စစ်မက်ဖြစ်ပွားနေတဲ့ ရုရှားနဲ့ယူကရိန်းနိုင်ငံတို့အကြား ဧပြီလ ၁၀ ရက်မှာ အရေးပါတဲ့ အကျဉ်းသားလဲလှယ်မှုတစ်ရပ် ထပ်မံ ပြုလုပ်ခဲ့ ပါတယ်။

ရုရှားဘက်က အကျဉ်းသား ၁၀၆ ဦးနဲ့ ယူကရိန်းဘက်က အကျဉ်းသားဦးရေ ၁၀၀ တို့ကို အပြန် အလှန် လဲလှယ်ခဲ့တယ်လို့ နှစ်ဖက်စလုံးက အတည်ပြုပါတယ်။ 

ယူကရိန်းသမ္မတရဲ့ လက်ထောက်ဖြစ်သူ အန်ဒရီယာမက်ခ်က ဒီလို လွတ်မြောက်လာတဲ့ ယူကရိန်းနိုင်ငံသားတွေထဲမှာ မာရီယူပိုးလ်မြို့ အပါအဝင် အဲ့ဒီမြို့ရဲ့  အဇို့ဗ်စတယ်သံမဏိ စက်ရုံကို ခုခံကာကွယ်ပေးခဲ့သူတွေ ပါဝင်တယ်လို့ တယ်လီဂရမ်ထဲကပို့စ်တစ်ခုမှာပြောထားပါတယ်။

ဒီလူတွေဟာ ရုရှားကျူးကျော်စစ် စတင်ခဲ့တဲ့ လပိုင်းတွေမှာ ဖမ်းဆီးခံခဲ့ရတာပါ။ ရုရှားကာကွယ်ရေးဝန်ကြီးဌာနကတော့ စေ့စပ်ညှိနှိုင်းရေး လုပ်ငန်းစဉ်အပြီးမှာ အခုလို အကျဉ်းသားတွေ လွတ်မြောက်လာခဲ့တာလို့ ပြောပါတယ်။ 

၂၀၂၂ ခုနှစ် ဖေဖော်ဝါရီလကစလို့ ရုရှားနဲ့ ယူကရိန်းကြားမှာ အခါအားလျော်စွာ အကျဉ်းသားလဲလှယ်မှုတွေ ရှိခဲ့ပြီး ဒါဟာ နှစ်ဖက်အကြား ရှားပါးလှတဲ့ တိုက်ရိုက်ထိတွေ့မှုလည်း ဖြစ်ပါတယ်။