ဝေဖန်မှုများကို ဂရုမစိုက်ဟု အင်္ဂလန်နောက်ခံလူ မက်ဂွဲယား တုံ့ပြန်
ခြေစွမ်းနဲ့ ပတ်သက်ပြီးဝေဖန်တာတွေကို ဂရုစိုက်နေမှာမဟုတ်ကြောင်း အင်္ဂလန်နဲ့ မန်ယူနောက်ခံလူ ဟယ်ရီမက်ဂွဲယားက ပြောပါတယ်။
မက်ဂွဲယားဟာ မန်ယူအသင်းမှာပွဲထွက်ခွင့်မရဖြစ်နေပေမယ့် အီတလီကို ၁ ဂိုး ဂိုးမရှိနဲ့ ရှုံးနိမ့်ခဲ့တဲ့ အင်္ဂလန်အသင်းမှာ ပွဲထွက်ကစားခဲ့တာပါ။
သူပွဲထွက်ကစားချိန်မှာ အင်္ဂလန်အသင်း ရှုံးပွဲတွေ့ခဲ့ရသလို နေးရှင်းလိဂ်A ကနေလည်း တန်းဆင်းခဲ့ရတာကြောင့် မက်ဂွဲယားအပေါ် ပရိသတ်တွေက ပိုမိုဝေဖန်ခဲ့ကြတာပါ။ မက်ဂွဲယားကတော့ ဝေဖန်မှုတွေကို ဂရုစိုက်နေမှာမဟုတ်ဘဲ အခွင့်အရေးရလာချိန်မှာကူညီနိုင်ဖို့ပဲ ကြိုးပမ်းသွားမယ်လို့ပြောပါတယ်။
“ကျနော်အားလုံး ကောင်းမွန်ပါတယ်။ ပွဲကစားဖို့လည်းအဆင်သင့်ရှိတယ်လို့ ခံစားရသလို တက်ကြွ လန်းဆန်းမှုလည်းရှိ နေတယ်။ ကျနော့်ခြေစွမ်းအပေါ်မှာတော့ ဘာကြောင့်ပြောနေကြသလဲဆိုတာ နားမလည်ပါဘူး။ သူတို့ပြောနေတာတွေကိုလည်း ကျနော်မဖတ်ပါဘူး။ လူတွေပြောနေတာတွေကို ဘာတခုမှ အာရုံထားမနေပါဘူး။ လူတွေက ကျနော့် အကြောင်းပြောနေတာက ကျနော်ဟာ မန်ချက်စတာယူနိုက်တက်အသင်းခေါင်းဆောင်ဖြစ်နေလို့ပါ။ ဒါက သူတို့အတွက် ခေါင်းစီးသတင်းဖြစ်နေတယ်”လို့ မက်ဂွဲယားကပြောပါတယ်။
ကလပ်အသင်းမှာ အရန်ခုံထိုင်ရချိန်မှာ အသင်းကနိုင်ပွဲဆက်နေတာကိုလည်း မက်ဂွဲယားကဝန်ခံခဲ့ပြီး အခွင့်အရေးရလာချိန်မှာ ကူညီနိုင်ဖို့ပဲကြိုးစားနေကြောင်း မက်ဂွဲယားက ဆက်ပြီးပြောသွားပါတယ်။
