ကဆုန်လပြည့်နေ့၊ ဗုဒ္ဓနေ့အထိမ်းအမှတ်အနေနဲ့ စစ်ကောင်စီက  နိုင်ငံရေးအကျဥ်းသား ၂၀၀၀ ကျော်ပြန်လွှတ်ပေးတဲ့အထဲမှာ ပြည်ထောင်ကနေ နိုင်ငံရေးအကျဥ်းသား စုစုပေါင်း ၄၈ ယောက်၊ ပေါင်းတည်ထောင်က ၃ ယောက် လွတ်မြောက်ခဲ့တယ်လို့ ဒေသခံ နိုင်ငံရေးအကျဉ်းသား အသိုက်အဝန်းကနေ သိရပါတယ်။

ထောင်ရှေ့မှာ သွားကြိုနေတဲ့ နိုင်ငံရေးအကျဥ်းသား မိသားစုဝင်တယောက်က “ပြည်ထောင်မှာက ပထမ စာရင်းရတာက ၄၉ ယောက်၊ အဲ့ဒီမှာ တယောက်က တခြားပုဒ်မ တခုက ကျန်နေတော့ ၄၈ ယောက်ဖြစ်သွားတာ။ အမျိုးသား ၃၆ ယောက်၊ အမျိုးသမီး ၁၂ ယောက်တို့ပဲလွတ်တာ။ အားလုံးက ၅၀၅ တွေပဲ။ အခုမနက် ၁၀ နာရီ မိနစ် ၅၀ မှာ ပထမအသုတ်အနေနဲ့ စလွှတ်နေပြီ” လို့ ပြောပါတယ်။

ပေါင်းတည်ထောင်ကတော့ မနက် ၁၀ နာရီမှာ စလွှတ်ပြီး ၅၀၅ ပုဒ်မ တပ်ထားတဲ့ ကိုမြခိုင်၊ ကိုအောင်ဆန်းလင်းနဲ့ မသီတာတို့ပဲ လွတ်လာကြပြီး သူတို့အားလုံးက နတ္တလင်းမြို့နယ်ထဲမှာ နေတဲ့သူတွေဖြစ်တယ်လို့ ပေါင်းတည်ထောင်ရှေ့ သွားစောင့်နေသူ နိုင်ငံရေးအကျဥ်းသား မိသားစုဝင်တယောက်က ပြောပါတယ်။

သာယာဝတီထောင်မှာတော့ အင်းစိန်ထောင်ကနေ ထောင်ပြောင်းလာသူ ၁၂ ယောက်နဲ့ လက်ပံတန်းမြို့မှာနေသူတယောက် ပြန်လွတ်တယ်လို့ စာရင်းသိရပြီး အခုထိတော့ အပြင်မရောက်သေးဘူးလို့ သာယာဝတီထောင် ဝန်ထမ်းတယောက်ထံက သိရပါတယ်။

စစ်ကောင်စီက ကဆုန်လပြည့်နေ့၊ ဗုဒ္ဓနေ့အထိမ်းအမှတ်အနေနဲ့ ပြည်သူတွေ စိတ်နှလုံးချမ်းသာအောင်၊ လူသားအချင်းချင်းစာနာမှုတွေနဲ့ အကျဥ်းထောင်အသီးသီး၊ အချုပ်ထောင်အသီးသီး၊ စခန်းအသီးသီးကနေ ရာဇဝတ်ကျင့်ထုံး ပုဒ်မ ၅၀၅(က) နဲ့ ပြစ်ဒဏ်ကျခံနေရသူ ၂,၁၅၃ ယောက်ကို မတ်လ ၃ ရက် နေ့စွဲနဲ့ လွှတ်ပေးလိုက်တယ်လို့ ကြေညာထားပါတယ်။

လွတ်မြောက်ခဲ့သူတွေက ပုဒ်မ ၄၀၁၊ အပိုဒ် ၁ အရ နောက်ထပ် တစုံတရာ ပြစ်မှုကျူးလွန်ရင် ပထမလက်ကျန်နှစ်ကို ပြန်ခံရမယ်လို့ သတင်းထုတ်ပြန်ထားပါတယ်။

ဗင်နီဇွဲလားနိုင်ငံက ပြည်ထဲရေးဝန်ကြီးဟောင်း မီဂဲလ်ရိုဒရီဂွက်ဇ်တောရက်စ်ဟာ ၅ နှစ်နီးပါး ထောင်ဒဏ်ကျခံရပြီးနောက် ဇန်နဝါရီ ၂၁ ရက်မှာ တရားရုံးက သူ့ကို အကျဉ်းထောင်ကနေ ပြန်လွှတ်ပေးလိုက်ပြီလို့ အရာရှိဟောင်းရဲ့ ဆွေမျိုးဖြစ်သူတွေက အတည်ပြုပါတယ်။

စပိန်နိုင်ငံဆီကို သွားဖို့လည်း တရားရုံးက ခွင့်ပြုပေးခဲ့တယ်လို့ ဆိုပါတယ်။ ဒီအရာရှိဟောင်းဟာ ၂၀၀၄ ခုနှစ်တုန်းက ပြည်ထဲရေးဝန်ကြီးအဖြစ် တာဝန်ယူခဲ့ပြီး စစ်တပ်ကနေ အငြိမ်းစားယူထားတဲ့ ဗိုလ်ချုပ်ကြီးတဦးလည်း ဖြစ်ပါတယ်။

ဒါပေမဲ့ နောက်ပိုင်းမှာမှ ဗင်နီဇွဲလားသမ္မတ နီကိုလက်စ် မာဒူရိုနဲ့ အဆင်မပြေဖြစ်လို့ နိုင်ငံရဲ့ လက်နက်ကိုင်တပ်ဖွဲ့ စည်းလုံးညီညွတ်မှုကို ဖြိုခွဲမှု ကြံစည်ရာမှာ ပါဝင်ခဲ့တယ်ဆိုတဲ့ စွပ်စွဲချက်ကြောင့် သူ့ကို ၂၀၁၈ ခုနှစ်မှာ ဖမ်းဆီးထိန်းသိမ်းခဲ့တာပါ။

ပြည်ထဲရေးဝန်ကြီးဟောင်းဟာ ၄ နှစ်နဲ့ ၁ဝ လကြာ မတရားဖမ်းဆီး အကျဉ်းချခံရပြီးနောက် ဇန်နဝါရီ ၂၁ ရက်၊ မနက်အစောပိုင်းမှာ သူ့ကိုလွှတ်ပေးလိုက်ပြီလို့ သမီးဖြစ်သူနဲ့ ဆွေမျိုးတွေရဲ့ ရေးသားထုတ်ပြန်ချက်ထဲမှာ တွေ့ရပါတယ်။

ဆွေမျိုးဖြစ်သူတဦးကလည်း ရိုဒရီဂွက်ဇ်တောရက်စ် အနေနဲ့ စပိန်နိုင်ငံကို ပြောင်းရွှေ့မယ်လို့ ပြောပေမဲ့ တခြားအသေးစိတ် အချက်အလက်ကိုတော့ မပြောခဲ့ပါဘူး။

ဗင်နီဇွဲလား အစိုးရရှေ့နေရုံးကတော့ မှတ်ချက်ပေးဖို့ တောင်းဆိုမှုအပေါ် ချက်ချင်း မတုံ့ပြန်ပါဘူး။ ၂၀၁၉ ခုနှစ်တုန်းကလည်း တိုက်ပိတ်အကျဉ်းချခံရလို့ ရိုဒရီဂွက်ဇ် တောရက်စ်က အစာငတ်ခံ ဆန္ဒပြခဲ့ဖူးပါတယ်။

၂၀၁၄ ခုနှစ်၊ အတိုက်အခံ ဆန္ဒပြပွဲတွေ ပေါ်ပေါက်နေချိန်မှာ ပြည်ထဲရေးဝန်ကြီးအဖြစ် တာဝန်ယူခဲ့တဲ့ ရိုဒရီဂွက်ဇ် ကိုယ်တိုင်ဟာလည်း အကျဉ်းသားတွေအပေါ် ဆက်ဆံပုံနဲ့ ပတ်သက်ပြီး အပြင်းအထန်ဝေဖန်တာ ခံခဲ့ရဖူးပါတယ်။

အဲဒီတုန်းက လက်လွတ်စပယ် ဖမ်းဆီးထိန်းသိမ်းမှုတွေနဲ့ အကျဉ်းကျနေစဉ်အတွင်း ရိုက်နှက် နှိပ်စက်မှုတွေ ရှိတယ်လို့ လူ့အခွင့်အရေးအဖွဲ့တွေက ဝေဖန်ထောက်ပြခဲ့ကြပါတယ်။