လာမယ့်ရာသီမှာ ပီအက်စ်ဂျီအသင်းကနေ မက်ဆီထွက်ခွာနိုင်ကြောင်း အသင်းဖော်ဟောင်း အဂွဲရိုးက ပြောပါတယ်။
တိုက်စစ်မှူးဟောင်း အဂွဲရိုးဟာ မက်ဆီနဲ့ ရင်းနှီးတဲ့ဆက်ဆံရေးရှိသူဖြစ်ပါတယ်။ မက်ဆီဟာ အခုနှစ် ရာသီအကုန်မှာ ပီအက်စ်ဂျီနဲ့ စာချုပ်သက်တမ်း ကုန်ဆုံးမှာဖြစ်ပေမဲ့ သက်တမ်းတိုး စာချုပ်ချုပ်ဖို့ ကြန့်ကြာနေဆဲ ဖြစ်ပါတယ်။
မက်ဆီဟာ သူ့ရဲ့ ပထမဆုံး ကလပ်ဖြစ်တဲ့ မွေးရပ်မြေက နယူးဝဲလ်အိုးဘွိုင်းအသင်းဆီ ပြန်ကစားဖို့ စိတ်ကူးရှိပြီး လာမယ့်ရာသီမှာ ဖြစ်လာနိုင်ခြေရှိတယ်လို့ အဂွဲရိုးက UOL နဲ့ အင်တာဗျူးမှာ ပြောပါတယ်။
မက်ဆီဟာ နယူးဝဲလ်အိုးဘွိုင်းအသင်းမှာ လူငယ် ကစားသမားအဖြစ် ၅ နှစ်ကြာ ကစားခဲ့သူ ဖြစ်ပါတယ်။
မွေးရပ်မြေ ကလပ်ဆီ မသွားဖြစ်ရင်လည်း အမေရိကန်မေဂျာလိဂ်ကလပ် အင်တာမီယာမီ အသင်းဆီလည်း ပြောင်းရွှေ့နိုင်ခြေ ရှိတယ်လို့ သိရပါတယ်။
အာဆင်နယ်အသင်းဟာ ပရီးမီးယားလိဂ်ချန်ပီယံဆုအတွက် လီဗာပူး၊ မန်စီးတီးအသင်းတွေကို စိန်ခေါ် နိုင်လိမ့်မယ်လို့ စီးတီးတိုက်စစ်မှူးဟောင်းအဂွဲရိုးကပြောပါတယ်။
Stake.com နဲ့ အင်တာဗျူး အစီအစဉ်မှာ ပရီးမီးယားလိဂ်ချန်ပီယံဆုနဲ့ ပတ်သက်ပြီးသုံးသပ်ရာမှာ အာဆင်နယ်အသင်းရဲ့ခြေစွမ်းကိုပါ ချီးကျူးပြောသွားတာပါ။၏
ချန်ပီယံဆုအတွက် မန်စီးတီး၊ လီဗာပူးနဲ့ ချဲလ်ဆီးတို့ကို ရွေးချယ်ရမှာ ဖြစ်ပြီး အာဆင်နယ်ကိုလည်း အဲဒီစာရင်းမှာထည့်သွင်းချင်ကြောင်း အဂွဲရိုးကပြောပါတယ်။
အာဆင်နယ်ရဲ့ ခြေစွမ်းအမှန်ကို စောင့်ကြည့်ရဦးမှာဖြစ်ပေမဲ့ နည်းပြအာတေတာရဲ့လက်အောက်မှာ ခမ်းနားတဲ့စီမံကိန်းနဲ့သွားနေပြီး ဒီရာသီမှာ တစ်ခုခုလုပ်ပြနိုင်လိမ့်မယ်လို့ အဂွဲရိုးကပြောပါတယ်။
အဂွဲရိုးဟာ မန်စီးတီးမှာကစားစဉ်က အဲဒီတုန်းက အသင်းလက်ထောက်နည်းပြ အာတေတာနဲ့ ရင်းနှီး တဲ့ဆက်ဆံရေးရှိသူပါ။ ဒါ့အပြင် မန်စီးတီးတိုက်စစ်မှူး ဂျူလီယန်အယ်လ်ဗာရက်ဇ်ဟာလည်း အသင်းနဲ့အတူ အောင်မြင်မှုတွေရယူနိုင်မယ့်သူလို့ အဂွဲရိုးက ပြောပါတယ်။
