ပဲခူးတိုင်း၊ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ် ကိုကျော်ဇေယျကို စစ်ကောင်စီဩဇာခံ ပြည်ထောင်တွင်းတရားရုံးက   ဒီဇင်ဘာ ၁၂ ရက်မှာ  အမှု ၄ မှုအတွက်  ထောင်ဒဏ် ၉ နှစ် ထပ်မံချမှတ်လိုက်တယ်လို့ ပြည်မြို့နယ်တရားရုံးကနေ သိရပါတယ်။

ဦးကျော်ဇေယျကို စစ်ကောင်စီက အရင်ကတည်းက ရွေးကောက်ပွဲ မဲမသမာမှုနဲ့ ထောင် ၃ နှစ်၊ အကြမ်းဖက်မှုနဲ့  ၇ နှစ်နဲ့ ထောင်ဒဏ် ၁၀ နှစ်ချထားပြီး မနေ့ကတော့ ကျန်တဲ့  သဘာ၀ဘေးအန္တရာယ်ပုဒ်မနဲ့ ထောင်ဒဏ်   ၂ နှစ်၊ ယစ်မျိုးဥပဒေနဲ့ ထောင်ဒစ်  ၁ နှစ်၊  ပုဒ်မ(၅၀၅) နှစ်မှုအတွက်ထောင်ဒဏ် ၉ နှစ်ထပ်ချလိုက်ကာ စစ်ကောင်စီက မတရားချမှတ်ထားတဲ့ စုစုပေါင်းထောင်ဒဏ် ၁၉ နှစ်အထိရှိသွားပြီလို့ သူနဲ့ နီးစပ်တဲ့ ပြည်မြို့ခံက ပြောပါတယ်။

လွှတ်တော်အမတ် ဦးကျော်ဇေယျကို စစ်တပ်ကအာဏာသိမ်းပြီးနောက် စစ်ကောင်စီက အကြိမ်ကြိမ် ဖမ်းဆီးဖို့ကြိုးစားခဲ့ပေမဲ့ ထွက်ပြေးလွတ်မြောက်ခဲ့ပြီး လွတ်မြောက်နယ်မြေတွေမှာ မိသားစုနဲ့အတူ တိမ်းရှောင်နေခဲ့ပါတယ်။ သူ့ကိုဖမ်းမမိလို့ စစ်ကောင်စီက သူငှားနေတဲ့အိမ်ကိုလည်း ချိတ်ပိတ်ခဲ့ပါတယ်။

တိမ်းရှောင်နေစဉ် ဇွန် ၉ ရက်က  ကျန်းမာရေးမကောင်းတာကြောင့် ရန်ကုန်မြို့ကို ဆေးကုဖို့ ခေတ္တရောက်နေချိန်မှာ စစ်ကောင်စီ ဒလန်တချို့ရဲ့ သတင်းပေးမှုနဲ့ ရန်ကုန်မှာ ဖမ်းဆီးခံခဲ့ရပါတယ်။

ဖမ်းဆီးခံရပြီးနောက် စစ်ကြောရေးကို ရောက်ခဲ့ပြီး အဲဒီကမှ ပြည်(ဒကစ)ဒေသကွပ်ကဲရေးစစ်ဌာနချုပ်၊ ဒီနောက် ပြည်အကျဉ်းထောင်ကို ပြောင်းရွေ့ခဲ့ပြီး ပြည်ထောင်တွင်း ပြစ်ဒဏ်တိုက်ထဲမှာ သီးခြားအကျဉ်းကျခံနေရာက ရုံးထုတ်စစ်ဆေးပြီး အခုလို နှစ်ရှည် ထောင်ဒဏ် အမိန့်ချလိုက်တာလို့ မိသားစုထံက သိရပါတယ်။

အန်အယ်လ်ဒီလွှတ်​တော်ကိုယ်စားလှယ် ၂၁၇ ယောက် အပါအဝင် တခြားပါတီတွေက လွှတ်တော်ကိုယ်စားလှယ်တွေနဲ့ နိုင်ငံရေးပါတီဝင်မဟုတ်တဲ့ တသီးပုဂ္ဂလတွေအပါအဝင် စုစုပေါင်း  ၄၉၁ ယောက်ကို နိုင်ငံရေးပင်စင်ငွေကျပ် သန်းပေါင်း  ၄၀၄၀  ကျော်ပေးခဲ့တယ်လို့ စစ်ကောင်စီက ကြေညာပါတယ်။

ပြီးခဲ့တဲ့ ဒုတိယအကြိမ် လွှတ်တော်သက်တမ်းမှာတာဝန်ထမ်းဆောင်ခဲ့ကြတဲ့ အစိုးရအဖွဲ့ဝင်တွေနဲ့ လွှတ်တော်ကိုယ်စားလှယ်တွေကို ဖွဲ့စည်းပုံအခြေခံဥပဒေအရ နိုင်ငံရေးပင်စင်အဖြစ် ငွေကျပ် သန်းပေါင်း ၄၀၄၀ ကျော် ပေးခဲ့တာလို့ စစ်ကောင်စီပြန်ကြားရေးက ဩဂုတ် ၁၆ ရက်ညမှ ထုတ်ပြန်လိုက်တာပါ။

ပြည်ထောင်စုအဆင့် ပုဂ္ဂိုလ် ၉ ယောက်၊ ပြည်နယ်နဲ့တိုင်းအဆင့် ပုဂ္ဂိုလ် အယောက် ၅၀၊ ပြည်သူ့လွှတ်တော်ကိုယ်စားလှယ် ၁၅၂ ယောက်၊ အမျိုးသားလွှတ်တော် ကိုယ်စားလှယ် ၈၈ ယောက်၊ ပြည်နယ်နဲ့တိုင်း လွှတ်တော်ကိုယ်စားလှယ် ၁၉၂ ယောက်တို့ကို သူတို့လစဉ်ရတဲ့ ချီးမြှင့်ငွေကို အခြေခံပြီး တလုံးတခဲတည်း ချီးမြှင့်ငွေပေးတာ လို့ဆိုပါတယ်။

ဒီလို ပင်စင်ရဖို့ လျှောက်ထားရတယ်လို့လည်း သတင်းမှာဖော်ပြထားပြီး ကျန်နေသေးတဲ့ သတ်မှတ်ချက်နဲ့ ကိုက်ညီသူတွေကိုလည်း နိုင်ငံရေးပင်စင် ပေးးနိုင်ဖို့ စိစစ်နေတယ်လို့ဆိုပါတယ်။

နိုင်ငံရေးပင်စင်ရခဲ့တဲ့ လွှတ်တော်ကိုယ်စားလှယ်တွေကတော့ အန်အယ်လ်ဒီပါတီက ၂၁၇ ယောက်၊ ကြံ့ခိုင်ရေးပါတီက ၉၈ ယောက်၊ ရှမ်းတိုင်းရင်းသားများ ဒီမိုကရေစီအဖွဲ့ချုပ်ပါတီက ၄၃ ယောက်၊ ရခိုင်အမျိုးသားပါတီက ၃၉ ယောက်၊ ပအိုးဝ်အမျိုးသားအဖွဲ့ချုပ်ပါတီက ၅ ယောက်၊  တအားင်(ပလောင်)အမျိုးသားပါတီက ၆ ယောက်၊ လီဆူအမျိုးသားဖွံ့ဖြိုးတိုးတက်ရေးပါတီက ၃ ယောက်၊ ကချင်ပြည်နယ် ဒီမိုကရေစီပါတီနဲ့ ဇိုမီးဒီမိုကရေစီအဖွဲ့ချုပ်ပါတီတို့က ၄ ယောက်စီပါဝင်ပါတယ်။

မွန်အမျိုးသားပါတီနဲ့ ကိုးကန့် ဒီမိုကရေစီနဲ့ညီညွတ်ရေးပါတီတို့ကတော့ ၂ ယောက်စီ၊ ဒီမိုကရေစီပါတီသစ် (ကချင်)၊ ကရင်ပြည်သူ့ပါတီ၊  ချင်းဒီမိုကရေစီအဖွဲ့ချုပ်ပါတီ၊ ဒီမိုကရက်တစ်ပါတီ(မြန်မာ)၊ မွန်ဒေသလုံးဆိုင်ရာဒီမိုကရေစီပါတီ၊ ရှမ်းတိုင်းရင်းသားများ ဒီမိုကရက်တစ်ပါတီ၊ ပြည်သူ့ရှေ့ဆောင်ပါတီ၊ တိုင်းရင်းသားစည်းလုံးညီညွတ်ရေးပါတီ၊ ဝ ဒီမိုကရက်တစ်ပါတီ၊ အမျိုးသား ညီညွတ်သော ဒီမိုကရက်တစ်ပါတီ၊ အာခါအမျိုးသားဖွံ့ဖြိုးတိုးတက်ရေးပါတီနဲ့ လားဟူအမျိုးသားဖွံ့ဖြိုးတိုးတက်ရေးပါတီတို့က ၁ ယောက်စီဖြစ်တယ်လို့ ဆိုပါတယ်။ ပြီးတော့ နိုင်ငံရေးပါတီဝင်မဟုတ်သူ ၄၃ ယောက်နဲ့ တသီးပုဂ္ဂလ ၁၃ ယောက်ပါတယ်လို့ ဆိုပါတယ်။

စစ်ကောင်စီက အခုလို ထုတ်ပြန်ထားပေမဲ့  လွှတ်တော်အမတ်တွေအနေနဲ့ နိုင်ငံရေးပင်စင်ငွေတွေကို အမှန်တကယ် ထုတ်ယူခွင့်ရတယ် မရဘူးဆိုတာကတော့ မသိရသေးပါဘူး။ 

ဒုတိယအကြိမ် လွှတ်တော်သက်တမ်းကုန်ဆုံးပြီး တတိယအကြိမ် လွှတ်တော်သက်တမ်း ပြန်စမယ့်အချိန်မှာ စစ်တပ်က နိုင်ငံတော်အာဏာကို တရားမဝင်သိမ်းယူခဲ့တာဖြစ်ပြီး  ရွေးကောက်ခံ အန်အယ်လ်ဒီလွှတ်တော်အမတ် အများအပြား ဖမ်းဆီးခံရ၊ နေရပ်စွန့်ခွာထွက်ပြေးနေရတာ ဖြစ်ပါတယ်။  

ကချင်ပြည်နယ်မှာ အမျိုးသားဒီမိုကရေစီအဖွဲ့ချုပ် (အန်အယ်လ်ဒီ) ပါတီရဲ့ မိုးညှင်းမြို့နယ် လွှတ်တော်ကိုယ်စားလှယ် ဦးမျိုးကျော်နဲ့ ဖားကန့်မှော်ပုံသပိတ် ဦးဆောင်သူ ကိုစိုင်းမောင်တို့ကို စစ်ကောင်စီတပ်က ဖမ်းဆီးလိုက်တယ်လို့ သူတို့နဲ့ နီးစပ်တဲ့အသိုင်းအဝိုင်းကပြောပါတယ်။

ဦးမျိုးကျော်နဲ့ ကိုစိုင်းမောင်တို့နှစ်ယောက်ဟာ  ဩဂုတ် ၁၄ ရက်  ၁၁ နာရီလောက်က ကိုယ်ပိုင်ကားနဲ့ မြစ်ကြီးနားမြို့ကနေ ဆင်းလာချိန် မြစ်ကြီးနားမြို့အဝင် ၂၁ မိုင် စစ်ဆေးရေးဂိတ်အရောက်မှာ ဖမ်းဆီးခံရတာဖြစ်ပါတယ်။

ဖမ်းဆီးခံရသူနဲ့ နီးစပ်သူတဦးက "ဂိတ်မှာ စစ်ဆေးရင်းနဲ့ NUG ရဲ့ Bond ရောင်းထားတဲ့ စာရွက်စာတမ်းတွေကိုတွေ့သွားတယ်။ Bond ရောင်းချပေးတာက ကိုစိုင်းမောင်က ကူပြီးရောင်းချပေးတာပေါ့။ သူက ဖားကန့်ကဆိုတော့။ အဲ့စာရွက်စာတမ်းတွေ တွေ့လို့ ဖမ်းခံလိုက်ရတာ”လို့ ပြောပါတယ်။

လတ်တလော ဖမ်းဆီးခံရသူတွေ  ဘယ်မှာရှိနေတယ် ဘာအမှုနဲ့ အရေးယူထားတယ်ဆိုတာ‌တော့ မသိရသေးပါဘူး။ 

ဖမ်းဆီးခံရသူ ဦးမျိုးကျော်ဟာ ၂၀၂၀ နိုဝင်ဘာလက ကျင်းပတဲ့ အထွေထွေရွေးကောက်ပွဲမှာ ကချင်ပြည်နယ်လွှတ်တော်ကိုယ်စားလှယ်အဖြစ် ရွေးကောက်တင်မြှောက်ခံရသူဖြစ်ပါတယ်။

ပြီးခဲ့တဲ့ ၂၀၂၁ ခုနှစ် ဩဂုတ် ၄ ရက်ကလည်း  အန်အယ်လ်ဒီပါတီရဲ့ မိုးညှင်းမြို့နယ် ပြည်နယ်လွှတ်တော်ကိုယ်စားလှယ် ဒေါ်သက်ထားနှောင်းဟာ နန်းမားမြို့မှာ ဖမ်းဆီးခံခဲ့ရပြီး ပုဒ်မ-၅၀၅(ခ)နဲ့ ပြီးခဲ့တဲ့ မေလ ၂၆ ရက်က ထောင်ဒဏ် ၁ နှစ်ချမှတ်ခံခဲ့ရပါတယ်။