉ ရက်ကနေ ၂၈ ရက်နေ့အထိ စစ်ကောင်စီတပ်တွေနဲ့ ပျူစောထီးတွေ မီးရှို့ဖျက်ဆီးခဲ့လို့ ကျေးရွာ ၉ ရွာက အိမ်ခြေ ၈၀၀ လောက် မီးလောင်ဆုံးရှုံးပြီး ပြည်သူတွေ အိုးမဲ့အိမ်မဲ့ ဖြစ်ခဲ့ရတယ်လို့ သိရပါတယ်။
မကွေးတိုင်း ထီးလင်းမြို့နယ်၊ သရခါရွာက နေအိမ်တွေကို စစ်ကောင်စီတပ်က အောက်တိုဘာ ၇ ရက် မနက်ပိုင်းမှာ မီးရှို့ဖျက်ဆီးသွားတယ်လို့ ဒေသခံတွေက ပြောပါတယ်။
နေအိမ် ၆ လုံးကို မီးရှို့ကာ ရွာတွင်းရှိ နေအိမ်တွေက ပစ္စည်းတွေကို မွှေနှောက်ခိုးယူကြပြီး မနက် ၉ နာရီလောက်မှာ ထီးလင်းမြို့ဘက်ကို ပြန်သွားခဲကြတယ်လို့ ဆိုပါတယ်။
အဆိုပါ သရခါကျေးရွာမှာ ဒေသခံလူနေအိမ် ၁၃၀ ဝန်းကျင်ရှိပြီး လူဦးရေ ၅၀၀ ဝန်းကျင် နေထိုင်တယ်လို့ သိရပါတယ်။
ထီးလင်းနယ်ကဒေသခံ တဦးက "မနေ့ကစပြီး စစ်ကြောင်းဝင်တာ။ ဒီနေ့မနက်ပိုင်းမှာ စစ်ကြောင်းပြန်လည်ထွက်ချိန်မှာ နေအိမ်တွေ မီးရှို့ဖျက်ဆီးသွားကြတာ။ ဒေသခံတွေကတော့ ပြေးနေကြရတယ်။ တချို့တော့ ရွာထဲ ပြန်ဝင်ကြပါပြီ။ တချို့ကတော့ မပြန်ရဲကြသေးဘူး။ မီးလောင်တဲ့အိမ်တွေကို Ydf ထီးလင်း နဲ့ Pdfထီးလင်းက ပူးပေါင်းပြီး မီးငြှိမ်းပေး ခဲ့ကြတယ်"လို့ ပြောပါတယ်။
ထီးလင်းမြို့နယ်မှာ စစ်ကောင်စီတပ်သားတွေရဲ့ မီးရှို့ဖျက်ဆီးမှုကြောင့် ဒေသခံနေအိမ် ၆၀ ဝန်းကျင် မီးလောင် ဆုံးရှုံးထားပြီး အင်တာနက်လိုင်းတွေ ဖြတ်တောက်ထားတာဟာဆိုရင် ၁ နှစ် ကျော်ကြာ ရှိလာပါပြီ။
