တရုတ်နိုင်ငံ၊ ဟိုင်နန်ကျွန်းမှာ ကိုဗစ်-၁၉ ကပ်ရောဂါ အဆိုးဆုံးကူးစက်တာကို ရင်ဆိုင်နေရတာကြောင့် အသွားအလာ ထိန်းချုပ်ကန့်သတ်နေပြီး စမ်းသပ်စစ်ဆေးတာတွေ တိုးချဲ့ ဆောင်ရွက်နေတယ်လို့ အစိုးရမီဒီယာက ဩဂုတ် ၉ ရက်မှာ ကြေညာပါတယ်။

စမ်းသပ်ခံဖို့ ဒါဇင်ချီတဲ့လူတွေ စီတန်း စောင့်ဆိုင်းနေပုံကို အစိုးရရုပ်သံ စီစီတီဗွီက ပြသခဲ့ပါတယ်။

ပြည်နယ်ရဲ့မြို့တော် စန်းယာမှာ နယ်မြေတွေကို လော့ဒေါင်းချထားပြီး အရံအတားတွေ ချထားပါတယ်။ 

ခရီးသွားလုပ်ငန်းကို မှီခိုနေရတဲ့ ဟိုင်နန်ကျွန်း တောင်ဘက်စွန်းက စန်းယာမြို့တော်မှာ ဩဂုတ် ၈ ရက်က ရောဂါလက္ခဏာပြတဲ့ ကူးစက်ခံ ၂၃၄ ယောက်နဲ့ လက္ခဏာမပြတဲ့ ကူးစက်ခံ ၁၄၅ ယောက်ကို တွေ့ခဲ့တယ်လို့ ကြေညာထားပါတယ်။

မနှစ်က ပြည်တွင်းကူးစက်ခံ ၂ ယောက်သာ မှတ်တမ်းတင်ခဲ့တဲ့ ဟိုင်နန်မှာ ခုတော့ ဒီတလတည်းမှာ ပြည်တွင်းကူးစက်ခံ အယောက် ၁,၅၀၀ ကျော်ခဲ့တာပါ။

လူဦးရေ ၇ သန်းရှိတဲ့ ပြည်နယ်အတွင်း မြို့ ၉ ခုထက်မနည်းမှာ ဒေသခံတွေဟာ မရှိမဖြစ် အလုပ်တွေ သွားလုပ်ဖို့၊ စားသောက်ကုန်ဝယ်ဖို့နဲ့ ကိုဗစ်စမ်းသပ်ချက်လို အကြောင်းပြချက်တွေကလွဲလို့ သူတို့နေတဲ့ နေရာကနေ မထွက်ရဘူးလို့ ပြောထားပါတယ်။

ကူးစက်မှုကြောင့် ဟိုင်နန်မှာ အများပြည်သူဆိုင်ရာ သယ်ယူပို့ဆောင်ရေး ဝန်ဆောင်မှုတွေကိုပါ ဆိုင်းငံ့ထားပါတယ်။

ကမ္ဘာပေါ်မှာ ကြွေးမြီအများဆုံး တရုတ်အိမ်ခြံမြေလုပ်ငန်း အဲဗားဂရန်းဒ်  Evergrande ရဲ့ ဟိုင်နန် အပန်းဖြေကျွန်းပေါ်က ဆောက်လက်စ ၃၉ ထပ် တာဝါကို တရုတ်အာဏာပိုင်တို့က ဇန်နဝါရီ ၁၀ ရက်မှာ အပြီးဖြိုချခိုင်းထားပါတယ်။ 

တာဝါကို ဖြိုချခါနီးမှာ ရိုက်တာသတင်းဌာနက  ဒရုန်းနဲ့ ဗွီဒီယို မှတ်တမ်းတင်ထားခဲ့ပါတယ်။

အဲဗားဂရန်းဒ် Evergrande ကုမ္ပဏီဟာ ပြည်ပဘွန်းစာချုပ် ဒေါ်လာ ဘီလီယံ ၂၀ အပါအဝင်၊ ဒေါ်လာဘီလီယံ ၃၀၀ ကျော် ကြွေးမြီတင်ရှိနေတာပါ။ 

အခု ဟိုင်နန်ကျွန်းအပမ်းဖြေကမ်းခြေမှာ တည်ဆောက်နေတဲ့ ဒေါ်လာ ၁၃ ဘီလီယံ တန်ဖိုးရှိ အိမ်ခန်း ၆၀၀၀၀ ပါ၊ ၃၉ ထပ်  တာဝါကို တရုတ်အစိုးရက သဘာဝပတ်ဝန်းကျင်နဲ့ မညီဘူးဆိုပြီး ဖြိုချခိုင်းတာပါ။

Evergrande ကုမ္ပဏီအုပ်စုအနေနဲ့ အဆောက်အအုံထဲ ရင်းနှီးမြှုပ်နှံထားတဲ့ အစုရှယ်ယာဝင်တွေ ကို ခြောက်လအတွင်း ပြန်လျော်ကြေးပေးဖို့ ဖိအားတွေ ပိုများလာနေပါတယ်။