စစ်ကိုင်းတိုင်း၊ တမူးမြို့နယ် ကလေး-တမူး အာရှလမ်းမကြီးပေါ်ရှိ ဘုက္ကန်ရဲကင်းစခန်းကို မတ်လ ၂၄ ရက် မနက်ပိုင်း ၇ နာရီခွဲလောက်မှာ  တော်လှန်ရေးတပ်ဖွဲ့တဖွဲ့ဖြစ်တဲ့ အမျိုးသား လွတ်မြောက်ရေးတပ်တော် (National Liberation Army)က ဝင်ရောက်စီးနင်းတိုက်ခိုက်ပြီး  လက်နက်တွေ သိမ်းဆည်းရမိခဲ့ပါတယ်။

အဆိုပါရဲစခန်းကို ဝင်ရောက်စီးနင်းခဲ့ရာ ရဲစခန်းအတွင်းက ရန်သူ့လက်နက်ငယ်မျိုးစုံ ၁၅ လက်၊ စကားပြောစက် ၇ လုံး၊ ကျည်ဆန်တွေ အမြောက်အမြားနဲ့ ဒုရဲအုပ်အဆင့် အပါအဝင် ယူနီဖောင်း ဝတ်စုံတွေ သိမ်းဆည်းရမိခဲ့တယ်လို့ အမျိုးသားလွတ်မြောက်ရေးတပ်တော် (NLA) ထံက သိရပါတယ်။

ဒီတိုက်ပွဲတွင်းပါဝင်ခဲ့တဲ့ တမူးကဘော်ဒေသရဲ့ ပြန်ကြားရေးတာဝန်ခံ သျှောင်တစောင်းက “ဘုက္ကန်ရဲစခန်းမှာ စစ်သားမရှိဘူး။ ရဲတွေချည်းပဲတပ်စွဲနေတယ်။ တိုက်ပွဲချိန် ၄၅ မိနစ်ကြာခဲ့တယ်။ သူတို့ဘက်က  လေးယောက် သေနတ်ထိမှန်တာ‌ တွေ့ခဲ့ရတယ်။ အစ်ကိုတို့ ကာကွယ်ရေးတပ်ဘက်ကတော့ ထိခိုက်ကျဆုံးမှုမရှိဘဲ လက်နက်ခဲယမ်းတွေသိမ်းဆည်းရမိ ခဲ့တယ်"လို့ ဒီဗွီဘီကို ပြောပါတယ်။

တမူးနယ်က ဘုက္ကန်နယ်မြေရဲစခန်းဟာ ကျေးရွာရဲ့အစွန်ပိုင်း အိန္ဒိယနဲ့ နယ်နိမိတ် ထိစပ်နေတဲ့မျဉ်းပေါ်မှာတည်ရှိပြီး တိုက်ပွဲကြောင့် ဒေသခံတွေ ထွက်ပြေးတိမ်းရှောင်တာမျိုးမရှိဘဲ စစ်ကောင်စီလက်အောက်ခံရဲတပ်ဖွဲ့ဝင် ၉ ဦးက လက်နက်ချပြီး အိန္ဒိယနိုင်ငံဘက် ထွက်ပြေးသွားပါတယ်။

လက်ရှိတမူးမြို့နယ်မှာ  စစ်ကောင်စီတပ်နဲ့ ဒေသခံကာကွယ်ရေးတပ်တွေကြား စစ်ရေးတင်းမာ နေပြီး ဘုက္ကန်ရဲစခန်း စီးနင်းတိုက်ခိုက်ခံရမှုနဲ့ ပတ်သက်ပြီး စစ်ကောင်စီဘက်က သတင်း‌ထုတ်ပြန်ထားတာတော့ မတွေ့ရသေးပါဘူး။

ဓာတ်ပုံ-NLA(

ကရင်နီ (ကယား) ပြည်နယ်၊ သံလွင်အရှေ့ခြမ်းရှိ  စစ်ကောင်စီစစ်တပ် ခလရ ၁၃၅ ရှေ့တန်းစခန်းကို ကရင်နီ ကွန်မန်ဒိုတပ်ဖွဲ့က မတ် ၁၆ ရက်မှာ တိုက်ခိုက်သိမ်းပိုက်နိုင်ခဲ့တယ်လို့ ကရင်နီစစ်ဘက်ဆိုင်ရာဗဟို သတင်းထုတ်ပြန်ရေးအဖွဲ့က ထုတ်ပြန်ထားပါတယ်။

ကရင်ကွန်မန်ဒိုတပ်ဖွဲ့က အဆိုပါ စခန်းကို မတ် ၁၆ ရက်နေ့ ညနေ ၅ နာရီကနေ ၆ နာရီအထိ တနာရီကြာ တိုက်ခိုက်သိမ်းပိုက်ခဲ့တာဖြစ်ပြီး အလောင်း ၃ လောင်း၊ လက်နက်ခဲယမ်းတွေနဲ့ ဆက်သွယ်ရေးစက်ကြီးတလုံးတို့ကို သိမ်းဆည်းရမိခဲ့တယ်လို့ ဆိုပါတယ်။

ဒါပေမဲ့ အဆိုပါစခန်းမှ စစ်ကောင်စီတပ်သားတချို့ ထွက်ပြေးလွတ်မြောက်သွားခဲ့တယ်လို့ ထုတ်ပြန်ထားပါတယ်။

အလားတူ လွိုင်ကော်မြို့နယ် မြောက်ဘက်ခြမ်းနဲ့  ရှမ်းပြည်တောင်ပိုင်း ဖယ်ခုံမြို့နယ် အရှေ့ဘက်ခြမ်းဒေသတွေမှာ စစ်ကောင်စီတပ်က စစ်ကြောင်း ၃ ကြောင်းခွဲ ဖြန့်ကျက်ပြီး   နယ်မြေရှင်းလင်းရေး ထိုးစစ်ဆင်နေပါတယ်။

အမှတ် ၆၆ တပ်မ တံဆိပ်ပါ စစ်ကောင်စီစစ် ကြောင်းဟာ မတ် ၁၂ ရက် ည ၇ နာရီ ၅၅ မိနစ်လောက်မှာ ရှမ်းပြည်တောင်ပိုင်း ဖယ်ခုံမြို့နယ်အရှေ့ခြမ်း ရွှေစမ်းရွာ တာဝါတိုင်ကုန်းကို  ရောက်ရှိလာပြီး KNDF၊ PDF ပူးပေါင်းတပ်နဲ့ ၁ နာရီကျော်ကြာ တိုက်ပွဲဖြစ်ပွားခဲ့ကြောင်း၊ တိုက်ပွဲအတွင်း စစ်ကောင်စီတပ်ဘက်က ၁၂ ဦး သေဆုံးပြီး ၁၀ ဦးထက်မနည်း ဒဏ်ရာရခဲ့တယ်လို့ ထုတ်ပြန်ထားပါတယ်။

တော်လှန်ရေးအင်အားစု ပူးပေါင်းတပ်ဘက်ကလည်း ၃ ဦး ထိခိုက်ခဲ့ပြီး တိုက်ပွဲအပြီးမှာ  စစ်ကောင်စီတပ်ဘက်က  ဂျက်လေယာဉ်နဲ့ ပစ်ခတ်သွားခဲ့တယ်လို့ ဆိုပါတယ်။  

အလားတူ စစ်ကောင်စီတပ်က ရှမ်းပြည်နယ် ဖယ်ခုံမြို့နယ် ခေါင်အိကေးရွာအုပ်စုဘက်ကို မတ် ၈ ရက်ကနေ ၁၆ ရက်အထိ စစ်ကြောင်းထိုးဝင်ရောက်ခဲ့ပြီး ဖယ်ခုံ PDF အပါအဝင် ပူးပေါင်းတပ်တွေနဲ့ တိုက်ပွဲဖြစ်ပွားခဲ့တယ်လို့ ဖယ်ခုံ PDF က ဒီနေ့ ထုတ်ပြန်ထားပါတယ်။

အဆိုပါတိုက်ပွဲအတွင်း စစ်ကောင်စီတပ်သား ၄၅ ဦး သေဆုံးခဲ့ပြီး လက်နက်ခဲယမ်း‌တချို့ကိုလည်း  သိမ်းဆည်းရမိခဲ့ကြောင်း၊ ဖယ်ခုံ PDF ဘက်ကတော့ ၈ ဦး ထိခိုက်ဒဏ်ရာရရှိခဲ့တယ်လို့ ဆိုပါတယ်။

ထိခိုက်သေဆုံးမှုတွေနဲ့ပတ်သက်ပြီး ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း တစုံတရာ သတင်းထုတ်ပြန်ထားတာ မရှိသေးပါဘူး။