ဂျပန်နိုင်ငံအနောက်ပိုင်း အိုဆာကာမြို့ရှိ စျေးဝယ်ရပ်ကွက်တစ်ခုမှာ ဒီဇင်ဘာ ၁၇ ရက်နေ့က မီးလောင်မှု ဖြစ်ပွားခဲ့တာကြောင့် အနည်းဆုံး လူ ၂၇ ဦးထက်မနည်း သေဆုံးသွားခဲ့တယ်လို့ NHK သတင်းမှာ ဖော်ပြထားပါတယ်။

အိုဆာကာမြို့လယ်ရှိ ဘူတာရုံအနီးရှိ လူစည်ကားတဲ့ စီးပွားရေးလုပ်ငန်းနေရာတခုမှာရှိတဲ့ ရှစ်ထပ် အဆောက်အအုံရဲ့ စတုတ္ထထပ်မှာ မီးလောင်ခဲ့ပြီး အကြောင်းရင်းကို စုံစမ်းစစ်ဆေးနေတယ်လို့ ရဲတပ်ဖွဲ့က ပြောကြောင်း သတင်းရင်းမြစ်များကို ကိုးကားပြီး ကျိုဒိုသတင်းက ဖော်ပြပါတယ်။ 

မီးလောင်မှုကြောင့် လူ ၂၈ ဦး ထိခိုက်ခဲ့ပြီး သူတို့ထဲက ၂၇ ဦးဟာ နှလုံးရပ်ကာ သေဆုံးခဲ့ကြောင်း၊ အနည်းဆုံး လူ ၂၃ ဦးကို နီးစပ်ရာ ဆေးရုံတွေဆီ ပို့ဆောင်ထားတယ်လို့ အိုဆာကာမြို့ မီးသတ်ဌာနတာဝန်ရှိသူ အကိရ ကိရှိမိုတိုက ပြောပါတယ်။ 

ဒေသစံတော်ချိန် မနက် ၁၀ နာရီလောက်က ဖြစ်ပွားခဲ့တဲ့ မီးလောင်ကျွမ်းမှုဟာ နာရီဝက်အတွင်း မီးငြိမ်းသွားခဲ့ကြောင်း အေအက်ဖ်ပီသတင်းဌာနကို တာဝန်ရှိသူတွေက ပြောကြားခဲ့ပါတယ်။

အဲ့ဒီအထပ်မြင့် အဆောက်အအုံရဲ့ စတုတ္ထထပ်မှာ စိတ်ရောဂါဆေးခန်း၊ အလှပြင်ဆိုင်၊ အဝတ်စတိုးဆိုင်တွေ ဖွင့်ထားပြီး ကျန်အထပ်တွေမှာ အင်္ဂလိပ်ဘာသာကျောင်းအထိ စီးပွားရေးလုပ်ငန်းမျိုးစုံကို ဆောက်လုပ်ထားတာပါ။

ဂျပန်နိုင်ငံမှာ တိုကျိုမြို့တော်ပြီးရင် အကြီးဆုံးဖြစ်တဲ့ အိုဆာကာမြို့ကြီးမှာ တင်းကျပ်တဲ့ အဆောက်အအုံစံနှုန်းတွေ ရှိတာကြောင့် လူအသေအပျောက်များတဲ့ အခုမီးလောင်မှုဟာ ဖြစ်ရိုးဖြစ်စဉ် မဟုတ်ပါဘူး။  

ကျန်ခဲ့တဲ့ သီတင်းပတ်ကုန်ရက်က မိုဇမ်ဘစ်နိုင်ငံမှာ လူ အယောက် ၇ ထောင်နီးပါးကို ဘေးကင်းရာ ရွှေ့ပြောင်းပေးခဲ့ရတဲ့ ဆိုင်ကလုန်းမုန်တိုင်း အဲလိုဝစ်စ်ကြောင့် ထောင်ချီတဲ့ အဆောက်အဦတွေနဲ့ ကောက်ပဲသီးနှံတွေ ပျက်စီးခဲ့ပါတယ်။

 ခုတော့ မုန်တိုင်းဘေးကြောင့် ပျက်စီးမှုကို မှတ်တမ်းတင်တဲ့ ပထမဆုံး အသေးစိတ် အစီရင်ခံစာ ထွက်လာပါပြီ။

  မုန်တိုင်းဟာ မိုးတွေ သွန်ချသလို ရွာခဲ့အပြီး ကုန်းတွင်းပိုင်းကို ဆက်လက် ရွှေ့လျားခဲ့လို့ ဇင်ဘာဘွေ၊ ဆွာဇီလန်နဲ့ တောင် အာဖရိက နိုင်ငံတွေဆီ ဦးတည်ရင်း အားနည်းသွားခဲ့ပါတယ်။

 မိုဇမ်ဘစ်နိုင်ငံရဲ့ ဆိပ်ကမ်းမြို့ ဘေးရာက လမ်းတွေ ရေလွှမ်းပြီး အဆောက်အအုံတွေ ပျက်စီးနေပုံကို ကုလသမဂ္ဂ ကလေးများ ရန်ပုံငွေအဖွဲ့ ယူနီဆက်ဖ်က ဖြန့်ဝေတဲ့ ပုံတွေ ပြထားခဲ့ ပါတယ်။

 စုံစမ်းစစ်ဆေးအပြီး မုန်တိုင်းကြောင့် လူ ၁၂ ယောက် ဒဏ်ရာရပြီး လူ ၆၈၉၅ ယောက် ဘေးကင်းရာ ရွှေ့ပြောင်းခဲ့ရတယ်လို့ မိုဇမ်ဘစ် အမျိုးသားကပ်ဘေးစီမံခန့်ခွဲရေးနဲ့ လျော့ချရေး အဖွဲ့ INGDက ဇန်နဝါရီ ၂၄ ရက်မှာ ပြောပါတယ်။

 ဒေသတွင်း ဘူဇီခရိုင်ကတော့ လေတိုက်နှုန်း ၁ နာရီ ၁၅၀ ကီလိုမီတာထိ ပြင်းတဲ့ လေပြင်းတွေ ရိုက်ခတ်တာ ခံခဲ့ရပါတယ်။

 စိုက်ပျိုးမြေ ဟက်တာ ၁၄၀၀၀၀ ပါး၊ ကျောင်း ၉ ကျောင်းပျက်စီးပြီး တခြားကျောင်း ၁၇ကျောင်းနဲ့ ဆေးရုံ ၁၁ ရုံ ထိခိုက်ခဲ့တယ်လို့ INGD က ကြေညာချက် ထုတ်ပြန် ပြောဆိုပါတယ်။