စပိန်အစိုးရရှေ့နေတွေဟာ ဘာစီလိုနာအသင်းနဲ့ လာလီဂါကလပ်ရဲ့ ဥက္ကဋ္ဌဟောင်း နှစ်ယောက်ကို ဘောလုံးပွဲရလဒ်တွေမှာ လွှမ်းမိုးနိုင်အောင် ဒိုင်လူကြီးဆိုင်ရာ အကြီးတန်း ဒိုင်တာဝန်ရှိသူတဦး ပိုင်ဆိုင်တဲ့ ကုမ္ပဏီအပေါ် ငွေပေးချေခဲ့တာတွေနဲ့ ပတ်သက်ပြီး အမှုဖွင့်တိုင်ကြားထားတယ်လို့ မတ် ၁၀ ရက်မှာ အစိုးရရှေ့နေရုံးက အတည်ပြုပါတယ်။ 

တရားသူကြီးက ဒီအမှုကို လက်ခံမလားဆိုတာ မဆုံးဖြတ်ရသေးပါဘူး။ ၁၉၉၃ ခုနှစ်မှ ၂၀၁၈ ခုနှစ်အထိ စပိန်ဘောလုံးအဖွဲ့ချုပ်ရဲ့ ဒိုင်လူကြီးများကော်မတီ ဒုတိယဥက္ကဋ္ဌ ဟိုဆေး မာရီယာ အန်ဒရီကတ်ဇ် နီဂရီယာ ပိုင်ဆိုင်တဲ့ လုပ်ငန်းတွေအတွက် ၂၀၀၁ ခုနှစ်ကနေ ၂၀၀၈ ခုနှစ် ကြားကာလမှာ ဘာစီလိုနာအသင်းက အမေရိကန် ဒေါ်လာ ၇ ဒသမ ၈ သန်း ပေးချေခဲ့တယ်လို့ စွပ်စွဲထားတာပါ။ 

အစိုးရရှေ့နေတွေကတော့ ဒီလို လျှို့ဝှက်သဘောတူညီချက်တခုအောက်မှာ ငွေကြေးနဲ့ လဲလှယ်ခဲ့ခြင်းတွေမှာ နီဂရီယာဟာ ကလပ်အသင်း ကစားတဲ့ပွဲတွေမှာ ဒိုင်လူကြီးတွေရဲ့ ဆုံးဖြတ်ချက်တွေအပြင်နဲ့ ပြိုင်ပွဲရလဒ်တွေမှာရော ဘာစီလိုနာအသင်းကို မျက်နှာသာပေးခဲ့ ကြောင်း အခိုင်အမာ ပြောလာပါတယ်။ 

ဘာစီလိုနာအသင်းကို မှတ်ချက်ပေးဖို့ တောင်းဆိုရာမှာ ချက်ချင်း တုံ့ပြန်မှုမရှိပါဘူး။ ပြီးခဲ့တဲ့လက ထုတ်ပြန်ချက်ထဲမှာတော့ ဘာစီလိုနာအသင်းဟာ "ပရော်ဖက်ရှင်နယ် ပွဲကြီးကြပ်မှုနဲ့ ပက်သက်တဲ့ နည်းစနစ်ဆိုင်ရာ အစီရင်ခံစာတွေကို ပံ့ပိုးပေးခဲ့တဲ့ ပြင်ပအတိုင်ပင်ခံတဦးကို ပုံမှန်အတိုင်း ငွေပေးချေခဲ့တဲ့ သဘောသာဖြစ်ပြီး ဒါဟာ "ပရော်ဖက်ရှင်နယ် ဘောလုံးအသင်းတွေကြားမှာ ကျင့်သုံးလေ့ရှိတဲ့ အလေ့ အထတစ်ခုသာ" ဖြစ်တယ်လို့ ပြန်လည်တုံ့ပြန်ထားပြီး ဘာအမှားမှ ကျူးလွန်ထားခြင်းမရှိဘူးလို့ ဒီကိစ္စအပေါ်  ငြင်းဆိုထားပါတယ်။ 

ဒီစွပ်စွဲချက်ထဲမှာ ဘာစီလိုနာအသင်း အပါအဝင် အသင်းဥက္ကဋ္ဌဟောင်းတွေ ဖြစ်တဲ့ ရိုဆဲလ်၊ ဘာတိုမူ တို့နဲ့အတူ နီဂရီယာ နဲ့ အခြားဘာစီလိုနာအသင်း တာဝန်ရှိသူ ၂ ဦးလည်း ပါဝင်ပြီး အားကစားလောကဆိုင်ရာ အကျင့်ပျက်ခြစားမှု၊ တရားမမျှတတဲ့ စီမံခန့်ခွဲမှုအပြင် အရောင်းအဝယ် ဆိုင်ရာစာရွက်စာတမ်းတွေမှာ လိမ်လည်ထားမှု စတာတွေအတွက် တရားရုံးမှာ အမှုဖွင့်ထားတာ ဖြစ်ပါတယ်။ 

ဘာစီလိုနာအသင်းအပေါ် စုံစမ်းစစ်ဆေးမှုဟာ အခွန်ကိစ္စ စစ်ဆေးရာမှ အစပြုခဲ့တာဖြစ်ပြီး နီဂရီယာကတော့ ဒီလိုငွေပေးချေခဲ့တဲ့ ဘာစီလိုနာအသင်းရဲ့ ရည်ရွယ်ချက်ဟာ အသင်းပွဲစဉ်တွေမှာ ဒိုင်လူကြီးတွေအနေနဲ့ ဘက်လိုက်မှုမရှိဖို့အတွက်သာ ဖြစ်တယ်လို့ စပိန်အခွန်အေဂျင်စီ ကို ပြောဆိုခဲ့ကြောင်း အယ်လ်ပိုက်စ် သတင်းစာမှာ ဖော်ပြထားပါတယ်။

ပြင်သစ်ဘောလုံးအဖွဲ့ချုပ် (FFF) ဥက္ကဋ္ဌ နိုအယ်လွေဂရပ်ကို အကျင့်စာရိတ္တနဲ့ လိင်ပိုင်းဆိုင်ရာ နှောင့်ယှက်မှုတွေအတွက် စုံစမ်းစစ်ဆေးဖို့ အမှုဖွင့်ခဲ့တယ်လို့ အစိုးရရှေ့နေရုံးက ပြောပါတယ်။

လိင်ပိုင်းဆိုင်ရာ နှောင့်ယှက်မှု စွပ်စွဲချက်တွေကို အရင်က ငြင်းဆိုခဲ့တဲ့ လွေဂရပ်ဟာ ပြီးခဲ့တဲ့သီတင်းပတ်က သူ့တာဝန်ကနေ နုတ်ထွက်ခဲ့ပြီး ဖိလစ်ပ်ဂျယ်လိုက ယာယီဥက္ကဋ္ဌအဖြစ် တာဝန်ယူခဲ့တယ်လို့ FFF က ပြောပါတယ်။

ဒီကိစ္စနဲ့ပတ်သက်လို့ လွေဂရပ်ကို မှတ်ချက်ပေးဖို့ အင်္ဂါနေ့ထိ ဆက်သွယ်လို့ မရသေးပါဘူး။ လွေဂရပ်က အမျိုးသမီးဝန်ထမ်း အများအပြားကို နှောင့်ယှက်ခဲ့တယ်လို့ စွပ်စွဲထားတဲ့အကြောင်း အစီရင်ခံခဲ့တဲ့ So Foot မဂ္ဂဇင်းကို အသရေဖျက်မှုနဲ့ တရားစွဲမယ်လို့ FFF က ပြောခဲ့အပြီး အားကစားဝန်ကြီးဌာနက စစ်ဆေးဖို့ ပြည်ထောင်စုစစ်ဆေးရေးအဖွဲ့ကို စက်တင်ဘာလက ညွှန်ကြားခဲ့ပါတယ်။

အသက် ၈၁ နှစ်အရွယ် လွေဂရပ်ဟာ ၁၉၉၈ ကမ္ဘာ့ဖလားဆုရှင် ပြင်သစ်ဘောလုံးသမား ဇီနက်ဒီဇီဒန်းကို ဝေဖန်မှုအတွက် ဘောလုံးသမားတွေနဲ့ နိုင်ငံရေးသမားတွေရဲ့ ပြစ်တင်ရှုတ်ချတာကိုလည်း ခံနေရပါတယ်။

FFF အကြီးအကဲအဖြစ် သူ့သက်တမ်းကုန်ဆုံးပြီးတဲ့နောက် ၂ နှစ်အကြာ ၂၀၂၆ ခုနှစ်အထိ ပြင်သစ်နည်းပြ ဒီဒီယာဒက်စ်ချမ့်ရဲ့ စာချုပ်ကို သက်တမ်းတိုးခဲ့တဲ့အတွက်လည်း သူဟာ ဝေဖန်ခံခဲ့ရပါတယ်။