ရာနေးလ်ဝစ်ကရာမန်ဆင်းဂ်ကို သီရိလင်္ကာရဲ့ သမ္မတသစ်အဖြစ် မဲခွဲဆုံးဖြတ်ပြီးတဲ့နောက် ဇူလိုင် ၂၀ ရက်မှာ သမ္မတရုံးအပြင်ဘက်မှာ ဆန္ဒပြသူတွေ ငြိမ်နေခဲ့ကြပါတယ်။
လအတော်ကြာအောင် လောင်စာ၊ စားနပ်ရိက္ခာနဲ့ ဆေးဝါးတွေ ဆိုးဆိုးရွားရွား ပြတ်တောက်ပြီးတဲ့နောက် ပြည်သူတွေက အာဏာရ ရေပေါ်ဆီတွေကို ဒေါသထွက်ခဲ့ပေမဲ့ ခြောက်ကြိမ်တိုင်တိုင် ဝန်ကြီးချုပ် ဖြစ်ခဲ့ဖူးသူ ဝစ်ကရာမန်ဆင်းဂ်က လွှတ်တော်ထဲမှာ အမတ် ၂၂၅ ဦးရှိတဲ့အထဲက ထောက်ခံမဲ ၁၃၄ မဲ ရရှိခဲ့ပါတယ်။
“ဝမ်းနည်းစရာနေ့တစ်နေ့လို့ ကျနော်ထင်ပါတယ်။ ဘာလို့လဲဆိုတော့ ဒါက ရွေးကောက်ပွဲမှာ မနိုင်ခဲ့တဲ့ သူတစ်ယောက်ပါ။ သူက ပြည်သူတွေရဲ့ လုပ်ပိုင်ခွင့်အရပယ်ချခံခဲ့ရတဲ့ သူတစ်ယောက်ပါ” လို့ သမ္မတရုံး လှေကားထစ်တွေမှာ စုဝေးနေတဲ့ လူ ၁၀၀ လောက်ကို ဆန္ဒပြသူ ဘူဝါနာခါ ပေရေရာက ပြောပါတယ်။
"ကျနော်တို့ နောက်ပြန်ဆုတ်မှာမဟုတ်ဘူး”လို့ တက်ကြွလှုပ်ရှားသူ ခါဆုမိ ရာနာဆင်းက ပြောပါတယ်။
သီရိလင်္ကာသမ္မတရုံးကို ဇူလိုင်လအစောပိုင်းက ဆန္ဒပြသူ လူပင်လယ်ကြီးက ဝင်ရောက်စီးနင်းခဲ့ပြီး အဲဒီအချိန်က သမ္မတ ဂိုတာဘာယာ ရာဂျာပတ်ခ်ဆာကို နှင်ထုတ်ခဲ့တာပါ။
ပြီးခဲ့တဲ့ သီတင်းပတ်က ယာယီသမ္မတအဖြစ် တာဝန်ယူခဲ့တဲ့ ဝစ်ကရာမန်ဆင်းဂ်ဟာ ဉာဏ်များပြီး နိုင်ငံရေးပါးဝတဲ့သူလို့ ကျော်ကြားတဲ့ ရှေ့နေတစ်ဦးဖြစ်ပြီး ရာဂျာပက်ဆာ မိသားစုနဲ့ နီးစပ်သူအဖြစ် ရှုမြင်ခံထားရပါတယ်။
“ကျနော်တို့နိုင်ငံဟာ ကြီးမားတဲ့စိန်ခေါ်မှုတွေနဲ့ ရင်ဆိုင်နေရလို့ ပြည်သူတွေရဲ့ဆန္ဒတွေကို ဖြည့်ဆည်းပေးဖို့ မဟာဗျူဟာအသစ်တွေကို လုပ်ရမှာပဲ” လို့ အသက် ၇၃ နှစ် အရွယ် ဝစ်ကရာမန်ဆင်းဂ်က သူ့အောင်ပွဲအပြီးမှာ ပြောခဲ့ပါတယ်။
သီရိလင်္ကာလွှတ်တော်အမတ်တွေဟာ ဇူလိုင် ၂၀ ရက်က လုံခြုံရေး တင်းကျပ်မှုတွေကြားမှာပဲ နောက်တက်လာမယ့် သမ္မတသစ်ကို ပြိုင်ဘက် ၃ ယောက်ထဲကနေ ရွေးချယ်ဖို့ ပါလီမန်မှာ ဆန္ဒမဲပေးနေကြပါတယ်။
ခေါင်းဆောင်သစ်ဟာ ပြိုယိုင်လဲကျနေတဲ့ တိုင်းပြည်ရဲ့စီးပွားရေးနဲ့ နိုင်ငံရေးအကျပ်အတည်းကို ဆွဲတင်ပေးနိုင်လိမ့်မယ်လို့ မျှော်လင့်နေကြပါတယ်။
သမ္မတလောင်း ဝင်အရွေးခံနေတဲ့ လက်ရှိ ယာယီသမ္မတ တာဝန်ယူပေးနေတဲ့ လက်ရှိဝန်ကြီးချုပ် ရာနီးလ်ဝစ်ကရာမက်ဆင်းဂ် သီရိလင်္ကာနိုင်ငံသားအများအပြားက ကန့်ကွက်နေကြပြီး သူသာ အနိုင်ရခဲ့ရင် လနဲ့ချီပြီး လောင်စာဆီ၊ အစားအစာနဲ့ ဆေးဝါးတွေ ပြတ်တောက်မှု ဆိုးရွားပြင်းထန်ခဲ့လို့ အာဏာရအထက်တန်းလွှာကို ဒေါသထွက်နေတဲ့ ပြည်သူတွေက ဆန္ဒပြမှုတွေ ပိုဖြစ်နိုင်ကြောင်း သုံးသပ်နေကြပါတယ်။
တခြားအဓိကသမ္မတလောင်းဖြစ်တဲ့ အာဏာရပါတီအမတ် ဒါးလာ့စ်အလာဟေ့ပ် ပေရူမာ ကိုတော့ ဆန္ဒပြသူတွေနဲ့ အတိုက်အခံတွေအတွက် ပိုလက်ခံနိုင်ဖွယ် ရှိပေမယ့် ထိပ်တန်းအဆင့် အစိုးရအုပ်ချုပ်မှု အတွေ့အကြုံ မရှိဘူးလို့ ဆိုပါတယ်။
တတိယသမ္မတလောင်း အရူနာကူမာရာဒစ်ဆနာယာကာကတော့ အဖွဲ့ဝင် ၂၂၅ ဦး ရှိတဲ့ ပါလီမန်မှာ နေရာ ၃ နေရာသာ ရရှိထားတဲ့ လက်ဝဲယိမ်း ဂျနတ်တဝိမုတ်တိ ပေရာမူနာ ပါတီရဲ့ ခေါင်းဆောင် ဖြစ်ပါတယ်။
ဝန်ကြီးချုပ်ဟောင်းနဲ့ သမ္မတဟောင်းဖြစ်သူ မဟင်ဒါရာဂျာပက်ဆာရဲ့ ညီအစ်ကို တဦးကတော့ ပါလီမန်အဖွဲ့ဝင်တွေအဖြစ် သမ္မတ မဲပေးရွေးချယ်ပွဲကို သူတို့ရဲ့တူဖြစ်သူနဲ့ အတူ တက်ရောက်ခဲ့ကြပါတယ်။
မဲပေးတဲ့လုပ်ငန်းစဉ်ကတော့ သမ္မတအဖြစ် အနိုင်ရ ရွေးချယ်ခံရသူကို ကြေညာဖို့ နာရီပေါင်းများစွာ ကြာဦးမှာ ဖြစ်ပါတယ်။
