ဒီနေ့ညနေယှဉ်ပြိုင်ကစားသွားတဲ့ ဆီးဂိမ်းပြိုင်ပွဲမှာ မြန်မာအမျိုးသမီး အသင်းဟာ ထိုင်းအမျိုးသမီးအသင်းကို ၄ ဂိုး ၂ ဂိုးနဲ့ အ နိုင်ရပြီး ဗိုလ်လုပွဲ တက်ရောက်သွားပါတယ်။
မြန်မာအသင်းဟာ ပွဲအစ မိနစ် ၂၀ အတွင်း ၂ဂိုးပေးလိုက်ရပေမဲ့ နောက်ကလိုက်ကစားပြီး ချေပဂိုးနဲ့ အနိုင်ဂိုးတွေ သွင်းယူနိုင်ခဲ့တာပါ။
ပထမပိုင်း ပြီးခါနီးမှာ ရူပါခိုင်းက ပထမချေပဂိုးသွင်းခဲ့ပြီး ဒုတိယပိုင်းစစချင်းမှာလဲ ဝင်းသိင်္ဂီထွန်း က ဒုတိယချေပဂိုးသွင်းပါတယ်။ ၂ ဂိုးပေးလိုက်ရပြီးကတည်းက ကစားပုံပိုကောင်းလာတဲ့ မြန်မာအသင်းဟာ ချေပဂိုး ၂ ဂိုးရခဲ့သလို ပွဲချိန် ၅၃ မိနစ်မှာ စန်းသော်သော်က အနိုင်ဂိုးထပ်သွင်းခဲ့ပါတယ်။ အဲဒီနောက်အနိုင်ရလဒ်ကို ထိန်းကစားခဲ့ပြီး ပွဲပြီးခါနီးမှာ လူစားဝင်တိုက်စစ်မှူး မြတ်နိုးခင်က စတုတ္ထဂိုး သွင်းခဲ့တာဖြစ်ပါတယ်။
မြန်မာအသင်းဟာ ၂၀၀၅ ဖိလစ်ပိုင်ဆီးဂိမ်းနောက်ပိုင်း ဆီးဂိမ်းဗိုလ်လုပွဲကို ပထမဆုံးအကြိမ် တက်ရောက်ခဲ့တာဖြစ်ပါတယ်။
အခုနှစ် ဆီးဂိမ်းပြိုင်ပွဲကို ကမ္ဘောဒီးယားနိုင်ငံမှာ ကျင်းပနေတာဖြစ်ပြီး မြန်မာအသင်းနဲ့ ဗီယက်နမ် အမျိုးသမီးအသင်းတို့ရဲ့ ဗိုလ်လုပွဲကိုတော့ မေ ၁၅ ရက်နေ့ ယှဉ်ပြိုင်သွားရမှာဖြစ်ပါတယ်။
ဆီးဂိမ်းအုပ်စုတတိယပွဲစဉ်မှာ မြန်မာ ယူ ၂၂ အသင်းက အိမ်ရှင် ကမ္ဘောဒီးယားကို ၂ ဂိုး ဂိုးမရှိနဲ့ အနိုင်ရခဲ့ပါတယ်။
မြန်မာအသင်းအတွက်ဂိုးတွေကို ဟိန်းထက်အောင်နဲ့ သက်ဟိန်းစိုးတို့က ပထမပိုင်းပွဲချိန် ၁၂ မိနစ်နဲ့ ၃၈ မိနစ်တွေမှာ သွင်းယူခဲ့တာပါ။
ဒီကနေ့ပွဲမှာ အိမ်ရှင်းပရိသတ် ၅ သောင်းလောက်ရှေ့မှာ မြန်မာလူငယ်အသင်း ခြေစွမ်းပြသနိုင်ခဲ့ပြီး ခံစစ်ပိုင်းလည်း ကျစ်လျစ်ခဲ့တာပါ။ ဒုတိယပိုင်းမှာလည်း အနိုင်ဂိုးတွေကို ထိန်းပြီး နိုင်ပွဲပြန်လည်ရယူနိုင်ခဲ့တာပါ။
ဒီနိုင်ပွဲကြောင့် မြန်မာအသင်း အုပ်စုတက်ဖို့ အခွင့်အရေးကောင်းသွားခဲ့ပါတယ်။ မြန်မာအသင်းက ၃ ပွဲကစား ၂ ပွဲနိုင် ၁ ပွဲရူံးရလဒ်နဲ့ အုပ်စုဒုတိယနေရာမှာရပ်တည်နေပြီး နောက်ဆုံးပွဲစဉ်မှာ ဖိလစ်ပိုင်ကို အနိုင်ရမယ်ဆိုရင် ဆီမီးဖိုင်နယ်တက်ဖို့သေချာသွားမှာဖြစ်ပါတယ်။
ဒါမှမဟုတ် ကမ္ဘောဒီးယားက အင်ဒိုကို အနိုင်မရခဲ့ရင်လည်း မြန်မာအသင်းက ဖိလစ်ပိုင်နဲ့ ရလဒ်ကြည့်စရာမလိုဘဲ ဆီမီးတက်မှာဖြစ်ပါတယ်။
