မြန်မာနိုင်ငံမှာ အာဏာသိမ်း ၂ နှစ်ကျော်အကြာ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုတွေကြောင့် နိုင်ငံတဝန်း အပြစ်မဲ့ကျဆုံးပြည်သူ ၃,၁၄၈ ယောက်နဲ့ ဖမ်းဆီးထိန်းသိမ်းခံရသူပေါင်း အယောက် ၂၀,၇၅၀ ထိ ရှိလာခဲ့ပြီဖြစ်တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ထားပါတယ်။
ဒီစာရင်းဟာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၃ ခုနှစ်၊ မတ် ၂၁ ရက်အထိ အေအေပီပီက ကောက်ယူမှတ်တမ်းပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြပါတယ်။
နွေဦးတော်လှန်ရေးကာလအတွင်း ဒီနေ့အထိ ၁၆,၈၈၄ ယောက် လက်ရှိ ချုပ်နှောင်ခံထားရဆဲ ဖြစ်ပြီး အဲဒီထဲက ၅,၁၄၉ ယောက်ကတော့ ထောင်ဒဏ် ချမှတ်ခံထားရပါတယ်။
တော်လှန်ရေးနဲ့ဆက်စပ်ပြီး သေဒဏ်ချမှတ်ခံထားရကာ အကျဉ်းထောင်တွေထဲ ထိန်းသိမ်းခံနေရသူ အရေအတွက်ကတော့ ၁၀၈ ယောက်ရှိနေပြီး မျက်ကွယ် သေဒဏ်ချမှတ်ခံထားရသူ ၄၂ ယောက် အပါအဝင် ၁၂၁ ယောက်ကတော့ မျက်ကွယ်ပြစ်ဒဏ် ချမှတ်ခံထားရတာကြောင့် သေဒဏ်ချမှတ်ခံထားရသူ စုစုပေါင်းအယောက် ၁၅၀ ရှိလာခဲ့ပြီ ဖြစ်ပါတယ်။
လတ်တလောအချိန်ထိ ဖမ်းဆီးခံရပြီး ပြန်လည်လွတ်မြောက်လာသူ ဦးရေကတော့ ၃,၈၄၂ ယောက် ရှိခဲ့တယ်လို့ ဆိုပါတယ်။
ပြီးခဲ့တဲ့ မတ် ၁၈ ရက် နေ့လယ် ၂ နာရီကျော်လောက်က စစ်ကိုင်းတိုင်း၊ ရွှေဘိုမြို့နယ်၊ ဆိပ်ခွန်ကျေးရွာကို အကြမ်းဖက်စစ်အုပ်စုက Mi35 ရဟတ်ယာဉ်တစီးနဲ့ လှည့်ပတ်ပစ်ခတ်ခဲ့တာကြောင့် ဒေသခံ ၂ ယောက်ဖြစ်တဲ့ ကိုတိုးတိုးနဲ့ ဒေါ်ကြည်ဝင်းတို့ သေဆုံးခဲ့ပြီး အရပ်သား ၃ ယောက် ထိခိုက်ဒဏ်ရာရရှိခဲ့တယ်လို့ အေအေပီပီက ပြောပါတယ်။
ဒါ့အပြင် မတ် ၁၅ ရက် ညနေပိုင်းကလည်း မကွေးတိုင်း၊ ထီးလင်းမြို့နယ်၊ ရွှေခုံတိုင်ကျေးရွာကို အကြမ်းဖက်စစ်အုပ်စုတပ်က စစ်ကြောင်းထိုးဝင်ရောက်စီးနင်းပြီး မီးရှို့ခဲ့တာကြောင့် အသက် ၈၀ ကျော်အရွယ် အမြင်အာရုံချို့ယွင်းနေသူ ဒေါ်ခင်ပုမှာ မီးလောင်သေဆုံးခဲ့ပြီး နေအိမ် ၈ လုံး မီးလောင်ပျက်စီးခဲ့တယ်လို့ သိရပါတယ်။ အဆိုပါစစ်ကြောင်းဟာ မတ် ၁၆ ရက်က ရွှေခုံတိုင်ကျေးရွာကနေ ပြန်လည်ထွက်ခွာခဲ့ပြီးနောက် ဒေါ်ခင်ပုရဲ့ ရုပ်အလောင်းကို ကျေးရွာအတွင်းမှာ တွေ့ရှိခဲ့ရတာလို့ ဆိုပါတယ်။
အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေ စတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာတွေနဲ့ ပတ်သက်လို့ နွေဦးတော်လှန်ရေး ကာလအတွင်း ကျဆုံးသွားသူတွေရဲ့ အချက်အလက်တွေကို သိရှိပါက အေအေပီပီကို ဆက်သွယ်အသိပေး အကြောင်းကြားနိုင်ပါတယ်။
ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီးမေးလ်နဲ့ အဖမ်းအဆီး အချက်အလက်တွေကို [email protected] အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်းကြားနိုင်ကြောင်း အသိပေးထားပါတယ်။
အိုကလာဟိုးမားပြည်နယ်အုပ်ချုပ်ရေးမှူး ကယ်ဗင်စတစ်ဟာ သေဒဏ်ချထားတဲ့ နာမည်ကျော် ကြိုးတိုက်အကျဉ်းသား ဂျူးလိယက်စ်ဂျုံးစ်ကို ကွပ်မျက်ဖို့ နာရီပိုင်းအလိုမှာ အသက် ၂၂ နှစ်အရွယ်ကို လူသတ်မှုအတွက် သူ့ရဲ့ပြစ်မှုဟာ သံသယရှိစရာတွေ များလာတာကြောင့် နိုဝင်ဘာ ၁၈ ရက်က သေဒဏ်ကို ရပ်ဆိုင်းလိုက်ပါတယ်။
ဂျုံးစ်ရဲ့ပြစ်ဒဏ်ကို ထောင်ဒဏ် တစ်သက်တစ်ကျွန်းကို လျှော့ချသင့်တယ်ဆိုတဲ့ နိုဝင်ဘာ ၁ ရက်က အိုကလာဟိုးမား ပြစ်ဒဏ်ကင်းလွတ်ခြင်းနဲ့ လွတ်ငြိမ်းချမ်းသာခွင့် ဘုတ်အဖွဲ့ရဲ့ထောက်ခံချက်အရ အုပ်ချုပ်ရေးမှူးက ၁၁ နာရီကြာ ရွှေ့ဆိုင်းလိုက်တာပါ။
ဂျုံးစ်ကို ၃ မျိုးစပ် သေဆေးအရည် မထိုးပေးခင် ၄ နာရီလောက်အလိုမှာ သူ့ရဲ့ရှေ့နေတွေက သီးခြားနောက်ဆုံး မိနစ်အယူခံမှာ လူမဆန်မှုအဖြစ် စိန်ခေါ်ခဲ့ပြီးတော့ ဒီလိုဥပဒေကူးပြောင်း စီရင်ခွင့်လျှောက်ထားခဲ့တာ ဖြစ်ပါတယ်။
အသက် ၄၁ နှစ်အရွယ် ဂျုံးစ်ဟာ ၁၉၉၉ ခုနှစ်က အာမခံအမှုဆောင်အရာရှိ ပေါလ်ဟောင်းဝဲလ်ကို ကားမောင်းနေချိန်မှာ ကားကိုလုယက်ပြီး သေနတ်နဲ့ပစ်သတ်မှုနဲ့ ပြစ်ဒဏ်ချမှတ်ခံခဲ့ရတာပါ။
ဒါပေမဲ့ လူသတ်မှုဖြစ်ပွားချိန်က သူ့မိသားစုနဲ့အတူ အိမ်မှာရှိတယ်ဆိုတဲ့ အထောက်အထားတွေ ကို သူ့ရဲ့ရှေ့နေတွေက ကိုးကားထားပါတယ်။
အဲဒီအချိန်က သူ့ရှေ့နေတွေဟာ အဲဒါကို အပြည့်အ၀ စုံစမ်းစစ်ဆေးဖို့ ပျက်ကွက်တာကို ဂျူရီလူကြီး တွေက လေ့လာသုံးသပ်မှု မလုပ်ခဲ့ဘူးလို့ လက်ရှိ ဂျုံးစ်ရဲ့ရှေ့နေတွေက ဆိုပါတယ်။
နာမည်ကျော် ကင်မ်ခါဒါရှန်ဝက်စ်နဲ့ သေဒဏ်ဆန့်ကျင်ရေး တက်ကြွလှုပ်ရှားသူတွေအပါအဝင် ထင်ပေါ်ကျော်ကြားသူတွေရဲ့စိတ်ဝင်စားမှုကို ပျံ့နှံ့စေခဲ့တဲ့ ဒီအမှုဟာ ပြီးခဲ့တဲ့ ၂ ရက်အတွင်း ပြည်နယ်တဝန်း ဆန္ဒပြမှုတွေနဲ့ လှုပ်ရှားနိုးကြားမှုတွေ အများအပြား ဖြစ်ပွား ခဲ့ပါတယ်။
အုပ်ချုပ်ရေးမှူးရဲ့ ဆုံးဖြတ်ချက်ကိုသိရှိပြီးနောက်မှာ ဂျုံးစ်ကိုသတ်ပစ်ဖို့ စီစဉ်ထားတဲ့ မက်အလန်စတာရှိ ပြည်နယ်အချုပ်ခန်းရဲ့ အပြင်ဘက်က လူအုပ်ကြီးဟာ ဝမ်းသာအားရဖြစ်ခဲ့ကြပြီး ထောက်ခံသူတွေဟာ ဂျုံစ်ရဲ့အမည်ကိုကြွေးကြော်ပြီး ပွေ့ဖက်ကာ မျက်ရည်များကို သုတ်ခဲ့ကြပါတယ်။
ဂျုံးစ်ဟာ လူသတ်မှုမှာ အပြစ်ရှိကြောင်း ယုံကြည်ခဲ့တဲ့ ဟောင်းဝဲလ်ရဲ့မိသားစုဟာ ပိုပြီး ဒေါသတကြီး တုံ့ပြန်ခဲ့ကြပေမယ့် အုပ်ချုပ်ရေးမှူးရဲ့ဆုံးဖြတ်ချက်ကို လက်ခံခဲ့ပါတယ်။
အုပ်ချုပ်ရေးမှူးဟာ ဂျုံးစ်ကို လွတ်ငြိမ်းခွင့်ပေးဖို့ ဘုတ်အဖွဲ့ရဲ့အကြံပြုချက်ကို မလိုက်နာလို့ စိတ်မကောင်းဖြစ်မိပေမယ့် စတစ်က သူ့ကွပ်မျက်မှုကို လျှော့ပေးတဲ့အတွက် ကျေးဇူးတင်ကြောင်း ဂျုံးစ်ရဲ့ဆွေမျိုးတွေက ပြောပါတယ်။
ဂျုံးစ်ဟာ အောက်တိုဘာ ၂၇ ရက်မှာ အယူခံတရားစီရင်ပိုင်ခွင့်ရှိတဲ့ ဗဟိုတရားရုံးရဲ့ တရားသူကြီး သုံးဦးတို့က သေဒဏ်ချမှတ်လိုက်တဲ့ အကျဉ်းသား ၅ ယောက်ထဲက တယောက်ဖြစ်ပါတယ်။
