ဖိလစ်ပိုင်နိုင်ငံမြို့တော် မနီလာရှိ သမ္မတနန်းတော်နားမှာ တက်ကြွလှုပ်ရှားသူ အယောက် ၃၀၀ လောက်ဟာ အပြည်ပြည်ဆိုင်ရာအမျိုးသမီးများနေ့ အထိမ်းအမှတ် ဆန္ဒပြရင်း အမျိုးသမီးလုပ်သားတွေရဲ့ လုပ်ငန်းခွင် အခြေအနေ တိုးတက်အောင် လုပ်ပေးဖို့ အစိုးရကို တိုက်တွန်းခဲ့ကြပါတယ်။

အဓိကရုဏ်းနှိမ်နင်းရေးရဲတွေက တက်ကြွလှုပ်ရှားသူတွေ နန်းတော်ရှေ့ကို ရောက်မလာအောင် ပိတ်ဆို့ထားကြပြီး နောက်ပိုင်းမှာတော့ နန်းတော်ခြံဝင်းကိုဦးတည်နေတဲ့ ဝင်ပေါက်ကနေ မီတာ ရာဂဏန်း နည်းနည်းအထိ သွားဖို့ ခွင့်ပြုလိုက်ကြပါတယ်။

ဖိလစ်ပိုင်မှာ အမျိုးသမီးတွေကို ဥပဒေနဲ့ ကာကွယ်ပေးထားပေမဲ့ တချို့လုပ်ငန်းခွင်တွေမှာ အမျိုးသမီးတွေကို ခွဲခြားဖိနှိပ်တာ၊ အလွဲသုံးစား လုပ်တာတွေ ရှိနေဆဲပဲလို့ ဂေဘရီယယ်လာ အမျိုးသမီးပါတီ ပြောခွင့်ရ တက်ကြွလှုပ်ရှားသူ ကလေးရိစ် ပါဆေက ပြောပါတယ်။

ဖိလစ်ပိုင်မှာ ၂၀၂၁ ခုနှစ်က အမျိုးသမီးဦးရေ ၁၂,၄၉၂ယောက်ဟာ အလွဲသုံးစားလုပ်မှုတချို့ကို ခံစားခဲ့ရတယ်၊ ဒါဟာ ရုပ်ပိုင်းဆိုင်ရာ အလွဲသုံးစားမှု စုစုပေါင်းရဲ့ လေးပုံတပုံ ဖြစ်တယ်လို့ ဖိလစ်ပိုင် စာရင်းအင်း အာဏာပိုင်အဖွဲ့က ထုတ်ပြန်တဲ့ ၂၀၂၂ ခုနှစ် အစီရင်ခံစာက ဆိုပါတယ်။

မြန်မာ့ဒီမိုကရေစီအရေးမှာ ဦးဆောင်ပါဝင်လှုပ်ရှားခဲ့ကြတဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ မြန်မာစာပေလောကမှာ ထင်ရှားတဲ့ စာရေးဆရာမကြီး လူထုဒေါ်အမာတို့ အပါအဝင် ရှေ့ ဆောင်မြန်မာအမျိုးသမီးတွေကို မြန်မာနိုင်ငံဆိုင်ရာ အမေရိကန်သံရုံးက ဂုဏ်ပြုကြောင်း ထုတ်ပြန်ထားပါတယ်။

တန်းတူညီမျှရေး၊ လူ့အခွင့်အရေးနဲ့ ဒီမိုကရေစီရေးတို့အတွက် ရှေးမဆွကတည်းက ဦးဆောင်လှုပ်ရှားခဲ့ကြတဲ့ မြန်မာနိုင်ငံတွင်းက အမျိုးသမီးတွေနဲ့ မိန်းခလေးတွေကို မတ် ၈ ရက် ဒီကနေ့မှာ ကျရောက်တဲ့ အပြည် ပြည်ဆိုင်ရာအမျိုးသမီးများနေ့မှာ ဂုဏ်ပြုကြောင်း ထုတ်ပြန်ထားတာဖြစ်ပါတယ်။

အဲဒီထဲမှာတော့ ဒေါ်အောင်ဆန်းစုကြည်နှင့်အတူ စာရေးဆရာမကြီး လူထုဒေါ်အမာ၊ NUG နိုင်ငံခြားရေးဝန်ကြီး ဒေါ်ဇင်မာအောင်၊ စာရေးဆရာမ မသီတာ(စမ်းချောင်း)၊ မယ်တော်ဆေးခန်းတည်ထောင်သူ ဒေါက်တာစင်သီယာမောင်၊ ရိုဟင်ဂျာအရေး တက်ကြွလှုပ်ရှားသူ မဝေဝေနု တို့အပါအဝင် ၁၁ ယောက်ကို ဖော်ပြထားခဲ့တာကို တွေ့ရပါ တယ်။

ဒီကနေ့မှာတော့ အပြည်ပြည်ဆိုင်ရာ အမျိုးသမီးများနေ့ အထိမ်းအမှတ်အနေနဲ့ နိုင်ငံတဝန်းမှာလည်း ဆွေးနွေးဟောပြောမှုတွေ ပြုလုပ်နေသလို အကြမ်းဖက်စစ်အုပ်စုက နိုင်ငံတော်အာဏာကို မတရားသိမ်းယူခဲ့ပြီးနောက် အကြမ်းမဖက် အာဏာဖီဆန်ရေး လူထုလှုပ်ရှားမှုတွေမှာရော လက်နက်ကိုင်တော်လှန်ရေးမှာပါ အမျိုးသမီးတွေ ပါဝင်လှုပ်ရှားနေကြတာ ဖြစ်ပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က နောက်ဆုံး ထုတ်ပြန်ချက်မှာတော့ စစ်အာဏာရှင်စနစ်ကို ဆန့်ကျင်တော်လှန်တဲ့ မြန်မာ့နွေဦးတော်လှန်ရေး ၂ နှစ်ကျော် ကာလအတွင်း အကြမ်းဖက်စစ်တပ်က အပြစ်မဲ့ပြည်သူ ၃,၀၀၀ ကျော်ကို သတ်ဖြတ်ခဲ့တယ်လို့ ပြောပါတယ်။

အဆိုပါ ကျဆုံးပြည်သူစုစုပေါင်းထဲမှာ ဖမ်းဆီးခံရပြီးနောက် သတ်ဖြတ်ခံရတဲ့ ရာခိုင်နှုန်းကတော့ ၃၄ ဒသမ ၆ ရာခိုင်နှုန်းထိ ရှိခဲ့ပြီး အမျိုးသမီးဦးရေ ၁၂ ဒသမ ၇ ရာခိုင်နှုန်းထိ ပါဝင်နေတာပါ။

ဒါ့အပြင် တော်လှန်ရေး ၂ နှစ်ကျော် ကာလအတွင်း ဖမ်းဆီးခံရသူတွေထဲမှာတော့ အမျိုးသမီးဦးရေ ၂၀ ဒသမ ၅ ရာခိုင်နှုန်းထိ ပါဝင်နေတယ်လို့ အေအေပီပီက ပြောပါတယ်။

မကွေးတိုင်း၊ ပခုက္ကူခရိုင်မှာ ဒီနေ့ မတ်လ ၈ ရက် အပြည်ပြည်ဆိုင်ရာအမျိုးသမီးများနေ့ အထိမ်းအမှတ်အနေနဲ့ ပခုက္ကူလူထုတိုက်ပွဲကော်မတီ ဦးဆောင်ပြီး BEGSC နဲ့ ဒေသခံပြည်သူတွေ ပူးပေါင်းကာ ဆန္ဒပြလှုပ်ရှားမှုနဲ့  ဟောပြောပွဲ ပြုလုပ်ခဲ့ပါတယ်။

ပခုက္ကူ လူထုတိုက်ပွဲကော်မတီ တာဝန်ရှိသူက“မြန်မာနိုင်ငံမှာရှိတဲ့ အမျိုးသမီးတွေရဲ့ အခွင့်အရေးဆုံးရှုံးမှုတွေ၊ ညှဉ်းပန်းနှိပ်စက်လုပ်ခံရမှုတွေ၊ အမျိုးသမီးတွေကို အမျိုးသမီးမို့လို့ဆိုပြီး အခွင့်အရေး မပေးခံရမှုတွေ၊ အဲ့ဒီစိတ်တွေ အစွဲတွေကို ဖျောက်ဖျက်ပြီးတော့ ကျနော်တို့လိုချင်တဲ့ ဖက်ဒရယ်ဒီမိုကရေစီ လူ့အခွင့်အရေးနဲ့ ပြည့်မီတဲ့ အမျိုးသမီးထု အခွင့်အရေးအတွက် ဆန္ဒပြလှုပ်ရှားမှု ပြုလုပ်ခဲ့တယ်” လို့ ပြောပါတယ်။

ဆန္ဒပြလှုပ်ရှားမှုနဲ့ ဟောပြောပွဲမှာ ပခုက္ကူခရိုင်အတွင်းက အမျိုးသမီးတွေပါဝင်ခဲ့ကြပြီး ဒေသခံ ပြည်သူ့ကာကွယ်ရေးတပ်ဖွဲ့တွေက လုံခြုံရေးယူပေးခဲ့ကြပါတယ်။