စစ်မက်ဖြစ်ပွားနေတဲ့ ရုရှားနဲ့ယူကရိန်းနိုင်ငံတို့အကြား ဧပြီလ ၁၀ ရက်မှာ အရေးပါတဲ့ အကျဉ်းသားလဲလှယ်မှုတစ်ရပ် ထပ်မံ ပြုလုပ်ခဲ့ ပါတယ်။

ရုရှားဘက်က အကျဉ်းသား ၁၀၆ ဦးနဲ့ ယူကရိန်းဘက်က အကျဉ်းသားဦးရေ ၁၀၀ တို့ကို အပြန် အလှန် လဲလှယ်ခဲ့တယ်လို့ နှစ်ဖက်စလုံးက အတည်ပြုပါတယ်။ 

ယူကရိန်းသမ္မတရဲ့ လက်ထောက်ဖြစ်သူ အန်ဒရီယာမက်ခ်က ဒီလို လွတ်မြောက်လာတဲ့ ယူကရိန်းနိုင်ငံသားတွေထဲမှာ မာရီယူပိုးလ်မြို့ အပါအဝင် အဲ့ဒီမြို့ရဲ့  အဇို့ဗ်စတယ်သံမဏိ စက်ရုံကို ခုခံကာကွယ်ပေးခဲ့သူတွေ ပါဝင်တယ်လို့ တယ်လီဂရမ်ထဲကပို့စ်တစ်ခုမှာပြောထားပါတယ်။

ဒီလူတွေဟာ ရုရှားကျူးကျော်စစ် စတင်ခဲ့တဲ့ လပိုင်းတွေမှာ ဖမ်းဆီးခံခဲ့ရတာပါ။ ရုရှားကာကွယ်ရေးဝန်ကြီးဌာနကတော့ စေ့စပ်ညှိနှိုင်းရေး လုပ်ငန်းစဉ်အပြီးမှာ အခုလို အကျဉ်းသားတွေ လွတ်မြောက်လာခဲ့တာလို့ ပြောပါတယ်။ 

၂၀၂၂ ခုနှစ် ဖေဖော်ဝါရီလကစလို့ ရုရှားနဲ့ ယူကရိန်းကြားမှာ အခါအားလျော်စွာ အကျဉ်းသားလဲလှယ်မှုတွေ ရှိခဲ့ပြီး ဒါဟာ နှစ်ဖက်အကြား ရှားပါးလှတဲ့ တိုက်ရိုက်ထိတွေ့မှုလည်း ဖြစ်ပါတယ်။

အမေရိကန်နိုင်ငံနဲ့ ရုရှားနိုင်ငံတို့အကြား အကျဉ်းသားလဲလှယ်မှု အစီအစဉ်အရ ရုရှားလက်နက်ကုန်သည် ဗစ်တာဘောက်ထ်နဲ့ အမေရိကန် ဘတ်စကက်ဘော အကျော်အမော် ဘရစ်တနီဂရိုင်းနာတို့ကို ဒီဇင်ဘာ ၉ ရက်က အဘူဒါဘီလေဆိပ်မှာ အလဲအလှယ် လုပ်ခဲ့ပါတယ်။

မော်စကိုမြို့ကို ပြန်လည်ရောက်ရှိလာတဲ့ ဗစ်တာဘောက်ထ်ဟာ မိခင်ဖြစ်သူနဲ့ အမျိုးသမီးကို ပွေ့ဖက်ပြီး ကတ္တရာလမ်းမပေါ် သူဆက်လျှောက်သွားနေခဲ့တာကို ရုပ်မြင်သံကြား တိုက်ရိုက်ထုတ်လွှင့်မှုမှာ မြင်တွေ့ရပါတယ်။

ဂရိုင်းနာကတော့ ဒီဇင်ဘာ ၉ ရက် မနက်မှာ တက္ကဆက်ကို ဦးတည်ပျံသန်းနေတဲ့ လေယာဉ်ပေါ်မှာ စီးနင်းနေဆဲဖြစ်ပြီး ဆန်အန်တိုနီယိုရှိ ကယ်လီ စစ်တပ်အခြေစိုက်စခန်းကို ‌ရောက်ရှိမှာဖြစ်ပါတယ်။

အသက် ၅၅ နှစ်အရွယ် ဘောက်ထ်ဟာ သူ့ရဲ့ လက်နက်ရောင်းဝယ်ရေးလုပ်ငန်းအပေါ် အမေရိကန်ရဲ့ စွဲချက်တွေကြောင့် ၂၀၁၂ ခုနှစ်မှာ တရားရုံးက ထောင်ဒဏ် ၂၅ နှစ် ချမှတ်ခံခဲ့ရတာပါ။

ဘောက်ထ်ဟာ နှစ်ပေါင်း ၂၀ နီးပါး လူဆိုးနိုင်ငံတွေ၊ သူပုန်အဖွဲ့တွေနဲ့ အာဖရိက၊ အာရှနဲ့ တောင်အမေရိကရှိ လူသတ်စစ်ဘုရင်တွေဆီ လက်နက်တွေရောင်းချပြီးတော့ ကမ္ဘာ့နာမည်ဆိုးနဲ့ အကျော်ကြားဆုံး လက်နက်ရောင်းဝယ်သူ ဖြစ်လာခဲ့ပါတယ်။

အသက် ၃၂ နှစ်အရွယ် အိုလံပစ်ရွှေတံဆိပ်ဆု ၂ ခုပိုင်ရှင် ဂရိုင်းနာကတော့ ရုရှားနိုင်ငံမှာ တားမြစ်ထားတဲ့ ဆေးခြောက်အဆီပါ စီးကရက်အစားထိုး ပြွန်တောင့်တွေကို ခရီးဆောင်အိတ်ထဲမှာ တွေ့ရှိခဲ့တာကြောင့် မော်စကိုလေဆိပ်မှာ ဖေဖော်ဝါရီ ၁၇ ရက်က ဖမ်းဆီးခံခဲ့ရပါတယ်။

ဂရိုင်းနာကို မူးယစ်ဆေးဝါး လက်ဝယ်ပိုင်ဆိုင်မှုနဲ့ ရောင်းဝယ်ဖောက်ကားမှုစတဲ့ ပြစ်မှုဆိုင်ရာ စွဲချက်တွေနဲ့ ပြီးခဲ့တဲ့ သြဂုတ် ၄ ရက်က ထောင်ဒဏ် ၉ နှစ် ချမှတ်ထားတာပါ။ သူကတော့ အပြစ်ရှိတယ်လို့ ဝန်ခံထားပြီး ဒါဟာ ရိုးရိုးသားသား မှားယွင်းခဲ့တာသာဖြစ်ပြီး ဥပဒေကိုချိုးဖောက်ဖို့ မရည်ရွယ်ခဲ့ဘူးလို့ ပြောပါတယ်။

အမေရိကန်သမ္မတ ဘိုင်ဒင်ဟာ ဘောက်ထ်ကိုလဲလှယ်ဖို့ ဆုံးဖြတ်ချက်ချပြီးနောက်မှာ ပြီးခဲ့တဲ့ ၄၈ နာရီအတွင်း စီစဉ်မှုတွေကို လုပ်ဆောင်ခဲ့ကြောင်း အိမ်ဖြူတော်က ပြောကြားခဲ့ပါတယ်။