သီရိလင်္ကာနိုင်ငံမှာ သမ္မတ ရာဂျာပက်စာကို ရာထူးကနေ ဖယ်ရှားဖို့ မေ ၁၉ ရက် ဆန္ဒပြနေကြတဲ့ ကျောင်းသားတွေကို ရဲအဖွဲ့က မျက်ရည်ယိုဗုံး၊ မီးသတ်ရေပိုက်တွေကို အသုံးပြုပြီး လူစု ခွဲခဲ့ပါတယ်။ 

ရာနဲ့ချီတဲ့ ကျောင်းသားတွေဟာ ကိုလံဘိုမြို့လယ်တဝိုက် ချီတက်ပြီး အစိုးရဆန့်ကျင်ရေး ကြွေးကြော်ဆန္ဒပြနေစဉ် ဖြိုခွင်းခံလိုက်ရတာပါ။ 

ရဲတပ်ဖွဲ့က မျက်ရည်ယိုဗုံးတွေနဲ့ ရေပိုက်တွေကို သုံးပြီး ဆန္ဒပြသမားတွေကို အကြိမ်ကြိမ် လူစုခွဲဖို့ ကြိုးစားခဲ့ပါတယ်။ 

“သီရိလင်္ကာအစိုးရဟာ လူငယ်တွေကို သတ်ဖြတ်နေတယ်။ ဒါဟာ မှားယွင်းတဲ့လုပ်ရပ်ပဲ၊ ရာဂျာပက်စာဟာ အကြမ်းဖက်သမားပဲ” လို့ ဆန္ဒပြသမားတယောက်က ပြောပါတယ်။

သီရိလင်္ကာနိုင်ငံမှာ ကိုဗစ်-၁၉ ကပ်ဘေးကြောင့် ခရီးသွားလုပ်ငန်းကျဆင်းပြီး တိုင်းပြည် ကျပ်တည်းလာတဲ့အချိန်မှာ ယူကရိန်းစစ်ပွဲကို အကြောင်းပြုလို့ လောင်စာဆီဈေးနှုန်းပါ မြင့်တက်လာတာကြောင့် ဆယ်စုနှစ်တွေအတွင်း အဆိုးရွားဆုံး စီးပွားရေး ပျက်ကပ်နဲ့ ကြုံတွေ့ နေရပါတယ်။ 

တိုင်းပြည်စီးပွားရေးပြဿနာတွေကို အစိုးရက မဖြေရှင်းပေးနိုင်တာကြောင့် ဆန္ဒပြပွဲတွေ ပေါ်ပေါက်နေပြီး အရင်တပတ်က သမ္မတနဲ့ ညီအစ်ကိုတော်တဲ့ ဝန်ကြီးချုပ် မဟင်ဒါ နုတ်ထွက်ပြီး အစိုးရတွင်း အပြောင်းအလဲတွေ လုပ်ခဲ့ရပါတယ်။ 

ဒါပေမယ့် အစိုးရ ဆန့်ကျင်သူတွေက မကျေနပ်သေးဘဲ သမ္မတ ရာဂျာပက်စာပါ နုတ်ထွက်ပေးဖို့ ဆက်လက်တောင်းဆိုနေကြပါတယ်။  

စစ်ကိုင်းတိုင်း၊ မုံရွာနဲ့ ရွှေဘိုမြို့က အရုဏ်ဦးသပိတ်စစ်ကြောင်းတွေကို စစ်ကောင်စီအကြမ်းဖက်တပ်တွေက အကြမ်းဖက်ဖြိုခွင်းဖမ်းဆီးတာတွေ ပြုလုပ်ခဲ့တယ်လို့ မေလ ၂ ရက်နေ့ ကနဦးသတင်းတွေအရ သိရပါတယ်။

မုံရွာမြို့၊ ထန်းတောရပ်ကွက်၊ ဘုရာနီလမ်းခေါ် အာဇာနည်လမ်းပေါ်က အရုဏ်ဦးသပိတ်စစ်ကြောင်းကို အကြမ်းဖက် စစ်ကောင်စီတပ်တွေက ပိတ်ဆို့ကာ အကြမ်းဖက် ရိုက်နှက်ဆဲဆိုဖမ်းဆီးတာတွေ ပြုလုပ်ခဲ့ပြီး ပြည်သူ ၃ ဦးထက်မနည်း ဖမ်းဆီးခံခဲ့ရတယ်လို့ ဒေသခံသတင်းရင်းမြစ်တွေက ပြောပါတယ်။ 

ဒါ့အပြင် ရွှေဘိုမြို့မှာလည်း အရပ်ဝတ်တွေပါဝင်တဲ့ စစ်ကောင်စီအကြမ်းဖက်တပ်တွေက အရုဏ်ဦးဆိုင်ကယ်သပိတ်စစ်ကြောင်း စုဝေးနေချိန်မှာ ကားနဲ့ဝင်တိုက်ဖမ်းဆီးတာတွေရှိခဲ့ပြီး အများအပြားဖမ်းဆီးခံရတယ်လို့ ကနဦးသိရပါတယ်။ ဖမ်းဆီးခံရသူအရေအတွက် အသေးစိတ်ကိုတော့ မသိရသေးပါဘူး။ 

သပိတ်စစ်ကြောင်း အကြမ်းဖက်ခံခဲ့ရပေမယ့် လူငယ်တွေက ဆက်လက်စုဝေးချီတက်ခဲ့ကြတယ်လို့ သိရပါတယ်။ 

ဒီနေ့က ကမ္ဘာလုံးဆိုင်ရာ မြန်မာ့နွေဦးတော်လှန်ရေးနေ့အဖြစ် အနယ်နယ်အရပ်ရပ်က ပြည်သူတွေ စုပေါင်းကာ စစ်အာဏာရှင်ကို ဆန့်ကျင်ကန့်ကွက် တော်လှန်တဲ့နေ့လည်း ဖြစ်ပါတယ်။