ကွင်းထဲမှာ စီရော်နယ်ဒို ဆက်ရှိနေသမျှ အနိုင်ရဖို့ အခွင့်အရေးတစ်ခု အမြဲတမ်းရှိတယ်လို့ မန်ယူ နည်းပြ ဆိုးလ်ရှားက ချီးကျူးပါတယ်။
စီရော်နယ်ဒိုဟာ မနေ့ညက ကစားခဲ့တဲ့ ဗီလာရီးယဲလ်နဲ့ ချန်ပီယံလိဂ်အုပ်စုပွဲစဉ်မှာ ပွဲပြီးခါနီးအနိုင်ဂိုး သွင်းယူပေးခဲ့ပြီး ပထမဆုံးနိုင်ပွဲရရှိစေခဲ့တာပါ။
စီရော်နယ်ဒိုဟာ ဘောလုံးထိချက် များသည်ဖြစ်စေ၊ နည်းသည်ဖြစ်စေ ကိစ္စမရှိဘဲ ပွဲချိန်တိုင်းမှာ အခွင့်အရေးကို အမိအရ ရယူနိုင်စွမ်းရှိပြီး သူ့ရဲ့ ကစားသမားဘဝတစ်လျှောက်မှာလည်း သက်သေပြသခဲ့ပြီးဖြစ်တယ်လို့ ရော်နယ်ဒိုကို ဆိုးလ်ရှားက ပွဲအပြီးမှာ ချီးကျူးခဲ့တာပါ။
“ကွင်းထဲမှာ ခရစ္စတီယာနိုရှိတိုင်း အခွင့်အရေးဆိုတာလည်း အမြဲတမ်းရှိတယ်။ သူက ဂိုးရှေ့မှာ အလွန်ကောင်းပြီး အသင်းဖော်တွေအတွက်တင်မဟုတ်ဘဲ ပရိသတ်တွေနဲ့ တစ်သင်းလုံးအတွက်ပါ အကျိုးသက်ရောက်မှုရှိစေပါတယ်။”
ရော်နယ်ဒိုအနေနဲ့ လွန်ခဲ့တဲ့တစ်လက ကစားခဲ့တဲ့ အိုင်ယာလန်နဲ့ပွဲမှာလည်း ပင်နယ်တီမဝင်ခဲ့ပေမယ့် ပွဲပြီးခါနီးမှာ ခမ်းနားတဲ့ ခေါက်တိုက်ဂိုး ၂ ဂိုးနဲ့ အသင်းကို ပြန်လည်ဆွဲတင်ပေးနိုင်ကြောင်း၊ ရော်နယ်ဒိုရဲ့ ကစားသမားဘဝတစ်လျှောက်မှာ အဲဒီလို အမြဲတမ်းလုပ်ဆောင်နိုင်ခဲ့ကြောင်း နည်းပြဆိုးလ်ရှားက ချီးကျူးခဲ့ပါတယ်။
မန်ချက်စတာယူနိုက်တက်အသင်းဆီ ပြောင်းရွှေ့လာတဟာ နောက်တစ်ဆင့်တက်ဖို့အတွက် အခွင့် အရေးကောင်းတခုဖြစ်တယ်လို့ စီရော်နယ်ဒိုက ပြောပါတယ်။
စီရော်နယ်ဒိုဟာ မနေ့က အိုးထရက်ဖို့ဒ်ကွင်းကို ပြန်လည်ခြေချခဲ့ပြီး သူ့အတွက်ရော အသင်းနဲ့ ပတ်သက်သူတွေအတွက်ပါ နောက်တစ်ဆင့်တက်ဖို့ အခွင့်အရေးတစ်ခုဖြစ်တယ်လို့ အသင်းမီဒီယာကို ပြောခဲ့တာပါ။
“ကျနော်က အသင်းဖောေတွေနဲ့အတူ စွမ်းဆောင်နိုင်စွမ်းရှိပါသေးတယ်။ ရှေ့ဆက်သွားဖို့ အဆင်သင့်ပါပဲ။ ကျနော့်အတွက် အခွင့်အရေးကောင်းတစ်ခုဖြစ်သလိေ အသင်းနဲ့ ပရိသတ်တွေအတွက်လည်း အခွင့်အရေးကောင်းတစ်ခုပါပဲ။ နောက်ထပ် ၃ နှစ် ၄ နှစ်လောက်အထိ အသင်းအတွက် ထိပ်တန်းကစားသမားတစ်ဦးအဖြစ် ဆက်ရှိနေမယ်လို့ ထင်ပြီး အဲဒီအတွက်လည်း အဆင်သင့်ဖြစ်နေပါပြီ” လို့ စီရော်နယ်ဒိုက ပြောပါတယ်။
ရော်နယ်ဒိုဟာ စနေနေ့ ကစားမယ့် နယူးကာဆယ်နဲ့ ပရီးမီးယားလိဂ်ပွဲစဉ်မှာ ယူနိုက်တက်အတွက် တစ်ကျော့ပြန်ပွဲထွက်ကစားပေးသွားဖို့ ရှိနေပါတယ်။
