အင်္ဂလန်နောက်ခံလူ မက်ဂွဲယားအနေနဲ့ ကမ္ဘာ့ဖလားပွဲ မသွားခင်မှာ စိတ်ပညာရှင်နဲ့ ကုသဖို့ ဂယ်ရီနဗီးလ်က တိုက်တွန်းလိုက်ပါတယ်။

မန်ယူနောက်ခံလူ မက်ဂွဲယားဟာ ကလပ်အသင်းမှာ ပွဲထွက်ခွင့်မရပေမဲ့ အင်္ဂလန်အသင်းမှာ ပွဲထွက်ကစားခွင့် ရထားသူပါ။

သူဟာ ၃ ဂိုးစီ သရေကျခဲ့တဲ့ ဂျာမနီနဲ့ပွဲစဉ်မှာ အမှားအယွင်းတွေ ထပ်မံပြုလုပ်ခဲ့ပြီး စိတ်ပိုင်းဆိုင်ရာမှာ ဖိအားတွေနဲ့ ရင်ဆိုင်နေရတာပါ။

အင်္ဂလန်နောက်ခံလူဟောင်း ဂယ်ရီနဗီးလ်ကတော့ မက်ဂွဲယားဟာ ယုံကြည်မှု ပျောက်ဆုံးနေတဲ့ပြဿနာ ရှိတာကြောင့် ကမ္ဘာ့ဖလားပြိုင်ပွဲမသွားခင်မှာ စိတ်ပညာရှင်နဲ့ တိုင်ပင်ဆွေးနွေးပြီး ကုသစေသင့်ကြောင်း တိုက်တွန်းခဲ့တာပါ။

ကစားသမားဘဝတုန်းက သူကိုယ်တိုင်လည်း ယုံကြည်မှုပျောက်ဆုံးခဲ့လို့ စိတ်ပညာရှင်နဲ့ ကုသခဲ့ရဖူးပြီး မက်ဂွဲယားအနေနဲ့လည်း အလားတူလုပ်ဆောင်သင့်ကြောင်း နဗီးလ်က တိုက်တွန်းပါတယ်။

မက်ဂွဲယားအနေနဲ့ အမှားတွေရှိပေမဲ့ သူ့လောက်ကောင်းမွန်တဲ့ ဗဟိုခံစစ်မှူး မရှိတာကြောင့် အင်္ဂလန်နဲ့အတူ ကမ္ဘာ့ဖလားကို လိုက်ပါသွားရမယ့်သူ ဖြစ်တယ်လို့လည်း နဗီးလ်က သုံးသပ်ပါတယ်။

ခြေစွမ်းနဲ့ ပတ်သက်ပြီးဝေဖန်တာတွေကို ဂရုစိုက်နေမှာမဟုတ်ကြောင်း အင်္ဂလန်နဲ့ မန်ယူနောက်ခံလူ ဟယ်ရီမက်ဂွဲယားက ပြောပါတယ်။

မက်ဂွဲယားဟာ မန်ယူအသင်းမှာပွဲထွက်ခွင့်မရဖြစ်နေပေမယ့် အီတလီကို ၁ ဂိုး ဂိုးမရှိနဲ့ ရှုံးနိမ့်ခဲ့တဲ့ အင်္ဂလန်အသင်းမှာ ပွဲထွက်ကစားခဲ့တာပါ။

သူပွဲထွက်ကစားချိန်မှာ အင်္ဂလန်အသင်း ရှုံးပွဲတွေ့ခဲ့ရသလို နေးရှင်းလိဂ်A ကနေလည်း တန်းဆင်းခဲ့ရတာကြောင့် မက်ဂွဲယားအပေါ် ပရိသတ်တွေက ပိုမိုဝေဖန်ခဲ့ကြတာပါ။ မက်ဂွဲယားကတော့ ဝေဖန်မှုတွေကို ဂရုစိုက်နေမှာမဟုတ်ဘဲ အခွင့်အရေးရလာချိန်မှာကူညီနိုင်ဖို့ပဲ ကြိုးပမ်းသွားမယ်လို့ပြောပါတယ်။

“ကျနော်အားလုံး ကောင်းမွန်ပါတယ်။ ပွဲကစားဖို့လည်းအဆင်သင့်ရှိတယ်လို့ ခံစားရသလို တက်ကြွ လန်းဆန်းမှုလည်းရှိ နေတယ်။ ကျနော့်ခြေစွမ်းအပေါ်မှာတော့ ဘာကြောင့်ပြောနေကြသလဲဆိုတာ နားမလည်ပါဘူး။ သူတို့ပြောနေတာတွေကိုလည်း ကျနော်မဖတ်ပါဘူး။ လူတွေပြောနေတာတွေကို ဘာတခုမှ အာရုံထားမနေပါဘူး။ လူတွေက ကျနော့် အကြောင်းပြောနေတာက ကျနော်ဟာ မန်ချက်စတာယူနိုက်တက်အသင်းခေါင်းဆောင်ဖြစ်နေလို့ပါ။ ဒါက သူတို့အတွက် ခေါင်းစီးသတင်းဖြစ်နေတယ်”လို့ မက်ဂွဲယားကပြောပါတယ်။ 

ကလပ်အသင်းမှာ အရန်ခုံထိုင်ရချိန်မှာ အသင်းကနိုင်ပွဲဆက်နေတာကိုလည်း မက်ဂွဲယားကဝန်ခံခဲ့ပြီး အခွင့်အရေးရလာချိန်မှာ ကူညီနိုင်ဖို့ပဲကြိုးစားနေကြောင်း မက်ဂွဲယားက ဆက်ပြီးပြောသွားပါတယ်။