ထိုင်းနိုင်ငံ၊ ကန်ကျနပူရီခရိုင်ထဲမှာ မတ်လ ၁၆ ရက် မနက်စောစောက တရားမဝင်မြန်မာတွေ တင်ဆောင်လာတဲ့ကား တစီးလမ်းခုလပ်မှာ ဘီးပေါက်သွားလို့ ရပ်နားစဉ် တာဝန်ရှိသူတွေ လာရောက်စစ်ဆေးပြီး ကားပေါ်က မြန်မာ ၃၃ ဦးလုံးအဖမ်းခံလိုက်ရတယ်လို့ Siamrath ထိုင်းသတင်းမှာ ဖော်ပြပါတယ်။
မနေ့မနက် ၃ နာရီခွဲလောက်က ကန်ကျနပူရီမြို့နယ် ကန်ကျနပူရီ - ဆိုင်းယုဒ်သွား ကားလမ်းမကြီးတနေရာ ကိန်ဆင့်အုပ်စုထဲမှာ ကားဘီးပေါက်နေတဲ့ အဖြူရောင်မစ်ဆူဘီရှီကား တစီးကို ရွာသားတွေကတွေ့ရှိပြီး ကျေးရွာ အုပ်ချုပ်ရေးမှူးကို အကြောင်းကြားခဲ့ပါတယ်။
အုပ်ချုပ်ရေးမှူးက ကျေးရွာလုံခြုံရေးအဖွဲ့နဲ့အတူ လာရောက်စစ်ဆေးရာမှာတော့ ကားမောင်းသူကို မတွေ့ရကြောင်း၊ ကားနောက်ခန်းမှာ အလုံပိတ်ခန်းလိုပြင်ဆင်မွမ်းမံထားပြီး တာဝန်ရှိသူတွေက တံခါးဖွင့်စစ်ဆေးရာမှာ အထဲမှာလူတွေပိတ်ညှပ်တင်ဆောင်လာတာ တွေ့ရတယ်လို့ ဆိုပါတယ်။
သူတို့ဟာ မြန်မာနိုင်ငံသား အမျိုးသားရော အမျိုးသမီးပါ စုစုပေါင်း ၃၃ ဦးရှိပြီး ထိုင်းနိုင်ငံထဲကို တောလမ်းကနေခြေကျင်လျှောက်ပြီး ဝင်ရောက်လာကြောင်း၊ တောစပ်တနေရာမှာ ထိုင်းလူမျိုးတယောက်ကကားနဲ့လာကြိုပြီး လိုက်ခဲ့ရာမှာ တစ်နေရာမှာ စစ်ဆေးရေးဂိတ်တွေ့တာနဲ့ ကားကိုနောက်ပြန်လှည့်ပြီး ၂ ကီလိုမီတာလောက် မောင်းနှင်လာစဉ် ကားရဲ့ ဘယ်ဘက်နောက်ဘီးပေါက်သွားလို့ ရပ်နား ထားစဉ် အခုလိုဖမ်းဆီးခံရတာလို့ ဆိုပါတယ်။
ကားမောင်းသမားကတော့ အမှောင်ထဲမှာ ထွက်ပြေးသွားတယ်လို့ မျက်မြင်တွေက ပြောပါတယ်။
ဖမ်းဆီးခံ မြန်မာနိုင်ငံသားတွေကိုတော့ တာဝန်ရှိသူတွေက လဝကဥပဒေနဲ့ အရေးယူဖို့ ကန်ကျနပူရီမြို့မရဲစခန်းကို ပို့ဆောင်ထားတယ်လို့ သတင်းမှာ ဖော်ပြပါတယ်။
Source - https://siamrath.co.th/n/431061
ဧရာဝတီတိုင်း၊ ပုသိမ်မြို့နယ် ဉပဒေအရာရှိကို မအူပင်မြို့ကနေအိမ်ပြန်ချိန် ဧပြီလ ၁၄ ရက်နေ့မှာ စစ်ကောင်စီ တပ်သားတွေက လာရောက်ဖမ်းဆီးသွားတယ်လို့ သိရပါတယ်။
ပုသိမ်မြို့နယ်ဉပဒေအရာရှိ ကိုပြည့်ကျော်ဆိုသူမှာ မအူပင်မြို့က နေအိမ်ကိုပြန်လာချိန်မှာ CDM မလုပ်ထားပေမယ့် စစ်ကောင်စီတပ်သားတွေက ဝင်ရောက်ဖမ်းဆီးသွားတာဖြစ်ပြီး သတင်းစာရှင်းလင်းပွဲမှာ လက်နက် တွေနဲ့ ဖမ်းမိတယ်လို့ သတင်းထုတ်ပြန်ခဲ့ပါတယ်။
“အဲ့ရက်က မအူပင်မြို့မှာ အဖမ်းဆီးကြမ်းနေတဲ့ရက် နောက်ဆုံး ၈ နှစ်သားကအစ ဖမ်းနေတဲ့အချိန်မှာ သူ့ယောက္ခမအိမ်မှာ ညပိုင်းဝင်ဖမ်းသွားတာ၊ ဘာလို့ဖမ်းတာလည်းတော့ သေချာမသိဘူး။ သူက လက်ရှိစစ်ကောင်စီအောက်မှာ တာဝန်ထမ်းဆောင်နေတဲ့သူ” လို့ ဒေသခံတဦးက ပြောပါတယ်။
စစ်ကောင်စီရဲ့ပြန်ကြားရေး ဒုဝန်ကြီးက သတင်းစာရှင်းလင်းပွဲမှာ ရှေ့နေအသိုင်းဝိုင်းက ဉပဒေအရာရှိကို လက်နက်တွေနဲ့ဖမ်းမိပြီး သူ့ကိုစစ်မေးလို့ လှူတဲ့သူတွေထဲမှာ မန္တလေးမြို့က ရှေ့နေ ဒေါ်ရွက်နုအောင်နာမည် ပါတာကြောင့် ဆက်လက်ဖမ်းဆီးခဲ့တာလို့ သတင်းထုတ်ပြန်ခဲ့တာပါ။
စစ်ကောင်စီတပ်သားတွေ ဖမ်းဆီးသွားတဲ့ ပုသိမ်မြို့နယ်ဥပဒေအရာရှိ ကိုပြည့်ကျော်ကို ဒီနေ့ထိအဆက်သွယ် မရသေးသလို ဘယ်နေရာမှာဖမ်းဆီးထားတယ်ဆိုတာလည်း အတိအကျမသိရသေးဘူးလို့ ရှေ့နေ အသိုင်းဝိုင်းက နီးစပ်သူတွေက ပြောပါတယ်။
ပုသိမ်မြို့နယ် ဉပဒေအရာရှိနဲ့အတူ နေအိမ်ကို ဝင်ရောက်ဖမ်းဆီးချိန်မှာ အားလုံး ၃ ဦးပါသွားတာဖြစ်ပြီး တဦးကို သေနတ်နဲ့ပစ်ဖမ်းပေမယ့် လွတ်မြောက်သွားတယ်လို့ ဆိုပါတယ်။
မအူပင်မြို့နယ်မှာ ဧပြီလ ၁ လတည်း အသက်မပြည့်သေးတဲ့ ကလေးငယ်တွေအပါဝင် ဒေသခံပြည်သူ ၃၀ ကျော် ဖမ်းဆီးခံခဲ့ရတာလို့ သိရပါတယ်။
