ပီရူးနိုင်ငံဟာ ဧပြီ ၂၆ ရက်မှာ နယ်စပ်ဒေသတွေမှာ အရေးပေါ်အခြေအနေကို ကြေညာခဲ့ပြီး ချီလီ ကနေ ဝင်ရောက်လာတဲ့ ဗင်နီဇွဲလား ရွှေ့ပြောင်းနေထိုင်သူ အများစုနဲ့ နိုင်ငံကို ဖြတ်သန်းသွားလာဖို့ လမ်းရှာနေသူတွေနဲ့ ရုန်းကန်နေရပါတယ်။  

ချီလီ၊ အီကွေဒေါ၊ ကိုလံဘီယာ၊ ဘရာဇီးလ်၊ ဘိုလီးဗီးယားတို့နဲ့ နယ်နိမိတ်ချင်း ထိစပ်နေတဲ့ နယ်စပ်ဒေသ ၇ ခုကို အရေးပေါ်အခြေအနေ ကြေညာထားကြောင်း အာဏာပိုင်တွေက ကြေညာခဲ့တာပါ။

ပီရူးသမ္မတ ဒီနာဘိုလွာတေးက“တွန်းမ်ဘက်စ်၊ ဖျူ့ရာ၊ ကာဟာမားရ်ကာ၊ အာမာဇိုးနာ့စ်၊ လော်ရေးတို၊ မာဒရယ်ဒီဒယို့စ်နဲ့ တပ်ခ်နာ မြို့တွေရဲ့ နယ်စပ်ဒေသတွေမှာ အရေးပေါ်အခြေအနေ ကြေညာဖို့ အမြင့်ဆုံးအမိန့်ကို အတည်ပြုပြီးသွားပြီ”လို့ ပြောပါတယ်။

သမ္မတ ဘိုလွာတေးဟာ တရားဥပဒေစိုးမိုးရေးကို ထိန်းချုပ်ဖို့ ကြိုးပမ်းမှုတစ်စိတ်တစ်ပိုင်းအဖြစ် အရေးပေါ်အခြေအနေ ကြေညာခဲ့တာဖြစ်ပါတယ်။

ဒီအစီအမံဟာ ပြည်တွင်းငြိမ်းချမ်းရေးနဲ့ ဖွဲ့စည်းပုံအခြေခံဥပဒေပါ အခွင့်အရေးတွေကို ထိန်းသိမ်းစောင့်ရှောက်ဖို့ နယ်နိမိတ်ထိန်းချုပ်ရေးနဲ့ ဆက်စပ်နေတဲ့ ရဲတပ်ဖွဲ့ရဲ့စစ်ဆင်ရေးတွေကို ဆောင်ရွက်နိုင်မယ်လို့လည်း ဆိုပါတယ်။

ဒါ့အပြင် ဒီအစီအမံဟာ ဒေသခံမဟုတ်တဲ့ အထောက်အထား မရှိသူတွေကို လုပ်ရိုးလုပ်စဉ် ဖော်ထုတ်နိုင်ပြီး လူဝင်မှုကြီးကြပ်ရေးထိန်းချုပ်မှုနဲ့ အလုပ်သမားစျေးကွက်ရဲ့ ယုံကြည်စိတ်ချရမှု ကို မြှင့်တင်ပေးနိုင်တဲ့အပြင် လူကုန်ကူးမှု၊ အလုပ်သမားခေါင်းပုံဖြတ်မှုစတဲ့ လူမှုရေးပြဿနာ တွေကို ရှောင်ရှားနိုင်စေမှာပါလို့လည်း သူက ဆိုပါတယ်။

ပီရူးနဲ့ ချီလီကြားရှိ နယ်နိမိတ်ချင်းထိစပ်နေပြီးတော့ ရွှေ့ပြောင်းမိသားစုတွေရှိနေတဲ့ တပ်ခ်နာမြို့ က လစ်လပ်နေရာတွေမျိုးမှာ ရဲတွေကို ဖြန့်ကြက်ချထားပါတယ်။

အဲဒီရွှေ့ပြောင်းမိသားစုတွေထဲက အများစုဖြစ်တဲ့ ဗင်နီဇွဲလားနိုင်ငံသားတွေဟာ သူတို့ နိုင်ငံကို ပြန်ကြဖို့ ပီရူးကနေ ခြေလျင်ခရီး ထွက်ခွာဖို့ ကြိုးပမ်းနေကြပါတယ်။ 

ပီရူးရှိ တရားဝင်အစီရင်ခံချက်တွေအရ  အီကွေဒေါမှတစ်ဆင့် ပီရူးကို ဝင်ရောက်လာတဲ့ အထောက်အထားမဲ့ ဗင်နီဇွဲလားနိုင်ငံသား ၃ သိန်းမှ ၄ သိန်းကြားရှိကြောင်း သိရပါတယ်။ 

နယူးဇီလန်နိုင်ငံမှာ ဆိုင်ကလုန်းမုန်တိုင်း ဂက်ဘရီယလ်ဟာ မြောက်ကျွန်းတခွင် ရေလွှမ်းမိုးမှု၊ မြေပြိုမှုတွေနဲ့ ကြီးမားတဲ့ ပင်လယ်ရေလျှံမှုတွေ ဖြစ်ပေါ်ခဲ့တာကြောင့် နယူးဇီလန်အစိုးရဟာ ဖေဖော်ဝါရီ ၁၄ ရက်က သမိုင်းတလျှောက် နိုင်ငံတော်အဆင့် အရေးပေါ်အခြေအနေအဖြစ် တတိယအကြိမ် ကြေညာခဲ့ပါတယ်။

အရေးပေါ် စီမံခန့်ခွဲရေးဝန်ကြီး ကီရန် မက်ကာနူလ်တီက ဒီဆိုင်ကလုန်းကြောင့် ပျက်စီးမှုတွေ ကျယ်ကျယ်ပြန့်ပြန့် ဖြစ်ပွားလာလို့ ထိခိုက်သူတွေကို ပံ့ပိုးပေးဖို့ နိုင်ငံတော်အဆင့် ကြေညာချက် လိုအပ်ကြောင်း အင်္ဂါနေ့က ပြောပါတယ်။

“ဒါဟာ မြောက်ကျွန်းရဲ့ နေရာအတော်များများမှာ သက်ရောက်မှုတွေ ကြီးကြီးမားမားရှိနေတဲ့ မကြုံစဘူး ရာသီဥတု အခြေအနေပါ” လို့ မက်ကာနူလ်တီက ဆိုပါတယ်။

ဆိုင်ကလုန်း ဂက်ဘရီယလ်ဟာ အော့ကလန်ရဲ့ အရှေ့မြောက်ဘက် ၁၀၀ ကီလိုမီတာအကွာရှိ ကျွန်းငယ်လေးတွေပေါ်မှာ တိုက်ခတ်ခဲ့ပေမဲ့ အခုတော့ အနောက်တောင်ဘက်ကို ရွေ့လျားနေတာပါ။

မိုးလေဝသအဖွဲ့ MetService က အော့ကလန်မှာ အဆိုးရွားဆုံး မိုးရွာပြီးသွားပြီဖြစ်ပေမဲ့ တောင်ဘက်မှာလည်း သက်ရောက်မှုတွေ ပိုရှိလာမယ်လို့ ဆိုပါတယ်။

ဆိုင်ကလုန်းမုန်တိုင်းကြောင့်  မြောက်ကျွန်းကိုဖြတ်ပြီး မိုးသည်းထန်စွာရွာသွန်းတာ၊ ရေကြီးတာနဲ့ လေပြင်းတိုက်ခတ်တာတွေကြောင့် ကမ်းခြေမှာ အခြေချနေထိုင်သူ အများအပြားကို ဘေးလွတ်ရာ ရွှေ့ပြောင်းပေးခဲ့ရပါတယ်။

မြောက်ကျွန်းတခွင်မှာ ကယ်ဆယ်ရေးစခန်းတွေ ထူထောင်ထားပြီး လူတော်တော်များများက လျှပ်စစ်မီး မရရှိကြဘဲ လမ်းတွေလည်း ပိတ်နေတာကြောင့် တချို့မြို့တွေမှာတော့ အဆက်အသွယ် လုံးဝပြတ်တောက်နေပါတယ်။