တောင်အာဖရိကနိုင်ငံ ကိပ်တောင်းမြို့တော်က ရေတပ်ဆိပ်ကမ်းမှာ ပြီးခဲ့တဲ့နှစ်က ဒဏ်ခတ်ပိတ်ဆို့ထားတဲ့  ရုရှားကုန်တင်သင်္ဘော Lady R ကို ဆိုက်ကပ်ခဲ့တာနဲ့ပတ်သက်လို့ စိုးရိမ်ပူပန်မှုတွေရှိခဲ့ကြောင်းနဲ့ ဒီကိစ္စဟာ တောင်အာဖရိကအရာရှိ အများအပြားနဲ့ တိုက်ရိုက်သက်ဆိုင်မှုတွေရှိကြောင်း အမေရိကန်နိုင်ငံခြားရေးဌာနက မေ ၁၁ ရက်မှာ ပြောပါတယ်။

ရုရှားသင်္ဘောဟာ ဒီဇင်ဘာလတုန်းက လက်နက်တွေနဲ့ခဲယမ်းမီးကျောက်တွေကို တောင်အာဖရိက မှ တင်ဆောင်ခဲ့တယ်လို့ ဝါရှင်တန်က ယုံကြည်ကြောင်း တောင်အာဖရိက နိုင်ငံဆိုင်ရာ အမေရိကန်သံအမတ်ကြီး ရူဘင်ဘရီဂတ်တီက ပြည်တွင်းသတင်းထောက်တွေကို သတင်းစာရှင်းလင်းပွဲမှာ ပြောကြားခဲ့ပါတယ်။ 

ဒီသတင်း အမှန်ဖြစ်တယ်ဆိုရင် ယူကရိန်းပဋိပက္ခမှာ ပရီတိုးရီးယားရဲ့ ကြားနေရေးကို ချိုးဖောက်တာ ဖြစ်နိုင်ကြောင်း ရိုက်တာသတင်းမှာ ရေးပါတယ်။ 

ပါလီမန်မှာ သမ္မတစီရေးလ်ရာမာဖိုဆာဟာ အဲဒီအဆိုကို အတည်လည်းမပြု၊ ငြင်းဆိုခြင်းလည်း မရှိပေမဲ့ အစီရင်ခံစာကိုတော့ အစိုးရက စစ်ဆေးနေကြောင်း အောက်လွှတ်တော်က အာမခံခဲ့ပါတယ်။ 

အငြိမ်းစား တရားသူကြီးတယောက် ဦးဆောင်တဲ့ လွတ်လပ်သော စုံစမ်းစစ်ဆေးရေး တရပ်ကို အစိုးရက စတင်လုပ်ဆောင်နေတယ်လို့ သမ္မတရုံးရဲ့ ထုတ်ပြန်ချက်မှာ ဖော်ပြထားပါတယ်။ 

ဆူဒန်နိုင်ငံမှာ စစ်တိုက်နေကြတဲ့ အဖွဲ့တွေဟာ အရပ်သားတွေကို အကာအကွယ်ပေးရေးနဲ့ လူသားချင်း စာနာထောက်ထားမှုဆိုင်ရာ အကူအညီတွေ ပေးအပ်ရေးကို မေ ၁၂ ရက် အစောပိုင်းက ကတိကဝတ် ပြုထားခဲ့ပေမဲ့ အပစ်အခတ်ရပ်စဲရေးကို သဘောမတူဘဲ အလှမ်းဝေးနေဆဲဖြစ်ကြောင်း အမေရိကန် တာဝန်ရှိသူတွေက ပြောကြားခဲ့ပါတယ်။

ဆော်ဒီဆိပ်ကမ်း ဂျဒ်ဒါမှာ တပတ်ကြာ ဆွေးနွေးပြီးနောက် ဆူဒန်စစ်တပ်နဲ့ သူ့ပြိုင်ဘက် အရန်အမြန်ထောက်ပံ့ရေးတပ်ဖွဲ့ (RSF) တို့ဟာ ရေတို အပစ်အခတ်ရပ်စဲရေးကို ဦးတည်ပြီး နောက်ထပ်ဆွေးနွေးမှုတွေ လုပ်ဆောင်သွားမယ်ဆိုတဲ့ ကြေညာချက်ကို လက်မှတ်ရေးထိုးခဲ့ကြောင်း သူတို့ကဆိုပါတယ်။

ဆူဒန်စစ်တပ်နဲ့ RSF တို့က စာရွက်စာတမ်းကို လက်မှတ်ရေးထိုးနေကြပုံကို ဆော်ဒီနိုင်ငံပိုင်ရုပ်သံတီဗီ အယ်လ်-အခ်ဘာရီယားက မေ ၁၁ ရက် နှောင်းပိုင်းမှာ ပြသခဲ့ပါတယ်။

အမေရိကန် နိုင်ငံခြားရေးဌာနရဲ့ ထုတ်ပြန်ချက်မှာတော့ စစ်ဖြစ်နေတဲ့ အဖွဲ့တွေဟာ ၁၀ ရက်လောက်အထိ ထိရောက်တဲ့ အပစ်အခတ်ရပ်စဲရေးအတွက် သဘောတူညီချက်ရဖို့ အာရုံစိုက်ကြလိမ့်မယ်လို့ ဖော်ပြထားပါတယ်။

ဆော်ဒီနဲ့ အမေရိကန် ကြားဝင်ဖျန်ဖြေသူတွေနဲ့ ညှိနှိုင်းဆောင်ရွက်နေတဲ့ စေ့စပ်ညှိနှိုင်းရေးမှူးတွေဟာ ကယ်ဆယ်ရေးပစ္စည်းတွေကို အကာအကွယ်ပေးရေးအတွက် သီးခြားလုံခြုံရေး အစီအမံတွေကို ဆွေးနွေးကြမှာဖြစ်ကြောင်း အမေရိကန်အရာရှိတဦးက ပြောကြားခဲ့ပါတယ်။

အဲဒီအစီအမံတွေမှာ အမေရိကန်-ဆော်ဒီနဲ့ နိုင်ငံတကာက ပံ့ပိုးထားတဲ့ အပစ်အခတ်ရပ်စဲရေး စောင့်ကြည့်ရေး ယန္တရားတို့ ပါဝင်မှာဖြစ်ကြောင်း နိုင်ငံခြားရေးဌာနရဲ့ ထုတ်ပြန်ချက်မှာ ဖော်ပြထားပါတယ်။

ယာယီအပစ်အခတ်ရပ်စဲရေးကနေ ရန်လိုမှုများ ထာဝရရပ်စဲရေးအထိ လုပ်ဆောင်ရမယ့် ရှည်လျားတဲ့ လုပ်ငန်းစဉ် ဖြစ်မယ်လို့ အမေရိကန် တာဝန်ရှိသူက ပြောပါတယ်။

နောက်ပိုင်းမှာ အရပ်သားအဖွဲ့တွေလည်း ဆွေးနွေးပွဲတွေမှာ ပါဝင်ဖို့ မျှော်လင့်ထားကြောင်း အမေရိကန်အရာရှိက ပြောကြားခဲ့ပါတယ်။