အခွန်လိမ်လည်မှုနဲ့ တရားရင်ဆိုင်နေရတဲ့ ကိုလံဘီယာအဆိုတော် ရှာကီရာရဲ့ အယူခံဝင်မှုကို စပိန်တရားရုံးက ပယ်ချလိုက်ပြီး စွပ်စွဲချက်နဲ့ပတ်သက်လို့ တရားရင်ဆိုင်ဖို့ လုံလောက်တဲ့ သက်သေအထောက်အထားတွေ ပေးပို့ဖို့ ကနဦးဆုံးဖြတ်ချက်ကို မေ ၂၆ ရက်က အတည်ပြုလိုက်လိုက်ပါတယ်။

အဆိုတော် ရှာကီရာဟာ ၂၀၁၂ ကနေ ၂၀၁၄ ခုနှစ်အတွင်း ရရှိတဲ့ ဝင်ငွေအပေါ် အခွန် ယူရို ၁၄သန်းခွဲအထိပေးဆောင်ဖို့ ပျက်ကွက်ခဲ့တယ်လို့ အစိုးရရှေ့နေတွေက အခိုင်အမာ ပြောဆိုထားပါတယ်။

ရှာကီရာဟာ စပိန်ကို ၂၀၁၅ ခုနှစ်ကျမှ ပြောင်းရွှေ့ခဲ့တာဖြစ်ပြီး အဲဒီအချိန်ကတည်းက သူ့ရဲ့အခွန်တာဝန်အားလုံးကို ပေးဆောင်ထားပြီးဖြစ်ကြောင်း ကိုလံဘီယာ ပေါ့ပ်စတားရဲ့ ကိုယ်စားလှယ်တွေက ပြောကြားပေမဲ့လည်း စပိန်ရှေ့နေတွေက ရှာကီရာဟာ အဲ့ဒီနှစ်ပိုင်းတွေက စပိန်နိုင်ငံမြောက်ပိုင်းက ကတ်တလိုနီးယားဒေသမှာ နေထိုင်ခဲ့ကြောင်း သူတို့က ချေပထားပါတယ်။

ဆုံးဖြတ်ချက်အသစ်ဟာ ၂၀၂၁ ခုနှစ် ဇူလိုင်လက ထုတ်ပြန်ခဲ့တဲ့ တရားရုံးကို သွားစရာမလိုတဲ့ ကြိုတင်တရားစီရင်ချက်ကို အတည်ပြုထားတာဖြစ်ပြီး တရားရုံးအနေနဲ့ ရှာကီရာကို ရုံးတင်စစ်ဆေးပြီး ရက်စွဲသတ်မှတ်ဖို့ တရားဝင်အကြောင်းကြားစာ ပေးပို့ရဦးမှာပါ။

ရှာကီရာရဲ့ တရားရေးအဖွဲ့ကတော့ သူတို့ဟာ ဒီအမှုကို ခိုင်မာတဲ့ တရားဥပဒေကြောင်းအရ ငြင်းခုံမှုတွေနဲ့ ဆက်လက်ခုခံကာကွယ်သွားမှာဖြစ်ကြောင်း မေ ၂၆ ရက်က ထုတ်ပြန်ချက်မှာ ဖော်ပြထားပါတယ်။

“အခွန်ကိစ္စနဲ့ပတ်သက်ပြီး ရှာကီရာရဲ့ တာဝန်ကျေမှုကတော့ သူ အခွန်ပေးဆောင်ရတဲ့ နိုင်ငံတိုင်းမှာ အမြဲ အမှားအယွင်းမရှိ အပြစ်ကင်းကြောင်းနဲ့ သူဟာ အတော်ဆုံးပညာရှင်တွေနဲ့ အကြံပေးတွေရဲ့ အကြံပြုချက်တွေကို ယုံကြည်ပြီး သစ္စာရှိရှိ လိုက်နာခဲ့ပါတယ်” လို့ ထုတ်ပြန်ချက်မှာ ဖော်ပြထားပါတယ်။

အသက် ၄၅ နှစ်အရွယ် အဆိုတော် ရှာကီရာဟာ ဘာစီလိုနာ ဘောလုံးအသင်း နောက်ခံလူ ပီကေးနဲ့ ၂၀၁၁ ခုနှစ်ကတည်းက အတူနေထိုင်ခဲ့ကြပြီး သူတို့မှာ ကလေးနှစ်ယောက် ရှိပါတယ်။

ထရမ့် ကုမ္ပဏီအဖွဲ့အစည်းရဲ့ သက်တမ်းရှည် ဘဏ္ဍာရေးအရာရှိချုပ် အလန်ဝိုင်ဆယ်လ်ဘာ့ဂ်ကို  နယူးယောက်တရားရုံးက အခွန်လိမ်လည်မှုနဲ့ တရားစွဲထားပါတယ်။ 

နယူးယောက်အစိုးရရှေ့နေတွေရဲ့နှစ်ပေါင်းများစွာ စုံစမ်းစစ်ဆေးမှုအပြီးမှာ သမ္မတဟောင်း ထရမ့်ရဲ့ ကုမ္ပဏီအဖွဲ့အစည်းအပေါ် ပထမဦးဆုံး ပြစ်မှုဆိုင်ရာစွဲချက် တင်နိုင်လိုက်တာဖြစ်ပြီး ကြီးမားကျယ်ပြန့်တဲ့ တရားမဝင်ငွေပေးချေမှု အစီအစဉ်တွေကြောင့် အခွန်နဲ့ဆက်နွှယ်နေတဲ့ ရာဇဝတ်မှုတွေကို ကျူးလွန်မှုနဲ့ တရားစွဲထားတာပါ။ 

ထရမ့်မိသားစုအတွက် နှစ်ပေါင်း ၅၀ နီးပါး အလုပ်လုပ်လာခဲ့တဲ့ အသက် ၇၆ နှစ်အရွယ် ဘဏ္ဍာရေးမှူးချုပ် ဝိုင်ဆယ်လ်ဘာ့ဂ် ဟာ ဇူလိုင် ၁ ရက် မနက် ၆ နာရီမှာတော့ မန်ဟက်တန်ရာဇဝတ်မှုရုံးမှာ အပြစ်ဝန်ခံလိုက်ပါတယ်။

ဝိုင်ဆယ်လ်ဘာ့ဂ်ဟာ နယူးယောက်အစိုးရရှေ့နေတွေနဲ့ သမ္မတဟောင်းတို့အကြား မြင့်တက်နေတဲ့ ပဋိက္ခရဲ့ နောက်ဆုံးအဆင့်မှာ ငှားရမ်းခ အခမဲ့တိုက်ခန်းတွေ၊ ကျောင်းလခနဲ့ ကားတွေအပါအ၀င် ကုမ္ပဏီကပေးထားတဲ့ အခွင့်အရေးတွေနဲ့ အကျိုးခံစားခွင့်တွေအပေါ် အခွန်စည်းကြပ်မှုနဲ့ပတ်သက်ပြီး စနစ်တကျအစီရင်ခံဖို့ ပျက်ကွက်တာကြောင့် မန်ဟက်တန်ခရိုင်ရှေ့နေက စွဲချက်တင်ခဲ့တာဖြစ်ပါတယ်။ 

အစိုးရရှေ့နေတွေရဲ့ အဆိုအရ ထရမ့်အဖွဲ့အစည်းဟာ ၀န်ထမ်းငှားရမ်းခ၊ အိမ်ငှားခ၊ ကားဂိုဒေါင်ခ၊ ကျောင်းကုန်ကျစရိတ်နဲ့ တခြားလူနေမှု စရိတ်တွေကို စနစ်တကျ မကြေညာပဲ ဝင်ငွေ ဒေါ်လာ ၁ ဒသမ ၇၆ သန်းကို ဖုံးကွယ်ထားပြီး ပေးဆောင်ခဲ့တာကြောင့် သူတို့ဟာ ပေးဆောင်သင့်တဲ့ ပမာဏထက် သိသိသာသာ လျော့နည်းတဲ့ပမာဏကိုပဲ ဖက်ဒရယ်အခွန်၊ ပြည်နယ်ခွန်၊ ဒေသန္တရအခွန်တွေကို လျှော့ပေါ့ပြီး ပေးဆောင်တာလို့ ဆိုပါတယ်။ 

ထရမ့်အဖွဲ့အစည်းကို စွဲချက်တင်တာဟာ ဘဏ်တွေ၊ စီးပွားရေး လုပ်ဖော်ကိုင်ဖက်တွေနဲ့ ကုမ္ပဏီရဲ့ဆက်ဆံရေးကို အားနည်းစေပြီး ၂၀၂၄ မှာ သမ္မတရာထူးအတွက် ထပ်မံယှဉ်ပြိုင်ဖို့ စဉ်းစားနေတဲ့ ထရမ့်ရဲ့ နိုင်ငံရေးအနာဂတ်ကို ရှုပ်ထွေးစေနိုင်ပါတယ်။ 

ထရမ့်အဖွဲ့အစည်းကတော့ ခရိုင်ရှေ့နေဟာ ထရမ့်မိသားစုလုပ်ငန်း အတွက် ၄၈ နှစ်ကြာ အလုပ်လုပ်ခဲ့တဲ့  ဝိုင်ဆယ်လ်ဘာ့ဂ်ကို အသုံးချပြီး သမ္မတဟောင်းကို ထိခိုက်အောင် ကြိုးပမ်းနေတာလို့ ထုတ်ပြန်ကြေညာချက်ထဲမှာ ပြောထားပါတယ်။