ယူကရိန်းမှာ ရုရှားတပ်တွေက အရပ်သားများစွာကို သတ်ဖြတ်မှုတွေ တွေ့ရှိရပြီးနောက် ရုရှားကို လူ့အခွင့်အရေးကောင်စီအဖွဲ့ဝင်အဖြစ်ကနေ ဆိုင်းငံ့ထားဖို့ ကုလသမဂ္ဂအထွေထွေညီလာခံမှာ အမေရိကန်က တောင်းဆိုသွားမယ်လို့ ကုလသမဂ္ဂဆိုင်ရာ အမေရိကန်သံအမတ် လင်ဒါ သောမတ်စ် ဂရင်းဖီးလ် က ပြောလိုက်ပါတယ်။
စနစ်တကျ လူ့အခွင့်အရေးချိုးဖောက်မှုတွေ လုပ်ခဲ့တဲ့ ရုရှားကို ကုလသမဂ္ဂညီလာခံမှာ အဖွဲ့ဝင် ၁၉၃ နိုင်ငံက မဲ သုံးပုံနှစ်ပုံနဲ့ ရပ်စဲထားနိုင်ပါတယ်။
ရိုမေးနီးယားနိုင်ငံကို ရောက်ရှိနေတဲ့ လင်ဒါသောမတ်စ်က “ပြီးခဲ့တဲ့ ၆ ပတ်အတွင်း ယူကရိန်းမှာ မြင်တွေ့နေရတဲ့ ဓာတ်ပုံတွေ သတင်းတွေဟာ ထိတ်လန့်စရာပါ၊ ဘူချာမှာ အရပ်သားတွေကို သတ်ဖြတ်ခဲ့တာ ရက်စက်လွန်းပါတယ်။ ရုရှားဟာ ဒါကို တာဝန်ယူရပါလိမ့်မယ်၊ မနက်ဖြန် နယူးယောက်ကိုပြန်ပြီး ကုလသမဂ္ဂ လူ့အခွင့်အရေးကောင်စီကနေ ရုရှားကို ဆိုင်းငံ့ထားဖို့ ကျမတို့ ကြိုးစားပါမယ်။ အဖွဲ့ဝင်နိုင်ငံ ၁၄၀ က ရုရှားရဲ့ ကျူးကျော်စစ်ကို အစကတည်းက ရှုတ်ချမှု လုပ်ခဲ့ပြီးသားပါ။ အခု ဒီကိစ္စမှာလည်း နိုင်ငံ ၁၄၀ က သတ္တိရှိရှိ ဆောင်ရွက်ကြဖို့ ကျမ သတင်းပါးလိုပါတယ်” လို့ ပြောပါတယ်။
ယူကရိန်းအာဏာပိုင်တွေက စစ်ရာဇဝတ်မှု အထောက်အထားတွေကို အချက်အလက် အသေချာ စုဆောင်းနေတယ်လို့ ပြောပါတယ်။ ရုရှားအစိုးရကတော့ အရပ်သားတွေကို သတ်ဖြတ်မှုမရှိဘူးလို့ ငြင်းဆန်ပါတယ်။
