မန္တလေးမြို့၊ အမရပူရမြို့နယ်၊ မြစ်ငယ်တံတားအနီးမှာ စက်တင်ဘာ ၂၉ ရက် မနက်ပိုင်းက နိုင်ငံရေးအကျဉ်းသားတွေ တင်ဆောင်လာတဲ့ အချုပ်ကားကို မဟာမိတ် မြို့ပြပြောက်ကျား အဖွဲ့တွေက တိုက်ခိုက်ခဲ့တယ်လို့ သိရပါတယ်။
တိုက်ခိုက်မှုမှာ စစ်ကောင်စီလက်အောက်ခံ ရဲတပ်ဖွဲ့ဝင် ၂ ယောက် နေရာမှာတင် သေဆုံးခဲ့ပြီး အကျဉ်းသား ၁ ေယာက် ထိခိုက်ဒဏ်ရာ ရရှိခဲ့တယ်လို့ Truth Keeping Force - Amarapura က ထုတ်ပြန်ထားပါတယ်။
အမရပူရမြို့နယ်နေ ပြည်သူတယောက်က “ပထမတော့ အချုပ်သားတွေက ရဲကိုချပြီး ထွက်ပြေးတယ်ဆိုပြီး ကြားတာ။ သေချာစုံစမ်းကြည့်မှ မြို့ပြပြောက်ကျားတွေက လုပ်တာဆိုတာ သိတာ။ မနက်ကတော့ မြစ်ငယ်စက်ကွေ့နားမှာ အစစ်အဆေးတွေရှိတယ်” လို့ ပြောပါတယ်။
အကျည်းသား ၈ ယောက် ထွက်ပြေးခဲ့ပေမဲ့ ၆ ယောက် ပြန်ဖမ်းဆီးခံလိုက်ရပြီး ၂ ယောက် လွတ်မြောက်ခဲ့ကာ လုံခြုံရာကို ပို့ဆောင်ပြီးဖြစ်တယ်လို့ ထုတ်ပြန်ချက်မှာ ဖော်ပြပါတယ်။
မန္တလေးမြို့၊ အမရပူရမြို့နယ်၊ ယဥ်တော်ကျေးရွာအနီး မန္တလေး-စစ်ကိုင်းသွားတဲ့ ကားလမ်းမှာ စက်တင်ဘာ ၂၇ ရက် ညပိုင်းက ခြောက်ဘီးယာဉ် တစီး မီးလောင်ခဲ့ပါတယ်။
မနေ့ည ၈ နာရီ ၄၇ မိနစ်လောက်က အမရပူရမြို့နယ်၊ ယဉ်တော်ကျေးရွာ၊ မန္တလေး-စစ်ကိုင်း ကမ်းနားလမ်း၊ အောင်သာဆီဆိုင်နဲ့ Denko ဆီဆိုင် အကြားတွင်မှာ ကားမီးလောင်ခဲ့တာ ဖြစ်ပြီး ည ၈ နာရီ ၅၈ မိနစ်မှာ မီးငြိမ်းသွားတယ်လို့ မီးသတ်တပ်ဖွဲ့က သတင်းထုတ်ပါတယ်။
ကားအင်ဂျင် အပူလွန်ကဲရာကနေ မီးလောင်မှုဖြစ်ခဲ့တာဖြစ်ပြီး မီးသတ်တပ်ဖွဲ့တွေ လာရောက် မီးငြှိမ်းသတ်ခဲ့ရာ ကားအရှေ့ခန်းနဲ့ တာယာတွေ မီးလောင်ဆုံးရှုံးခဲ့တယ်လို့ သိရပါတယ်။
မီးသတ်တပ်ဖွဲ့နဲ့ နီးစပ်သူတယောက်က “ကားပေါ် ပုလဲဓာတ်မြေဩဇာတွေ ပါတယ်လို့ သိရတယ်။ ကားမီးလောင်တော့ ကားသမားက ထွက်ပြေးသွားတယ်” လို့ ပြောပါတယ်။
ထွက်ပြေးသွားတဲ့ ယာဉ်မောင်းကို သက်ဆိုင်ရာရဲစခန်းမှာ ရာဇသတ်ကြီးပုဒ်မ ၂၈၅ နဲ့ အမှုဖွင့်ထားပါတယ်။
