အစ္စရေးသိမ်းပိုက်ထားတဲ့ အနောက်ဘက်ကမ်းဒေသမှာ အစ္စရေးစစ်သားတွေက ပါလက်စတိုင်း ၃ ဦးကို ဧပြီ ၁၃ ရက်မှာ ပစ်သတ်ခဲ့ပါတယ်။

သေဆုံးသူထဲ ဆယ်ကျော်သက်တယောက်နဲ့ ရှေ့နေတယောက် ပါတယ်လို့ ပါလက်စတိုင်း ကျန်းမာရေးဝန်ကြီးဌာနက ပြောပါတယ်။

“ဘီသလေဟမ်မြို့အနီးရှိ ဟူဆန်ကျေးရွာက ၁၄ နှစ်သမီး သေဆုံးသွားပါတယ်။ မိန်းကလေးက အစ္စရေးစစ်သားတွေကို ဓာတ်ဆီပုလင်း မီးရှို့ပစ်တာကြောင့် ချက်ချင်း ပစ်သတ်လိုက်ရတာ” လို့ အစ္စရေးစစ်တပ်က ဖြေရှင်းပါတယ်။

မတ်လနှောင်းပိုင်းက အာရပ်လူနည်းစု အုပ်စုအဖွဲ့တွေက ဂျူးလူမျိုး ၁၄ ဦးကို သတ်ဖြတ်ခဲ့တဲ့နောက် အနောက်ဘက်ကမ်းဒေသကို အစ္စရေးတပ်တွေ ပိုပြီး စီးနင်းဝင်ရောက်လာတာပါ။

အစ္စရေးတို့ သိမ်းပိုက်ထားတဲ့ အနောက်ဘက်ကမ်းဒေသ ပါလက်စတိုင်းမြို့ နာဘတ်စ်မှာ ဇန်နဝါရီ ၆ ရက်က အစ္စရေးစစ်သားတွေက ပါလက်စတိုင်းသေနတ်သမားတဦးကို ပစ်သတ်ခဲ့ပါတယ်။

အစ္စရေးစစ်တပ်ပြောရေးဆိုခွင့်ရှိသူက “ပါလက်စတိုင်းသေနတ်သမားတွေက စစ်သားတွေကို စတင်ပစ်လို့ ပြန်ပစ်ခဲ့တာ တဦးသေဆုံးသွားတယ်၊ အလိုရှိနေသူလည်း ဖမ်းမိခဲ့တယ်” လို့ တွစ်တာပေါ်မှာ ‌ရေးထားပါတယ်။

၂၀၁၄ မှာ အမေရိကန်က ကမကထလုပ်ပြီး ပါလက်စတိုင်းနိုင်ငံ ထူထောင်‌ရေးအတွက် အစ္စရေးနဲ့ ဆွေးနွေးမှုတွေ စလုပ်ကတည်းက အနောက်ဘက်ကမ်းဒေသမှာ မကြာခဏ အကြမ်းဖက်မှုတွေ ဖြစ်ပွားနေခဲ့တာပါ။