ဒီမိုကရက်တစ်ဦးဆောင်တဲ့ အမေရိကန်အောက်လွှတ်တော်မှာ ဩဂုတ် ၁၂ ရက်က ငွေကြေးဖောင်းပွမှု လျှော့ချရေး အက်ဥပဒေကို အတည်ပြုလိုက်နိုင်ခြင်းကို အမေရိကန်သမ္မတ ဂျိုးဘိုင်ဒင်က ချီးကျူးလိုက်ပါတယ်။
အမေရိကန်ပြည်သူတွေ အနိုင်ရပြီး အထူးအကျိုးစီးပွားတွေ ဆုံးရှုံးသွားတာလို့ ဘိုင်ဒင်က ပြောပါတယ်။
ဒီဥပဒေကြမ်းကို ရေးဆွဲနေတာ ၁၈ လကျော်ရှိပါပြီ။ ဒီဥပဒေဟာ ဘိုင်ဒင်ရဲ့ မူရင်းဖြစ်တဲ့ Build Back Better အစီအစဉ်ရဲ့ နောက်ဆုံးဗားရှင်းကို ကိုယ်စားပြုပါတယ်။
ရီပတ်ဘလစ်ကန်တွေကတော့ အဲဒီဥပဒေကို ဆန့်ကျင်ကန့်ကွက်ကြပြီး ဒီဥပဒေဟာ ကော်ပိုရိတ် အခွန်ငွေတွေ တိုးမြှင့်ခြင်း၊ အစိုးရအသုံးစရိတ်တွေ ပိုမိုဖောင်းပွလာပြီးတော့ ဆေးဝါးအသစ်တွေ ဖွံ့ဖြိုးတိုးတက်မှုကို ဟန့်တားခြင်းဖြင့် အလုပ်အကိုင်များ ဆုံးရှုံးမှာဖြစ်ကြောင်း သတိပေးထားပါတယ်။
ဒီဥပဒေကို သြဂုတ် ၇ ရက်က အထက်လွှတ်တော်မှာ ၂၇ နာရီကြာအပြီးမှာမှ အတည်ပြုခဲ့တာပါ။
အောက်လွှတ်တော်ဟာ ငွေကြေးဖောင်းပွမှု လျှော့ချရေးဥပဒေလို့ ခေါင်းစဉ်တပ်ထားတဲ့ ဆောင်ရွက်မှုကို အတည်ပြုဖို့ ထောက်ခံမဲ ၂၂၀- ကန့်ကွက်မဲ ၂၀၇ မဲနဲ့ မဲပေးခဲ့ပြီး ဥပဒေအဖြစ် လက်မှတ်ရေးထိုးဖို့ ဘိုင်ဒင်ဆီ ပေးပို့ခဲ့ပါတယ်။
ဒီမိုကရက် ၆၉ ရာခိုင်နှုန်း နဲ့ ရီပတ်ဘလီကန် ၃၄ ရာခိုင်နှုန်းတို့အပါအဝင် အမေရိကန် နိုင်ငံသား ထက်ဝက်လောက်က ရာသီဥတုနဲ့ ဆေးဝါး ဈေးနှုန်းဆိုင်ရာ ဥပဒေတွေကို ထောက်ခံကြောင်း သြဂုတ် ၃ ရက်နဲ့ ၄ ရက်က ပြုလုပ်တဲ့ Reuters/Ipsos စစ်တမ်းအရ သိရပါတယ်။
အမေရိကန်မှာ ငွေကြေးဖောင်းပွမှု မြင့်တက်လာချိန်မှာ မဲဆန္ဒရှင်အများအပြားက ဘိုင်ဒန်အပေါ် အပြစ်တင်နေကြချိန်မှာ သူဟာ တခြားဥပဒေပြုရေးဆိုင်ရာ အောင်ပွဲတွေနဲ့အတူ ဒီဥပဒေကြမ်းကို ထောက်ခံမှုရဖို့ နိုင်ငံတစ်ဝှမ်းကို သွားရောက်ဖို့ စီစဉ်ထားပါတယ်။
ဒေါ်လာ ၄၃၀ ဘီလီယံ ဥပဒေကြမ်းကို အမေရိကန်သမိုင်းမှာ အကြီးမားဆုံး ရာသီဥတုဆိုင်ရာ ပက်ကေ့ချ်အဖြစ် ရှုမြင်ကြပြီး ဒါဟာ နိုဝင်ဘာ ၈ ရက် ကြားဖြတ်ရွေးကောက်ပွဲ မတိုင်မီ သမ္မတအတွက် ကြီးမားတဲ့ ဥပဒေပြုရေး အောင်ပွဲတစ်ရပ် လို့ ဆိုပါတယ်။
ယူကရိန်းနိုင်ငံမှာ စစ်ရေးနဲ့ လူသားချင်းစာနာမှု အကူအညီပေးဖို့ အမေရိကန်ဒေါ်လာ ၄၀ ဘီလီယံကို အမေရိကန် အောက်လွှတ်တော်က မေ ၁၀ ရက် ညနေပိုင်းမှာ ခွင့်ပြုပေးလိုက်ပါတယ်။
လွန်ခဲ့တဲ့ ၁၀ ရက်က သမ္မတ ဘိုင်ဒင်က ယူကရိန်းအတွက် စစ်ရေးနဲ့ လူသားချင်းစာနာမှု အကူအညီပေးဖို့ ၃၃ ဘီလီယံကို ကွန်ဂရက်လွှတ်တော်ကို တောင်းဆို တိုက်တွန်းခဲ့ပြီး လွှတ်တော်က ၃၉ ဒသမ ၈ ဘီလီယံအထိ တိုးပြီး အတည်ပြုပေးလိုက်တာပါ။
ဒီလို ခွင့်ပြုလိုက်ခြင်းအားဖြင့် ရုရှားရဲ့ ကျူးကျော်စစ်ကို ရင်ဆိုင်နေရတဲ့ ယူကရိန်းနိုင်ငံအတွက် အများကြီး အထောက်အပံ့ ဖြစ်စေလိမ့်မယ်လို့ အောက်လွှတ်တော်ဥက္ကဋ္ဌ နန်စီပလိုစီက ဥပဒေကြမ်း အတည်မပြုခင် အိမ်ဖြူတော်အပြင်ဘက်မှာ သတင်းထောက်တွေကို ပြောပါတယ်။
အမေရိကန် အောက်လွှတ်တော်ဥက္ကဋ္ဌဟာ တခြား ဒီမိုကရက်ပါတီ အောက်လွှတ်တော် အမတ်တွေနဲ့အတူ ပြီးခဲ့တဲ့ရက်ပိုင်းကပဲ ယူကရိန်းကို သွားရောက်ခဲ့ပြီး အပြန်မှာ သမ္မတ ဂျိုးဘိုင်ဒင်ကို အခြေအနေတွေ တင်ပြခဲ့ပါတယ်။
မကြေညာဘဲ သွားရောက်ခဲ့တဲ့ ယူကရိန်းခရီးစဉ်အတွင်း ပလိုစီဟာ ယူကရိန်းသမ္မတ ဇလန်းစကီးနဲ့ တွေ့စဉ်မှာ အမေရိကန် ပြည်ထောင်စုအနေနဲ့ ယူကရိန်းမှာ အောင်ပွဲရတဲ့အထိ ဆက်ပြီး ကူညီသွားမယ်လို့ ပြောခဲ့ပါတယ်။
အခု အောက်လွှတ်တော်က အတည်ပြုလိုက်တဲ့ ဥပဒေကို အထက်လွှတ်တော်မှာ ရက်ပိုင်းအတွင်း အတည်ပြုဖို့လိုပြီး ပြီးရင်တော့ အိမ်ဖြူတော်မှာ သမ္မတ ဂျိုးဘိုင်ဒင်က လက်မှတ်ထိုးပြီးရင် ဥပဒေ ဖြစ်လာတော့မှာပါ။
ဒီလိုဖြစ်လာရင် ယူကရိန်းအတွက် စစ်ရေးအထောက်အပံ့တွေ အရင်ထက် ပိုရဖို့ လမ်းပွင့်သွားပါလိမ့်မယ်။
