ကချင်ပြည်နယ်၊ ရွှေကူမြို့နယ်မှာ တိုက်ပွဲတွေဖြစ်နေလို့ ထွက်ပြေးတိမ်းရှောင်နေကြရတဲ့ စစ်ဘေးရှောင်ပြည်သူတွေ ငှက်ဖျားရောဂါနဲ့ သွေးလွန်တုပ်ကွေးရောဂါ ဖြစ်ပွားမှု များပြားနေတယ်လို့ စစ်ရှောင်တွေက ပြောပါတယ်။

ရွှေကူမြို့အရှေ့ဘက်ခြမ်းမှာ တိုက်ပွဲဖြစ်ပွားနေပြီး လူနေအိမ်တွေ မီးရှို့ဖျက်ဆီးခံရတဲ့အတွက် ထွက်ပြေးတိမ်းရှောင်နေရတဲ့ ကျေးရွာ ၁၀ ရွာက စစ်ရှောင်ပြည်သူတွေ ငှက်ဖျားရောဂါနဲ့ သွေးလွန်တုပ်ကွေးရောဂါ အဖြစ်များနေတာလို့ ဆိုပါတယ်။ 

စီသောင်ကျေးရွာ စစ်ဘေးရှောင်တဦးက “ရွာပေါင်း ၁၀ ရွာလောက်က စစ်ဘေးရှောင် ၇,၀၀၀ နီးပါးလောက် တောထဲမှာ နေနေကြရတယ်။ တချို့ကလည်း မြို့ပေါ်မှာနေကြတယ်။ တိုက်ပွဲတွေဖြစ်နေတော့ ပြန်လို့လည်းမဖြစ်၊ အိမ်တွေကလည်း မီးရှို့ခံလိုက်ရတော့ နေစရာမရှိဖြစ်နေတော့ တောထဲမှာပဲ နေကြရတယ်။ အခုရက်ပိုင်း သက်ကြီးရွယ်အိုတွေ၊ ကိုယ်ဝန်ဆောင်တွေနဲ့ ကလေးငယ်တွေ သွေးလွန်တုပ်ကွေးနဲ့ ငှက်ဖျား အဖြစ်များတယ်” လို့ ပြောပါတယ်။

တိုက်ပွဲတွေဖြစ်ပွားနေပြီး နေအိမ်တွေ မီးရှို့ခံခဲ့ရတဲ့အတွက် ဒေသခံပြည်သူတွေ တောတောင်တွေထဲမှာ စစ်ဘေးရှောင်နေရတာ ၁ လကျော်ကြာမြင့်ပြီး မိုးရွာသွန်းမှုတွေ ဖြစ်ပွားပြီးနောက်ပိုင်း သွေးလွန်တုပ်ကွေးနဲ့ ငှက်ဖျားရောဂါ ဖြစ်ပွားသူ များပြားလာတာပါ။

စစ်ရှောင်ပြည်သူတဦးက “စစ်ဘေးရှောင်နေရတာ ၁ လကျော်ပြီ။ ပြီးခဲ့တဲ့ ဧပြီလလယ်လောက်မှာ မိုးတွေရွာတယ်။ မိုးရွာပြီးတဲ့နောက် သွေးလွန်တုပ်ကွေးနဲ့ ငှက်ဖျား အဖြစ်များလာတာပဲ။ တောထဲနေရတာဆိုတော့ လယ်ခင်းတဲလေးတွေထဲ တချို့နေကြတယ်။ တချို့ကလည်း မိုးကာလေးတွေနဲ့ နေကြရတယ်။ နေထိုင်ဖို့ အဆင်မပြေ၊ ဆေးဝါးမရှိတော့လည်း ရောဂါဖြစ်ပွားမှုနှုန်း ပိုများပြားလာတယ်။ ကလေးတွေလည်း ငှက်ဖျားနဲ့ တုပ်ကွေး ဖြစ်နေတာ အများကြီးပဲ” လို့ ပြောပါတယ်။

ကျေးရွာ ၁၀ ရွာက စစ်ဘေးရှောင်နေကြရတဲ့ ပြည်သူတွေထဲမှာ စီသောင်ကျေးရွာက စစ်ရှောင်ပြည်သူ ၂,၀၀၀ ကျော်လောက် ပါဝင်ပြီး ကလေးငယ် ၅၀၀ နီးပါးမှာ ၁၀၀ လောက် သွေးလွန်တုပ်ကွေးနဲ့ ငှက်ဖျားရောဂါ ဖြစ်ပွားနေတာပါ။

ပြီးခဲ့တဲ့ မတ် ၂၁ ရက်မှာ စစ်ကောင်စီတပ်က ရွှေကူမြို့နယ် အရှေ့ဘက်ခြမ်းက ကျေးရွာတွေကို ဝင်ရောက်စီးနင်းပြီး စီသောင်ကျေးရွာက နေအိမ် ၂၀၀ ကျော်၊ စီမူကြီးကျေးရွာက နေအိမ် ၄၀ ကျော်၊ စီမူလေးကျေးရွာက နေအိမ် ၇၀ ကျော်၊ မံနားကျေးရွာက နေအိမ် ၄၀ ကျော်၊ တုံကောက်ကျေးရွာမှာ နေအိမ် ၄၀ ကျော်၊ မံခါးကျေးရွာက နေအိမ် ၃၀ ကျော်၊ မံဝိန်းကျေးရွာမှာ နေအိမ် ၁၀၀ ကျော်၊ စီမော်ကျေးရွာက နေအိမ် ၁၀၀ ကျော်၊ နန့်လတ်ကျေးရွာက နေအိမ် ၃၀ ကျော်၊ နောင်လတ်ကြီးကျေးရွာက နေအိမ် ၃၀ ကျော်နဲ့ စီသာကျေးရွာက နေအိမ် ၁၀၀ ကျော်ကို မီးရှို့ဖျက်ဆီးခဲ့တာကြောင့် ဒေသခံ ၁၀,၀၀၀ နီးပါး နေရပ်စွန့်ခွာ စစ်ဘေးတိမ်းရှောင်နေကြရပါတယ်။

ဘိုလီးဗီးယားနိုင်ငံ အရှေ့ပိုင်းမှာ သွေးလွန်တုပ်ကွေးရောဂါ ဖြစ်ပွားမှုနှုန်းမှာ ဆက်လက် မြင့်တက်နေပြီး ဆေးရုံတွေ၊ ကျန်းမာရေးဌာနတွေမှာလည်း လူတွေပြည့်လျှံနေပြီး ဖျားနာသူတွေ ကို ပြုစုစောင့်ရှောက် ပေးနိုင်စွမ်း ကျော်လွန်နေပြီဖြစ်တာကြောင့် အာဏာပိုင်တွေဟာ ဆေးဘက်ဆိုင်ရာ ကုသရေး ယာယီတဲတွေကို ဖြန့်ကျက် ချထားခိုင်းခဲ့ပါတယ်။ 

သမ္မတ လူးဝစ္စ်အာရ်ဆေးဟာ ဆေးဘက်ဆိုင်ရာဝန်ထမ်းတွေနဲ့ ပစ္စည်းကိရိယာတွေ ထပ်တိုးခြင်း တွေ အပါအဝင် သွေးလွန်တုပ်ကွေး တိုက်ဖျက်ရေး အစီအစဉ်ကို ကြေညာခဲ့ပါတယ်။

မြို့တော်အရှေ့ပိုင်းရှိ လူဦးရေ အထူထပ်ဆုံးနဲ့ ဆင်းရဲနွမ်းပါးတဲ့ ဒေသတွေထဲက ပလန် ၃ ထောင် နယ်မြေလို့ ခေါ်ကြတဲ့ မြူနီစီပယ်ခရိုင် အမှတ် ၈ မှာ ရွှေ့ပြောင်းသွားလာလို့ရတဲ့ မိုဘိုင်းဆေးရုံ တခုကို ထူထောင်ထားပါတယ်။ 

သွေးလွန်တုပ်ကွေးလူနာတွေကို ကုသပေးနိုင်ဖို့ ဆေးရုံကုတင် ၁၄၀ လုံး အမြန် တည်ဆောက်နေကြောင်း နဲ့ ဒါကိုမှ မလောက်သေးရင်လည်း မိုဘိုင်းဆေးရုံမှာ အရေးပေါ်အခြေအနေအတွက် နောက်ထပ် ကုတင် ၄၀ စာလောက် ပြင်ဆင်ထားကြောင်း ကျန်းမာရေးဝန်ကြီး Jeyson Auza က ပြောပါတယ်။ 

ဆေးရုံတွေ၊ လူနာကုတင်တွေ ပြည့်ကျပ်နေမှာကို စိုးရိမ်နေမယ့်အစား လူနာတွေ ဆေးရုံကို မရောက်လာမှာ စိုးရိမ်သင့်ကြောင်းလည်း သူက ဆိုပါတယ်။

သွေးလွန်တုပ်ကွေးလူနာရဲ့ ဆွေမျိုးတယောက်ကတော့ ဒီလိုဆေးကုတဲ့တွေဟာ ဝင်ငွေနည်းတဲ့ သူတွေအတွက် အထောက်အကူဖြစ်စေလို့ သဘောကျကြောင်း ပြောပါတယ်။ 

လမ်းမတွေပေါ်မှာလည်း လူထုနဲ့ အစိုးရဝန်ထမ်းတွေဟာ ရောဂါဖြန့်ဖြူးတဲ့ခြင်တွေ ပေါက်ပွား တတ်တဲ့ အမှိုက်တွေ၊ တာယာတွေနဲ့ မြက်တောတွေကို ရှင်းလင်းနေကြပြီး အာဏာပိုင်တွေက ပန်းခြံတွေနဲ့ နေအိမ်တွေကို ခြင်ဆေးငွေ့ရည်တွေ လိုက်ဖျန်းပေးနေပါတယ်။

ကျန်းမာရေးဝန်ကြီးဌာနက ဒီနေ့အထိ မှတ်တမ်းတင်ထားတဲ့ သွေးလွန်တုပ်ကွေး ဖြစ်ပွားမှု ၉,၆၁၃ ခု ရှိရာမှာ ဆန်တာခရုဇ်ပြည်နယ် တခုထဲမှာပဲ ၇,၂၁၂ မှု ရှိတာကြောင့် ထိခိုက်မှုအများဆုံး ဖြစ်ပါတယ်။ ကလေးငယ်တွေ အပါအဝင် သွေးလွန်တုပ်ကွေးရောဂါကြောင့် သေဆုံးသူ ၂၉ ဦး ရှိနေပါပြီ။