ရုရှအစိုးကိုဝေဖန်သူ အလက်ဇီနာဗယ်ညီရဲ့ နည်းဗျူဟာကျကျ ဆန္ဒမဲပေးတဲ့ မိုဘိုင်း အက်ပလီကေးရှင်းကို အမေရိကန်နိုင်ငံစုံလုပ်ငန်းစုကြီး Google နဲ့Apple တို့က သူတို့ရဲ့ အက်ပ်စတိုး၊ ပလေးစတိုးတွေကနေ ဖယ်ရှားလိုက်တယ်လို့ စက်တင်ဘာ ၁၇ ရက်က ပြောကြားလိုက်ပါတယ်။
ရုရှားအစိုးရက အမေရိကန်နည်းပညာကုမ္ပဏီတွေကို သူ့ရဲ့ပြည်တွင်းရေးတွေမှာ ၀င်ရောက်စွက်ဖက်တယ်လို့ စွပ်စွဲခဲ့ပြီးနောက်မှာ ခုလို မဲပေးလို့ရတဲ့ အက်ပလီကေးရှင်းကို ဖယ်ရှားလိုက်တာပါ။
ရုရှားပြည်သူတွေဟာ သုံးရက်တာကာလ ရွေးကောက်ပွဲကနေ ပါလီမန်အသစ်ကို ရွေးကောက်တင်မြှောက်ဖို့ မဲရုံတွေကို သွားနေကြပါတယ်။
ရုရှားအစိုးရကို ဝေဖန်သူတွေကို နှစ်ပေါင်းများစွာ အကြီးမားဆုံး ဖြိုခွင်းနှိမ်နင်းမှုတွေ လုပ်ခဲ့ပြီးနောက်မှာ လူကြိုက်များမှု ထိုးကျသွားပေမဲ့ အာဏာရ ယူနိုက်တက်ရုရှပါတီကတော့ အနိုင်ရဖို့ပဲ မျှော်လင့်ထားပါတယ်။
သမ္မတဗလာဒီမာပူတင်ရဲ့ အပြင်းထန်ဆုံး ပြည်တွင်းပြိုင်ဘက်ဖြစ်တဲ့ နာဗယ်ညီရဲ့ မဟာမိတ်တွေဟာ ယူနိုက်တက်ရုရှပါတီကို အလဲထိုးဖို့ နည်းဗျူဟာကျကျ မဲပေး မဲဆွယ် စည်းရုံးတဲ့ မိုဘိုင်းApp ကို အသုံးပြုဖို့ စီစဉ်ခဲ့ကြပါတယ်။
နှစ်ရက်အတွင်း သိပ်ကိုအရေးကြီးတဲ့ ရွေးကောက်ပွဲကို ဒူးမားပြည်နယ်မှာ စတင်ကျင်းပတော့မှာဖြစ်ပြီး ယူနိုက်တက်ရုရှပါတီက နောက်ထပ် ၅ နှစ် အာဏာကိုဆက်ယူထားဖို့ ကြိုးစားလိမ့်မယ်လို့ နာဗယ်ညီရဲ့ မဟာမိတ် လီယိုနစ် ဗိုလ်ကော့ဗ်က ပြောပါတယ်။
သူတို့သာ အာဏာဆက်ယူထားရင် တိုင်းပြည်ဟာ နောက်ထပ် ၅ နှစ် ဆင်းရဲဦးမယ်၊ နောက်ထပ် ၅ နှစ် နိုင်ငံရေးဖိနှိပ်မှု ခံရဦးမယ်၊ တိုင်းပြည်အတွက် နောက်ထပ် ၅ နှစ် ဆုံးရှုံးရဦးမယ်လို့လည်း ပြောပါတယ်။
“ဒါပေမဲ့ ငါတို့မှာ မျှော်လင့်ချက်ရှိပြီး ဒါကို ကာကွယ်ဖို့ ကိရိယာ တစ်ခုလည်းရှိတယ်။ အလက်ဇီနာဗယ်ညီရဲ့ အရေးအပါဆုံး နိုင်ငံရေးစီမံချက်ဖြစ်တဲ့ Smart voting စနစ်ပဲ” လို့ နာဗယ်ညီရဲ့ ပြောရေးဆိုခွင့်ရှိသူ ကီရာယာမစ်ရှ်က ပြောပါတယ်။
ရုရှားဟာ Apple နဲ့Google တို့ကို သူတို့ရဲ့စတိုးတွေကနေ App ကို ဖယ်ရှားပေးဖို့ အခုလမှာ တောင်းဆိုလိုက်ပြီး အဲဒါကို ဖယ်ပေးဖို့ ငြင်းဆန်ရင် လွှတ်တော်ရွေးကောက်ပွဲကို ၀င်ရောက်စွက်ဖက်မှုအဖြစ် သဘောထားရမယ်လို့ ပြောဆိုထားပါတယ်။ ဒါနဲ့ပတ်သက်လို့ Apple နဲ့Google တို့ကို မှတ်ချက်ပေးဖို့ တောင်းဆိုချက်တွေကို ချက်ချင်း မတုံ့ပြန်သေးပါဘူး။
ရုရှားနိုင်ငံမှာ အစိုးရကို ဝေဖန်လို့ ထောင်ချခံထားရတဲ့ အလက်ဇီနာဗယ်ညီရဲ့ ဝက်ဘ်ဆိုက်အင်တာနက်စာမျက်နှာ ဝင်ကြည့်လို့မရအောင် ဇူလိုင် ၂၆ ရက်မှာ ရုရှားအာဏာပိုင်တွေက ပိတ်ဆို့လိုက်ပါတယ်။
သူနဲ့ပတ်သက်နေတဲ့ တခြားသူ ၄၈ ယောက်နဲ့ အဖွဲ့အစည်းတွေရဲ့ ဝက်ဘ်ဆိုက်တွေကိုပါ လွှတ်တော်ရွေးကောက်ပွဲ အကြိုကာလမှာ ပိတ်ချလိုက်တာပါ။
နာဗယ်ညီနဲ့ ပတ်သက်နေတဲ့ အဖွဲ့အစည်းတွေကို အစွန်းရောက်ဝါဒီတွေလို့ ကြေညာဖို့ အစိုးရရှေ့နေရဲ့ တောင်းဆိုချက်ကို ရုရှားတရားရုံးက အရင်အပတ်က အတည်ပြုပေးခဲ့ပါတယ်။
ဒီလုပ်ရပ်ဟာ သူတို့ကို ဥပဒေနဲ့မညီသူတွေအဖြစ် သတ်မှတ်ရုံသာမက သူ့ရဲ့ မဟာမိတ်တွေကိုပါ စက်တင်ဘာမှာ ကျင်းပမယ့် အောက်လွှတ်တော် ရွေးကောက်ပွဲမှာ ဝင်ပြိုင်လို့ မရအောင် တားမြစ်လိုက်တာလည်း ဖြစ်ပါတယ်။
အမေရိကန်နဲ့ ဗြိတိန်တို့က ရုရှားတရားရုံးရဲ့ ဆုံးဖြတ်ချက်ကို ပြစ်တင်ဝေဖန်လိုက်ပြီး ရုရှား နိုင်ငံရေး အတိုက်အခံတွေအပေါ် အခြေအမြစ်မရှိတဲ့ ထိုးနှက်ချက်အဖြစ် သုံးသပ်လိုက်ပါတယ်။
နာဗယ်ညီရဲ့ အဖွဲ့က ဒီလုပ်ရပ်ကို ပြစ်တင်ရှုတ်ချပါတယ်။ လက်ရှိ အာဏာရ ယူနိုက်တက် ရုရှားပါတီက ကိုယ်စားလှယ်တွေ မဲမရအောင် ကြိုးစားဖို့ ဗျူဟာမြောက် ဘယ်လို မဲပေးမလဲ ဆိုတာ ပြည်သူတွေကို အကြံပေးနေတဲ့ ပါးပါးနပ်နပ် မဲပေးရေး အင်တာနက် စာမျက်နှာကို အာဏာပိုင်တွေက မကြာခင် ပစ်မှတ်ထားလာလိမ့်မယ်လို့ မျှော်လင့်ထားကြောင်းကိုလည်း သူတို့က လူမှုကွန်ရက်မီဒီယာပေါ်မှာ ပြောပါတယ်။
အင်တာနက် စာမျက်နှာတွေကို ပိတ်ဆို့ ထားတာကို ရှောင်ဖို့ ဘယ်လို ကြိုးစားသင့်တယ် ဆိုတာကို မကြာခင် ရှင်းပြမယ်လို့ နာဗယ်ညီရဲ့ မဟာမိတ် လီယိုနစ်ဒ်ဗိုလ်ကို့ဗ်က ပြောပါတယ်။
နာဗယ်ညီဟာ သမ္မတ ဗလာဒီမီယာပူတင်ရဲ့ အထင်ရှားဆုံး ပြည်တွင်းဝေဖန်သူ ဖြစ်ပြီး အာမခံကာလ ချိုးဖောက်မှုနဲ့ ထောင်ဒဏ် ၂ နှစ်ခွဲ ပြစ်ဒဏ်ကို ကျခံနေရပါတယ်။
သူ့ကို ထောင်ချလို့ ရုရှားနဲ့ အနောက်ဥရောပနိုင်ငံတွေကြား ဆက်ဆံရေးတင်းမာမှု ပိုတိုးလာပြီး သူ လွတ်မြောက်ရေးအတွက် အနောက်ဥရောပနိုင်ငံတွေက တောင်းဆို နေကြပါတယ်။
