စစ်ကိုင်းတိုင်း မုံရွာမြို့၊ အမှတ် ၂ ရဲစခန်း အောက်တိုဘာ ၂၁ ရက် ည ၉ နာရီက ပစ်ခတ်ခံရတာကြောင့် ရဲတယောက် သေဆုံးသွားတယ်လို့ ရဲစခန်းနားနေ ဒေသခံတွေက ပြောပါတယ်။

ရဲစခန်းအနီးက ဒေသခံတဦးက “ပစ်ခတ်သံကြားလို့ နာရီကြည့်လိုက်တော့ ည ၉ နာရီရှိနေပြီ။ ရဲစခန်းထဲကို ပစ်တာ။ လာပစ်တာက ကားနဲ့လား၊ ဆိုင်ကယ်နဲ့လားဆိုတာတော့ သေချာ မမြင်လိုက်တော့ မသိလိုက်ရဘူး။ ပစ်ခတ်ခံရလို့ ရဲတွေ ပြာယ်ခတ်သွားတယ်။ ဒီနေ့မနက်လည်း စခန်းအနီးတဝိုက် အရပ်ဝတ်တွေနဲ့ စုံစမ်းနေတယ်” လို့ ပြောပါတယ်။

ပစ်ခတ်ခံရတဲ့ ရဲစခန်းဟာ မုံရွာစက်မှုဇုန်ရပ်ကွက်အတွင်းမှာ ရှိတယ်လို့လည်း သိရပါတယ်။

မုံရွာမြို့နယ် PDF ခေါင်းဆောင် တဦးက “စကစ စခန်းတွေကိုတော့ အဖွဲ့တိုင်းက သွားပစ် နေကြတာတော့ နေတိုင်းပဲ။ မနေ့ညကလည်း အမှတ် ၂ ရဲစခန်းက ကင်းစောင့်နေတဲ့ရဲတွေကို သွားပစ်တယ်။ ရဲ တယောက် သေတယ်လို့တော့ ကနဦးသိထားရတယ်။ မဟာမိတ်အဖွဲ့ဘက်က တော့ အကျဆုံး၊ အထိခိုက်မရှိခဲ့ဘူး” လို့ ပြောပါတယ်။

အခု အမှတ် ၂ ရဲစခန်းကို သွားရောက် ပစ်ခတ်ခဲ့တဲ့အဖွဲ့ကတော့ Golden Eagle Force- Monywa အဖွဲ့လို့ မုံရွာတော်လှန်ရေးခေါင်းဆောင် PDF ခေါင်းဆောင်တွေဆီက သိရပါတယ်။

မကွေးတိုင်း၊ မကွေးမြို့ အမှတ် ၂ ရဲစခန်းမှာ မေ ၃၁ ရက်က စစ်ကောင်စီတပ်သားတယောက်နဲ့ ရဲတပ်ဖွဲ့ဝင်တွေ ခိုက်ရန်ဖြစ်ပွားခဲ့တယ်လို့ မကွေးနယ်မြေရဲစခန်းမှ ရဲတပ်သားတယောက်က ဒီဗွီဘီကို ပြောပါတယ်။

“မကွေးလေတပ်စခန်း ဌာနချုပ်က စစ်ကောင်စီတပ်သားကို မကွေး အမှတ် ၂ နယ်မြေ ရဲစခန်းမှာ ချုပ်နှောင်ထားတာဗျ။ အဲဒါကို လေတပ်စခန်းက အရာရှိတွေက လာထုတ်တဲ့အချိန်မှာ လက်ထိတ်ဖြုတ်ပေးလိုက်တော့ စခန်းမှူး ရဲအုပ်အောင်စိုးကို အဲဒီစစ်သားက လက်သီးနဲ့ ထထိုးတာ။”

ရဲစခန်းက အကြီးဆုံးဖြစ်တဲ့ စခန်းမှူးကို စစ်သားက ထိုးတဲ့အတွက် ရဲတပ်ဖွဲ့ဝင်တွေ မခံနိုင်ဘဲ ရုန်းရင်းဆန်ခတ်ဖြစ်ပြီး အဲဒီစစ်သားကို ဖမ်းဆီးကာ သူ့တို့အရာရှိနဲ့ ပြန်လွှဲပေးလိုက်တယ်လို့ ဆိုပါတယ်။

“စစ်စည်းကမ်း ထိန်းသိမ်းရေးအရတော့ အရေးယူမှာပေါ့။ စခန်းမှူးအပါအဝင် ကျနော်တို့ စခန်းက ရဲတွေကိုလည်း စုံစမ်းစစ်ဆေးရေး ခုံရုံးဖွဲ့ပြီး စစ်ဆေးနိုင်တယ်” လို့ ပြောပါတယ်။

ဆက်လက်ပြီး အဲဒီရဲတပ်သားက “အဲဒီကောင်က မိုက်ကို မိုက်ရိုင်းတာပါဗျာ။ အသက်အရွယ်အရ ကြည့်မယ်ဆိုရင်လည်း ကိုယ့်အဖေအရွယ်လောက်ရှိတာကို ကိုယ်ထိလက်ရောက် ကျူးလွန်တယ်။ စစ်တပ်ကတော့ အာဏာမသိမ်းခင်ကတည်းက ရဲတွေကို ဖိနှိပ်အနိုင်ကျင့်တယ်။ အခု အာဏာသိမ်းလိုက်တော့ ပိုပြီး ချို (ဂျို) ကြွသွားတာပေါ့။ ရဲထဲမှာ ရဲချုပ်၊ တိုင်းမှူး၊ ခရိုင်မှူး အဆင့်ရှိတဲ့သူတွေဆိုရင် အကုန်လုံးနီးပါး စစ်တပ်က အသွင်ပြောင်းလာတာဖြစ်ပြီး ရဲစစ်စစ်က ရှားတယ်။ ကျနော်တို့လည်း စစ်အာဏာရှင်စနစ်ကို မကြိုက်ပေမဲ့ မိသားစုအခက်အခဲကြောင့် ရုန်းမထွက်နိုင်သေးတာ” လို့ ပြောပါတယ်။

အဲဒီစစ်သား အချုပ်ထဲကို ဘယ်လိုရောက်လာတယ် ဆိုတာကိုတော့ သူ့တာဝန်ချိန် မဟုတ်တဲ့အတွက် မသိကြောင်း၊ ဆိုင်ကယ်တစီးကို ၂ ယောက်စီးတဲ့ ကိစ္စကနေ ပြဿနာ စဖြစ်တယ်လို့ကြားကြောင်း၊ ရဲတွေကိုလည်း ဆိုင်ကယ် ၂ ယောက် စီးရဲစီးကြည့်ဆိုပြီး ကြိမ်းဝါးသွားကြောင်း ဆိုပါတယ်။