အယ်လ်ဘေးနီးယားနိုင်ငံဟာ အီရန်အစ္စလာမ္မစ်သမ္မတနိုင်ငံကို ဆိုက်ဘာတိုက်ခိုက်မှု ကျူးလွန်ခဲ့ကြောင်း စွပ်စွဲခဲ့ပြီးတော့ အီရန်နဲ့ သံတမန်ဆက်ဆံရေး ဖြတ်တောက်ခဲ့ပြီးနောက်မှာ အီရန်သံတမန်တွေဟာ စက်တင်ဘာ ၇ ရက် ညနေပိုင်းက အယ်လ်ဘေးနီးယားကနေ မထွက်ခွာခင် နာရီပိုင်းအလိုမှာ စာရွက်စာတမ်းတွေကို မီးရှို့ဖျက်ဆီးခဲ့ကြပါတယ်။

ဗုဒ္ဓဟူးနေ့က ရှားရှားပါးပါး ဗီွဒီယိုမိန့်ခွန်းထဲမှာ အယ်လ်ဘေးနီးယားဝန်ကြီးချုပ် အက်ဒီ ရာမာက အီရန်သံတမန်တွေနဲ့ ဝန်ထမ်းတွေကို သံရုံးပိတ်ပြီး ၂၄ နာရီအတွင်း နိုင်ငံတွင်းကနေ ထွက်ခွာဖို့ အမိန့်ပေးခဲ့ကြောင်း ပြောကြားခဲ့ပါတယ်။

ဇူလိုင်လ ဆိုက်ဘာတိုက်ခိုက်မှုကြောင့် အများပြည်သူဝန်ဆောင်မှုတွေကို ပျက်ပြားသွားစေတာ၊ ဒစ်ဂျစ်တယ်စနစ်တွေကို ဖျက်ဆီးပစ်ပြီး နိုင်ငံပိုင်မှတ်တမ်းတွေကို ခိုးဝင်ထွင်းဖောက်တာ၊ အစိုးရ အင်ထရာနက် အီလက်ထရွန်နစ်ဆက်သွယ်ရေးကို ခိုးယူပြီး တိုင်းပြည်မငြိမ်သက်မှုတွေနဲ့ မလုံခြုံမှုတွေကို နှိုးဆော်နေကြောင်း ရာမာက ပြောကြားခဲ့ပါတယ်။

အယ်လ်ဘေးနီးယားရဲ့ အနီးကပ်ဆုံး မဟာမိတ်ဖြစ်တဲ့ ဝါရှင်တန်ကလည်း အဲဒီတိုက်ခိုက်မှုအတွက် အီရန်ကို အပြစ်တင်ခဲ့ပြီး အမေရိကန်ရဲ့ မဟာမိတ်လုံခြုံရေးကို ခြိမ်းခြောက်တဲ့ လုပ်ရပ်တွေအတွက် အီရန်ကို ထပ်အရေးယူဖို့ တာဝန်ရှိကြောင်း ကတိပြုခဲ့ပါတယ်။

သံတမန်ဆက်ဆံရေးဖြတ်တောက်ဖို့ တီရာနာရဲ့ ဆုံးဖြတ်ချက်ကို တီဟီရန်က ပြင်းပြင်းထန်ထန် ရှုတ်ချခဲ့ပြီး ဒီလုပ်ရပ်အတွက် အယ်လ်ဘေးနီးယားရဲ့ အကြောင်းပြချက်တွေက အခြေအမြစ်မရှိတဲ့ စွပ်စွဲချက်တွေလို့ ခေါ်ဆိုလိုက်ပါတယ်။

စက်တင်ဘာ ၈ ရက် မနက်ပိုင်းကတော့ ဝန်ကြီးချုပ်ရုံးနဲ့ မီတာ ၂၀၀ အကွာမှာရှိတဲ့ တီရာနာရှိ သံရုံးအပြင်ဘက်မှာ ငြိမ်သက်နေပါတယ်။

မြန်မာနိုင်ငံမှာ စစ်ကောင်စီရဲ့ အကြမ်းဖက်မှုတွေကြောင့် နိုင်ငံတကာက သံတမန်ရေးရာ ဆက်ဆံမှု အဆင့်လျှော့ချမှုတွေအပေါ် နိုင်ငံခြားရေးမူဝါဒနဲ့ အမျိုးသားအကျိုးစီးပွားအတွက် လိုအပ်သလို တုံ့ပြန်သွားမယ်လို့ မေ ၁၉ ရက်က ပြုလုပ်တဲ့ သတင်းစာရှင်းလင်းပွဲမှာ စစ်ကောင်စီရဲ့ ပြန်ကြားရေး ဒုဝန်ကြီးက ဗိုလ်ချုပ် ဇော်မင်းထွန်းက ပြောဆိုလိုက်ပါတယ်။

မြန်မာနိုင်ငံဆိုင်ရာ ဗြိတိသျှ သံအမတ်က ခန့်အပ်လွှာကို မပေးဘဲ မြန်မာနိုင်ငံက ထွက်ခွာကာ ထိုင်းနိုင်ငံကတဆင့် အင်္ဂလန်ကို ပြန်သွားပြီလို့ သိရပေမဲ့ နိုင်ငံတကာဆက်ဆံရေးမှာ သံခင်းတမန်ခင်းအနေနဲ့ သိမ်မွေ့သလို မြန်မာနိုင်ငံအနေနဲ့ နိုင်ငံတကာမှာ သံရုံး တရုံးမှ ရုပ်သိမ်းတာ မရှိသေးဘူးလို့ ဆိုပါတယ်။

“သံတမန်အဆင့် လျှော့ချတယ်ပြောပြော မလျှော့ချဘူးပဲပြောပြော ကျနော်တို့ ပွင့်ပွင့်လင်းလင်းပြောရရင် ဒီကိစ္စတွေသည် သူတို့နိုင်ငံတွေရဲ့ သဘောထားဖြစ်ပြီး ကျနော်တို့နိုင်ငံအနေနဲ့ နိုင်ငံခြားရေးမူဝါဒနဲ့အညီ ဆောင်ရွက်သွားမယ်။ ပြီးရင် အမျိုးသားအကျိုးစီးပွားအတွက် တုံ့ပြန်သင့်တာတွေကို တုံ့ပြန်သွားပါမယ်”လို့ စစ်ကောင်စီ ပြန်ကြားရေးဒုဝန်ကြီး ဗိုလ်ချုပ်ဇော်မင်းထွန်းက ပြောပါတယ်။

ဗြိတိသျှသံအမတ်က ခန့်အပ်လွှာကို ပေးဖို့ ငြင်းဆိုခဲ့တာကြောင့် မြန်မာနိုင်ငံဘက်က သူ့နိုင်ငံမှာပဲ ပြန်စောင့်ဖို့ ပြောချိန်မှာ သံရုံးယာယီတာဝန်ခံထားဖို့ ပြောဆိုပေမဲ့ လုပ်ထုံးလုပ်နည်းနဲ့အညီ လက်ခံလို့မရလို့ အသစ်ပဲလက်ခံမယ် ဆိုပြီး ဆုံးဖြတ်ခဲ့တာဖြစ်တယ်လို့ နိုင်ငံခြားရေးဝန်ကြီးဌာနက ဖြည့်စွက်ပြောဆိုခဲ့ပါတယ်။

ဒါ့အပြင် ဩစတြေးလျသံရုံးကလည်း သံအမတ်ကြီးတာဝန် ထမ်းဆောင်တဲ့ကာလပြီးလို့ ပြန်သွားတဲ့အချိန်မှာ သံအမတ်ကြီးနေရာမှာ သံရုံးယာယီတာဝန်ခံအနေနဲ့ပဲ ထားမယ်လို့ ဆောင်ရွက်တာကြောင့် မြန်မာနိုင်ငံအနေနဲ့လည်း သံတမန်ကျင့်ဝတ် လုပ်ထုံးလုပ်နည်းအရ အပြန်အလှန် တုံ့ပြန်တဲ့အနေနဲ့ သံရုံးယာယီတာဝန်ခံထားဖို့ ဆောင်ရွက်ထားတာရှိတယ်လို့ ဆိုပါတယ်။