အစ္စရေးနိုင်ငံသမိုင်းမှာ သဘောထားအတင်းမာဆုံး လက်ယာယိမ်းအစိုးရအဖွဲ့တွေထဲက တခုဖြစ်တဲ့ လက်ရှိ ညွန့်ပေါင်းအစိုးရသစ်ဟာ အခုလနှောင်းပိုင်းမှာ အာဏာရယူဖို့ ရှိနေတာကြောင့် အစ္စလာမ္မစ်လှုပ်ရှားမှုအဖွဲ့ ဟားမက်စ် ခေါင်းဆောင်တွေက အာဏာဖီဆန်သွားမှာဖြစ်ကြောင်း ဒီဇင်ဘာ ၁၄ ရက်ကကျင်းပတဲ့ စစ်ရေးပြအခမ်းအနား တခုမှာ သန္နိဋ္ဌာန် ချမှတ်ခဲ့ကြပါတယ်။

ဟားမက်စ်အဖွဲ့ရဲ့ ၃၅ နှစ်ပြည့် နှစ်ပတ်လည်အထိမ်းအမှတ်အဖြစ် ဂါဇာမြို့ရှိ ကတ်တီဘာပန်းခြံ စုဝေးပွဲမှာ အစ္စလာမ္မစ်လှုပ်ရှားမှုခေါင်းဆောင် ယာရာ အယ်လ်-ဆင်းဝါက ပါလက်စတိုင်းတွေဟာ အစ္စရေးတွေနဲ့ ပြောင်ပြောင်တင်းတင်း ထိပ်တိုက်ရင်ဆိုင်နေရတာ ဖြစ်ကြောင်း ပြောဆိုခဲ့တာပါ။

မွတ်ဆလင်တွေရော၊ ဂျူးလူမျိုးတွေပါ အထွတ်အမြတ်ထားကြပြီး တောင်ပေါ်ဘုရားကျောင်းလို့ လူသိများတဲ့ ဂျေရုစလင်မြို့ရှိ အယ်လ်-အက်ခ်ဆာ ဗလီကျောင်းတော်ကို “တယ်လ် မူဒစ်၊ ဖက်စစ်၊ ဇီယွန်ဝါဒီ၊ လက်ယာယိမ်းအစိုးရ” အဖွဲ့က ကျူးကျော်သိမ်းပိုက်မို့ ခြိမ်းခြောက်နေတဲ့အတွက် အင်အားသုံးတုံ့ပြန်မယ်လို့ ဟားမက်စ် ခေါင်းဆောင်က ပြောပါတယ်။

“အဆုံးမရှိတဲ့ ဒုံးကျည်တွေ၊ အဆုံးမရှိတဲ့ စစ်သားတွေနဲ့အတူ သင်တို့ဆီ အရောက်လာခဲ့ပါမယ်” ဆိုပြီး သူက ပြောဆိုခဲ့သလို သဘောထားတင်းမာတဲ့ ဘာသာရေးပါတီတွေနဲ့ အစ္စရေးဝန်ကြီးချုပ် ဘန်ဂျမင် နေတန်ယာဟုရဲ့ ညွန့်ပေါင်းအစိုးရတို့ဟာ “ဘာသာရေးစစ်ပွဲ” ကို ဖိတ်ခေါ်နေတာဖြစ်ကြောင်း စွပ်စွဲပြောဆိုခဲ့ပါတယ်။

၁၀ နှစ်ကျော်ကြာ အစ္စရေးသိမ်းပိုက်ထားတဲ့ အနောက်ဘက်ကမ်းဒေသမှာ အပြင်းထန်ဆုံး အကြမ်းဖက်မှုတွေနဲ့ ဂါဇာဒေသက ခဏတာ ပဋိပက္ခဖြစ်ရပ်တွေအပြီး တနှစ်အကြာမှာ အစ္စရေးဝန်ကြီးချုပ်က သူ့ရဲ့ လီကွတ်ပါတီနဲ့ သဘောထားတင်းမာတဲ့ ဘာသာရေးဆိုင်ရာ ပါတီတွေကို ညွန့်ပေါင်းအစိုးရဖွဲ့ပြီးတော့ ခေါင်းဆောင်အဖြစ် အာဏာရယူဖို့ ပြင်ဆင်လာတာကြောင့် ဟားမက်စ်အဖွဲ့က ခုလိုစုဝေးခဲ့တာ ဖြစ်ပါတယ်။

ဂါဇာကမ်းမြောင်ဒေသကနေ မီးလောင်စေတဲ့ မီးပုံးပျံတွေ လွှတ်တင်နေတာကို တုံ့ပြန်တဲ့ အနေနဲ့ အစ္စရေးလေယာဉ်က ဂါဇာမှာရှိတဲ့ ဟားမတ်စ်တွေရဲ့ တည်နေရာတွေကို သြဂုတ် ၇ ရက်မှာ ဗုံးကြဲ တိုက်ခိုက်ခဲ့တယ်လို့ အစ္စရေး စစ်တပ်က ပြောပါတယ်။

ဂါဇာကိုအုပ်ချုပ်နေတဲ့ ဟားမတ်စ်အစ္စလာမစ်အုပ်စုကပိုင်တဲ့ ခြံဝင်းတစ်ခုနဲ့ ဒုံးကျည် ပစ်လွှတ်နေတဲ့ နေရာကို ပစ်မှတ်ထား တိုက်ခိုက်ခဲ့တာလို့ အစ္စရေးစစ်တပ်က ပြောပြီး ဒီတိုက်ခိုက်မှုကြောင့်ဖြစ်တဲ့ အသေအပျောက် အထိအခိုက် စာရင်းကို ချက်ချင်း မသိရသေးပါဘူး။

ဟားမတ်စ်တွေကလည်း ချက်ချင်း မှတ်ချက် မပေးသေးပါဘူး။ အစ္စရေးနဲ့ ဟားမတ်စ်တို့ ၁၁ ရက်ကြာတိုက်ပွဲဖြစ်အပြီး အပစ်အခတ် ရပ်စဲခဲ့တဲ့ မေ ၂၁ ရက်တည်းက ခုထိ ဂါဇာက ပါလက်စတိုင်းတွေဟာ နယ်စပ်တလျှောက်မှာ မီးလောင်စေတဲ့ ပစ္စည်းတွေ ချိတ်ဆွဲထားတဲ့ မီးပုံးပျံတွေကို ဖောဖောသီသီ လွှတ်တင်ခဲ့တာပါ။

ဒါကြောင့် အစ္စရေးဘက်က လယ်ကွင်းတွေ မီးလောင် ပျက်စီးခဲ့ပါတယ်။ ပါလက်စတိုင်းတွေကတော့ မေလတိုက်ပွဲအတွင်း တင်းကျပ်ခံထားရတဲ့ ကမ်းရိုးတန်းဒေသမှာ ကန့်သတ်ချက်တွေကို ဖြေလျှော့ရေး အစ္စရေးကို ဖိအားပေးဖို့ ရည်ရွယ်ပြီး မီးပုံးပျံတွေ လွှတ်တင်နေတာလို့ ပြောပါတယ်။

 ဂါဇာက ကန့်သတ်ချက်တွေကို အစ္စရေးက ဖြေလျော့ပေးအပြီးမှာ မီးပုံးပျံ လွှတ်တင်တာတွေ လျော့ကျ သွားတယ်လို့ ရိုက်တာသတင်းဌာနက ရေးပါတယ်။

ဒါပေမဲ့ သြဂုတ် ၆ ရက်မှာ ဂါဇာကနေ မီးပုံးပျံတွေ ထပ်ပြီး လွှတ်တင်ခဲ့လို့ အစ္စရေးနဲ့ ဂါဇာ နယ်စပ်နားမှာ မီးလောင်မှု  ၄ ကြိမ် ဖြစ်ခဲ့ပါတယ်။