ရန်ကုန်မြို့၊ မင်္ဂလာဒုံမြို့နယ်၊ ပတ္တမြားမြို့သစ်မှာရှိတဲ့ ရပ်ကွက် ၅ ခုက လူနေအိမ်ခြေ ၁၀,၀၀၀ ကျော်ကို စစ်ကောင်စီလက်အောက်ခံ မင်္ဂလာဒုံမြို့နယ် စီမံအုပ်ချုပ်ရေးအဖွဲ့က ဘူဒိုဇာနဲ့ အင်အားသုံး ဖယ်ရှားနေတဲ့အပြင် ဘုန်းကြီးကျောင်း၊  သီလရှင်ကျောင်း၊  သိမ်၊ စေတီတော် အပါအဝင် သာသနိကအဆောက်အဦတွေကိုပါ နိုဝင်ဘာ ၃၀ ရက် နောက်ဆုံးထား ဖျက်သိမ်းဖို့ ဖိအားပေး လုပ်ဆောင်နေတယ်လို့ သာသနာ့ဝန်ထမ်းတဦးက ပြောပါတယ်။

မင်္ဂလာဒုံမြို့နယ် သံဃနာယကမှာ သာသနာရေးဝန်ကြီးဌာန၊ မြို့နယ်အထွေထွေအုပ်ချုပ်ရေး ဦးစီးဌာနနဲ့ စစ်ကောင်စီရဲ့ ဦးပိုင်ကုမ္ပဏီတို့ရဲ့ ကိုယ်စားလှယ်တွေက အဆိုပါရပ်ကွက်တွေက ဆရာတော်တွေကို ကျောင်းနဲ့ စေတီတော်တွေ နှစ်ရက်အတွင်း ဖျက်သိမ်းပေးဖို့ ဆင့်ခေါ်ပြောဆိုခဲ့တာဖြစ်ပြီး မြေအစားထိုး ပြန်ပေးဖို့ အစီအစဉ် မရှိဘူးလို့ သိရပါတယ်။

“အရှင်ဘုရားတို့ နှစ်ရက်အတွင်းပေါ့၊ ဒီကနေ့နဲ့ မနက်ဖြန်ကို ‌ဖယ်ပေးပါတဲ့။ နှစ်ရက်အတွင်း ဖယ်ပေးရင် ကိုယ့်ပစ္စည်းကိုယ် အေးအေးဆေးဆေး ယူလို့ရမယ်တဲ့။ တကယ်လို့ နှစ်ရက်ကျော်သွားရင် အကြမ်းဖက်မယ့် ပုံစံမျိုးကို ပြောတာ” လို့ ဒေသခံ သာသနာ့ဝန်ထမ်းတဦးက ပြောပါတယ်။

ဒီဖြစ်စဉ်တွေရဲ့အစဟာ စစ်ကောင်စီရဲ့ ကာကွယ်ရေးဌာနပိုင် မြေပိုင်နက်နဲ့ ပျဉ်းမပင်စက်မှုဇုန် ဧရိယာ ၅၆၀ ဒသမ ၀၆ ဧကလို့ဆိုကာ နှစ် ၂၀ ကျော်ကြာ အရပ်သားတွေ နေထိုင်လာတဲ့ ရပ်ကွက် ၅ ခုကို နိုဝင်ဘာ ၁၈ ရက်မှာ ဖျက်သိမ်းရာက စတင်ခဲ့တာပါ။

ပြောင်းရွှေ့ဖို့ ကျောင်းနေရာ မရှိသေးဘဲ ပစ္စည်းတွေကို ရင်းနှီးတဲ့ ဘုန်းကြီးကျောင်းတွေမှာ ထားခဲ့ပြီး သီတင်းသုံးနေတဲ့ ရဟန်းတွေနဲ့ စာသင်သား ကိုရင်တွေကတော့ သူတို့ရွာကိုပဲ ပြန်ဖို့ စီစဉ်နေကြရပါတယ်။

ရပ်ကွက် ၅ ခုထဲက ဂုံညင်းနီရပ်ကွက်မှာ ဘုန်းကြီးကျောင်း ၆ ကျောင်း၊ သီလရှင်ကျောင်း ၁ ကျောင်း၊ မြဲမြံအောင်ရပ်ကွက်မှာ ၂ ကျောင်းနဲ့ ဓမ္မပါလရပ်ကွက်မှာ ၂ ကျောင်း၊ စုစုပေါင်း ၁၁ ကျောင်းရှိ သိမ်နဲ့ စေတီတော်တွေ ဖျက်သိမ်းခံနေရပြီး လာဖျက်တဲ့သူတွေက အထက်က ခိုင်းလို့ ဖျက်ရတာဖြစ်တယ်လို့ သိရပါတယ်။

အဆိုပါရပ်ကွက်ရှိ သာသနာ့ဝန်ထမ်းတဦးက “သူတို့တွေက မေးလိုက်တဲ့အခါကျတော့ အထက်ကလုပ်ခိုင်းတာပါ၊ ဘုရားတပည့်တော်‌တို့က ဘာမှမသိပါဘူး၊ ဘုရားတပည့်တော်တို့က ဆုံးဖြတ်ပိုင်ခွင့် မရှိပါဘူးဘုရား၊ မသိဘူးချည်းပဲ ပြောတာ” လို့ ပြောပါတယ်။

အဆိုပါ အိမ်တွေ၊ ဘုန်းကြီးကျောင်းတွေ ဖျက်သိမ်းခံရတာကြောင့် သာသနာ့ဝန်ထမ်းတဦး စိတ်ဝေဒနာ ခံစားခဲ့ရတဲ့အပြင် ဆွဲကြိုးချသေဆုံးသူ အရပ်သား ၂ ဦးထက်မနည်း ရှိခဲ့သလို ဘူဒိုဇာနဲ့ အင်အားသုံး လိုက်ဖျက်နေတာကို မှတ်တမ်းဓာတ်ပုံရိုက်ကူးလို့ ဒေသခံ ၃ ဦး ဖမ်းဆီးခံခဲ့ရပါသေးတယ်။

ရန်ကုန်၊ မန္တလေးနဲ့ ပဲခူး အပါအဝင် မြန်မာနိုင်ငံတဝန်း မြို့တိုင်းလိုလိုမှာ ကျူးကျော်ရပ်ကွက်တွေကို စစ်ကောင်စီက အဓမ္မဖိအားပေး ဆက်လက်ရှင်းလင်းနေတယ်လို့ ဒေသခံတွေထံက သိရပါတယ်။ 

အရင်က ကျူးကျော်ရပ်ကွက်က နေအိမ်တွေကို မြို့နယ်အလိုက် ရှင်းလင်းတာ ရှိခဲ့ပေမဲ့ အခုအချိန်မှာတော့ တစ်နိုင်ငံလုံး အတိုင်းအတာနဲ့ တပြိုင်တည်းရှင်းဖို့ ဇန်နဝါရီ ၂ ရက်ကတည်းက  ရပ်ကွက်အလိုက် သက်ဆိုင်ရာ အုပ်ချုပ်ရေးမှူးတွေနဲ့ စစ်ကောင်စီတပ်ဖွဲ့ဝင်တွေက ဖိအားပေး လိုက်လံ သတိပေးနေတယ်လို့ ကျူးကျော်ရပ်ကွက်နေပြည်သူတွေက ပြောပါတယ်။ 

မန္တလေးက ညောင်ကွဲရပ်ကွက် အောင်ချမ်းသာရပ်ကွက်နဲ့ တခြားကျူးကျော်ရပ်ကွက်တွေ၊ ရန်ကုန် ဖယ်ရှားဖို့ ကျန်နေသေးတဲ့ လှိုင်သာယာ၊ ဒလ၊ ဆိပ်ကမ်းမြို့နယ်တွေနဲ့ ရထားသံလမ်းဘေး နေပြည်သူတွေတွေကို ဖယ်ရှားရှင်းလင်းနေတာပါ။

ပဲခူးအစရှိတဲ့ တိုင်းဒေသကြီးတွေရဲ့ မြို့နယ်တချို့မှာတော့ ဇန်နဝါရီ ၁၂ ရက်ထက် နောက်မကျဘဲ ပြောင်းရွှေ့ဖို့၊ နေအိမ်အဖျက်ပြဖို့တွေ လုပ်ဆောင်ရမယ်လို့ ပြောဆိုထားပါတယ်။ 

ကျူးကျော်ရပ်ကွက်နေ ရပ်ကွက်နေ ပြည်သူတစ်ဦးက "အကြမ်းဖက်စစ်ကောင်စီကတော့ ကျနော်တို့ရပ်ကွက်တွေမှာ PDF တွေ အများဆုံးစုနေတတ်တယ် ခိုလှုံတတ်တယ်ဆိုပြီး  လာရောက်စစ်ဆေးတာတွေ ရှာဖွေတာတွေ ရှိတယ်။ အခုလည်း ဒီအတွက်ပဲ အမြန်ပြောင်းရွှေ့ခိုင်းတာလို့မြင်ပါတယ်။ မနက်ဖြန်မှ တစ်ခုခု အဖျက်မပြနိုင်ရင်တော့ တစ်ခုခုလုပ်မယ် ထင်ပါတယ်“လို့ ပြောပါတယ်။ 

ဖယ်ရှားရှင်းလင်းခံရတဲ့ ပြည်သူသောင်းနဲ့ချီ ရှိနေပြီး သူတို့အတွက် စစ်ကောင်စီက တစုံတရာနေထိုင်ရေးစီစဉ်ပေးတာမျိုးလည်း မရှိပါဘူး။

ကျူးကျော်ရပ်ကွက်နေ ပြည်သူတွေဟာ စားဝတ်နေရေး မပြေလည်သူတွေများတာကြောင့် အခုလို စစ်အာဏာသိမ်းမှုနဲ့၊ ကိုဗစ်ကြောင့် စီးပွားရေး ကျပ်တည်းနေတဲ့အတွက်  ချက်ချင်း ပြောင်းရွှေ့ဖို့ကလည်း အခက်အခဲရှိနေကြပါတယ်။

ကျူးကျော်ရပ်ကွက်နေ ပြည်သူတစ်ဦးက  "အသနားခံစာတင်တဲ့သူတွေလည်းရှိတယ်။ ဒါပေမဲ့ အကြောင်းတော့ထူးမယ်မထင်ဘူး။ တချို့မြို့ခံတွေကလည်း ကျူးကျော်ရပ်ကွက်တွေကို ပျောက်သွားစေချင်ကြတယ်။ ကျူးကျော် ရပ်ကွက်တွေက ဒုစရိုက်မှုတွေနဲ့ အကြမ်းဖက်တာတွေ ရှိနေတော့ သူတို့ပပျောက်စေချင်တာတော့ မမှားပါဘူး။ ကျနော်တို့အနေနဲ့လည်း စီးပွါးရေးအကျပ်အတည်းကြောင့် ခိုကိုးစရာနေရာတစ်ခုအဖြစ်နဲ့ ဒီနေရာမှာ မှီခိုနေရတာပါ။"လို့ ပြောပါတယ်။

ပြီးခဲ့တဲ့ ဒီဇင်ဘာလကလည်း ကျူးကျော်ရပ်ကွက်နေ ပြည်သူတွေကို အတင်းအကျပ် ဖယ်ရှားတာတွေကို ရပ်တန့်ဖို့နဲ့ ပြောင်းရွှေ့ပေးရတဲ့ နစ်နာသူမိသားစုတွေကို စားစရာနဲ့ ထောက်ပံ့ကြေးငွေပေးဖို့ကို ကုလသမဂ္ဂအထူးကိုယ်စားလှယ်တွေက တောင်းဆိုထားပါတယ်။

စစ်အာဏာမသိမ်းခင် အန်အယ်လ်ဒီအစိုးရဟာ ကျူးကျော်တွေအတွက် စာရင်းကောက်ယူမှုတွေ၊ စမတ်ကတ်တွေထုတ်ပေးတာနဲ့ တန်ဖိုးနည်းအိမ်ရာ စီမံကိန်းဖော်ဆောင်ဖို့တွေ လုပ်ဆောင်ပေးခဲ့ပေမဲ့ ဒီအစီအစဉ် မပြီးပြတ်သေးခင် အာဏာသိမ်းခံခဲ့ရပါတယ်။ 

စစ်အာဏာသိမ်းမှု နောက်ပိုင်းမှာတော့ ကျူးကျော်ရပ်ကွက်က ဆန္ဒပြပွဲတွေကို စစ်ကောင်စီတပ်တွေက အပြင်းအထန်အကြမ်းဖက် ဖြိုခွင်းတာတွေလည်း လုပ်ဆောင်ခဲ့ရပါတယ်။

ကျူးကျော်ရပ်ကွက်တွေဟာ PDF ရဲဘော်တွေ ခိုလှုံနိုင်တယ်ဆိုပြီး ကျူးကျော်ရပ်ကွက်နေ ပြည်သူတွေကို အမြန်ဆုံးပြောင်းရွှေ့ပေးဖို့ စစ်ကောင်စီဘက်က လုပ်ဆောင်နေတာလို့  ယူဆသူတွေလည်း ရှိပါတယ်။

ပြီးခဲ့တဲ့နှစ် ဒီဇင်ဘာလမှာလည်း ကျူးကျော်ရပ်ကွက်တွေကို စစ်ကောင်စီက အကြမ်းဖက် ဖယ်ရှားမှုတွေကြောင့် ကျူးကျော်ရပ်ကွက်နေ မိသားစု ၈၀၀၀ ကျော် လူဦးရေ သောင်းနဲ့ချီ အိုးမဲ့အိမ်မဲ့ဖြစ်ခဲ့ရပြီ ထောက်ပံ့ကြေး မရရှိဘဲ အခက်အခဲတွေနဲ့ ရင်ဆိုင်ကြုံတွေ့ခဲ့ရပါတယ်။ 

စစ်တပ်အာဏာသိမ်းထားချိန်ကို အခွင့်ကောင်းယူ အာဏာသုံးပြီး  ကျူးကျော်တွေကို ဖယ်ရှားရှင်းလင်းကာ ဒီနေရာတွေမှာ စစ်ကောင်စီနဲ့ နီးစပ်ရာ အပေါင်းပါတွေဟာ မြေကွက်ရိုက်ရောင်းစားတာတွေ လုပ်ဆောင်နေကြတယ်လို့လည်း သတင်းတွေ ထွက်ပေါ်နေပါတယ်။