သြစတြေးလျနိုင်ငံအရှေ့တောင်ပိုင်းမှာ လေအေးစီးကြောင်းတွေ ဖြတ်သန်းတိုက်ခတ်လာလို့ ဆီးနှင်းတွေ ထူထူထပ်ထပ် ကျဆင်းလာတဲ့အတွက် ဩစတြေးလျနိုင်ငံ နမ်ဒါဂီ အမျိုးသား ဥယျာဉ်မှာ မေ ၇ ရက်က အဖြူရောင်တွေ ဖုံးလွှမ်းသွားခဲ့တယ်လို့ ဒေသခံမီဒီယာတွေက ဖော်ပြပါတယ်။

ဩစတြေးလျနိုင်ငံ မြို့တော်နယ်မြေမှာ အပူချိန်က ပျမ်းမျှအောက်သာရှိခဲ့တယ်လို့ ပြည်နယ်မိုးလေဝသဌာနက သတင်း ထုတ်ပြန်ပါတယ်။ 

နယူးဆောက်သ်ဝေးပြည်နယ်မှာ ဆီးနှင်းနဲ့ မိုးသီးတွေပါ ကျဆင်းခဲ့တယ်လို့ ဒေသဆိုင်ရာ မီဒီယာက ပြောပါတယ်။

အရှေ့တောင်ဘက်တစ်ခွင် အအေးဓာတ်တွေ သီတင်းပတ်ကုန်မှာ စတင်ခဲ့ပြီး အပူချိန်ကလည်း သက်ဆိုင်ရာလအတွက် ပျမ်းမျှအပူချိန်အောက် ကျဆင်းသွားပါတယ်။

မေလ ၁၀ ရက်အထိ နှင်းခဲတွေ ဆက်လက်တည်ရှိနိုင်တယ်လို့ မိုးလေဝသဗျူရိုက သတင်း ထုတ်ပြန်ပါတယ်။ 

ဩစတြေးလျနိုင်ငံဟာ ဆယ်ကျော်သက်အရွယ်တွေ အီး-စီးကရက် သောက်သုံးမှု တိုးလာတာတွေကို ရပ်တန့်ဖို့ ကြိုးပမ်းနေတာကြောင့် ဩစတြေးလျရဲ့ ဆေးလိပ်လုပ်ငန်းတွေကို ကြီးမားတဲ့ဖြိုခွင်းမှုတွေ ပြုလုပ်ပြီး စီးကရက်ဥ‌ပဒေကို‌လည်း တင်းကျပ်ထားပါတယ်။

အစိုးရက လူငယ်တွေကြား ရေပန်းစားနေတဲ့ သစ်သီးအရသာပါဝင်တဲ့ တခါသုံး စီးကရက်အတုတွေကို တားမြစ်ချင်တာကြောင့် ဆေးညွှန်းမပါတဲ့ စီးကရက်အတုတွေကို တားမြစ်ထားပြီး နီကိုတင်းပမာဏကိုလည်း ကန့်သတ်ထားပါတယ်။

ကျန်းမာရေးဝန်ကြီး မက်ခ် ဘက်လာက “သူတို့က တကယ့်ဆေးလိပ်သောက်သလိုပဲ၊ တောက်ပြောင်တဲ့ ထုပ်ပိုးမှုတွေနဲ့ အရသာတွေ ထပ်ထည့်ထားတဲ့ နီကိုတင်းကို စွဲလမ်းလာတဲ့ မျိုးဆက်သစ်ပဲ” လို့ ပြောပါတယ်။

စည်းမျဉ်းအသစ်အရ ဆေးလိပ်တုတွေကို ဆေးဆိုင်တွေမှာသာ ရောင်းချရမှာဖြစ်ပြီး ဆေးဝါးအမျိုးအစားပုံစံ ထုပ်ပိုးဖို့ လိုအပ်ပါတယ်။

အီး-စီးကရက်တွေဟာ ဩစတြေးလျမှာ အပန်းဖြေစရာ ထုတ်ကုန်တခုဖြစ်လာပြီး အများစုက ဆေးလိပ်သောက်ဖို့ အလားအလာများတဲ့ ဆယ်ကျော်သက်တွေနဲ့ လူငယ်တွေကို ရောင်းချတာလို့ မစ္စတာ ဘက်လာက ဆိုပါတယ်။

အသက် ၁၈ နှစ်နဲ့ ၂၄ နှစ်ကြား ဩစတြေးလျနိုင်ငံသား ၂၂ ရာခိုင်နှုန်းဟာ အီး-စီးကရက် ဒါမှမဟုတ် ဆေးလိပ်တုကိရိယာကို အနည်းဆုံး တကြိမ်စီ အသုံးပြုခဲ့တယ်လို့ အချက်အလက်တွေအရ သိရပါတယ်။