ကချင်ပြည်နယ်၊ ဗန်းမော်မြို့နယ်မှာ စစ်ကောင်စီလက်အောက်ခံ အခွန်ဦးစီးဌာနနဲ့ စည်ပင်သာယာဌာနဝန်ထမ်းတွေက ပြည်သူလူထုတွေထံကနေ နှစ်ဟောင်းက ကြွေးကျန် အခွန်အခတွေကို လိုက်လံကောက်ခံနေပါတယ်။
စစ်အာဏာသိမ်းပြီး ၂ နှစ်တာ ကာလ အတွင်း အခွန်အခ လိုက်လံကောက်ခံတာမရှိပဲ ၂၀၂၃ ခုနှစ် မတ်လပိုင်းကျမှ ၂ နှစ်စာ စုပေါင်းပြီး ပြန်လည်ကောက်ခံနေတာဖြစ်တဲ့အတွက် အခက်အခဲတွေနဲ့ကြုံတွေ့နေရတယ်လို့ ဒေသခံတွေဆီက သိရပါတယ်။
ဗန်းမော်ဒေသခံ အမျိုးသားတစ်ဦးက "အရင် မကောက်ခဲ့တဲ့ အခွန်အခတွေ ခုမှ နှစ် နှစ်စာ ပေါင်းပြီး ဆောင်ခိုင်းတယ်။ အာဏာသိမ်းပြီးနောက်ပိုင်းကတည်းက အမြတ်ခွန် အိမ်ခွန် စတာတွေကို နှစ် နှစ်စာ ပေါင်းပြီး ဆောင်ခိုင်းတယ်။ လူတွေ က စီးပွားရေးကျပ်တည်းနေတာကို အခွန်အခတွေ စုပေါင်းပြီး ဆောင်နေရမယ်ဆိုရင် အဆင်မပြေဘူး "လို့ ပြောပါတယ်။
စီးပွားရေးလုပ်ငန်းနဲ့ပတ်သက်တဲ့ အမြတ်ခွန်ကိုတော့ မြို့နယ်အခွန်ဦးစီးဌာနကနေ အခွန်လာရောက်ဆောင်ဖို့ ဖုန်းဆက်အကြောင်းကြားတာဖြစ်ပြီး နေအိမ်ခွန် လုပ်ငန်းခွန်ကိုတော့ စည်ပင်သာယာ NON CDMဝန်ထမ်းတွေက အရပ်ဝတ်တွေနဲ့ နေအိမ်တွေမှာ လိုက်လံကောက်ခံနေတာပါ။
အမြတ်ခွန်ကိုတော့ ဆိုင်အကြီးအသေး ပေါ်မူတည်ပြီး ကျပ် ငါးသောင်းကနေ သိန်းဆယ်ဂဏန်းအထိ ပေးဆောင်ရတဲ့ ဆိုင်တွေရှိပြီး ၂ နှစ်စာ တစ်ပါတည်း မပေးဆောင်နိုင်ပါက နှစ်ကြိမ် ခွဲပေးရမှာ ဖြစ်ကြောင်း လည်း သိရပါတယ်။
ထိုင်းနိုင်ငံ အမျိုးသားခရီးသွားလာရေးမူဝါဒကော်မတီရဲ့ အဆိုတင်သွင်းမှုအရ ထိုင်းနိုင်ငံကို လာရောက်မယ့် ခရီးသွားတဦးကို ဘတ် ၁၅၀ ကနေ ဘတ် ၃၀၀ အထိ အခွန်ကောက်ခံမယ့် အဆိုပြုချက်ကို ထိုင်းအစိုးရအဖွဲ့က ဖေဖော်ဝါရီ ၁၄ ရက်မှာ ခွင့်ပြုပေးခဲ့ပါတယ်။
ထိုင်းနိုင်ငံကို လေကြောင်းနဲ့လာရောက်တဲ့ ခရီးသွားတဦးကို ဘတ် ၃၀၀ (အမေရိကန်ဒေါ်လာ ၈ ဒသမ ၇ ဒေါ်လာ)၊ ရေကြောင်းနဲ့ ကုန်းလမ်းက လာရောက်တဲ့ ခရီးသွားတဦးကို ဘတ် ၁၅၀ (အမေရိကန်ဒေါ်လာ ၄ ဒသမ ၃၅ ဒေါ်လာ) ကောက်ခံမှာဖြစ်ပြီး ၂၀၂၃ ခုနှစ် ဇွန်လ ၁ ရက်နေ့မှာ စတင်ကောက်ခံသွားမယ်လို့ ထိုင်းနိုင်ငံဝန်ကြီးချုပ်ရုံး ပြောရေးဆိုခွင့်ရှိသူတဦးက ဆိုပါတယ်။
အခွန်ကောက်ခံတဲ့နေရာမှာ အမျိုးသားခရီးသွားလာရေးမူဝါဒဥပဒေအရ တရားဝင် နိုင်ငံကူးလက်မှတ် ကိုင်ဆောင်ထားသူတွေ ထိုင်းနိုင်ငံမှာ လာရောက်လုပ်ကိုင်မယ့် နိုင်ငံခြားသား အလုပ်သမားတွေနဲ့ အသက် ၂ နှစ်အောက် ကလေးငယ်တွေအပြင် ထပ်ဆင့်အကူးအပြောင်း ခရီးသွားတွေကိုလည်း ကောက်ခံသွားမှာဖြစ်ပြီး ကောက်ခံရရှိတဲ့ အခွန်တွေကို ဒေသတွင်း ခရီးသွားလာမှု ဖွံ့ဖြိုးတိုးတက်ရေးနဲ့ ထိုင်းနိုင်ငံမှာရှိနေတဲ့အချိန် အဲဒီနိုင်ငံခြားသား ခရီးသွားတွေရဲ့ အာမခံအတွက် အသုံးပြုသွားမယ်လို့ ခရီးသွားလာရေးနဲ့ အားကစားဝန်ကြီးဌာန တာဝန်ရှိသူတဦးက ပြောပါတယ်။
ထိုင်းနိုင်ငံ ခရီးသွားကဏ္ဍဟာ ကိုဗစ် -၁၉ ကပ်ရောဂါအပြီး ပြန်လည်ဦးမော့လာခဲ့တာဖြစ်ပြီး ၂၀၂၂ ခုနှစ်မှာ နိုင်ငံခြားသားခရီးသွား ၁၁ သန်းကျော် ဝင်ရောက်ခဲ့တယ်လို့ ထိုင်းနိုင်ငံ ခရီးသွားမှတ်တမ်းတွေအရ သိရပါတယ်။