လုပ်ခလစာတိုးမြှင့်ပေးဖို့ တောင်းဆိုခဲ့တဲ့ ရွှေပြည်သာမြို့နယ်ရှိ မြန်မာပေါင်ချိန်ဖိနပ်စက်ရုံမှ အလုပ်သမား ၃၀ နီးပါး အလုပ်ထုတ်ခံထားရတယ်လို့ အလုပ်သမားတွေက ပြောပါတယ်။

အဲဒီစက်ရုံက အလုပ်သမားတွေဟာ အောက်တိုဘာ ၂၅ ရက်ကစပြီး လုပ်ခလစာတိုးမြှင့်ပေးဖို့ စက်ရုံဧရိယာဝင်းအတွင်း ဆန္ဒပြတောင်းဆိုခဲ့ကြတာပါ။

စက်ရုံတာဝန်ရှိသူတွေက အလုပ်သမားတွေရဲ့ တောင်းဆိုမူကို အလေးမထားတဲ့အပြင် ဆန္ဒပြပွဲ ဦးဆောင်တယ်လို့ ယူဆထားတဲ့ အလုပ်သမားတွေကို အလုပ်ကထုတ်ပယ်ပြီး နောက်ထပ်တောင်းဆိုမှုတွေ မလုပ်နိုင်အောင် ဖိနှိပ်မှုတွေ လုပ်နေတယ်လို့ ဆိုပါတယ်။

အလုပ်ထုတ်ခံလိုက်ရတဲ့ လုပ်သားတဦးက "လက်ရှိအချိန်အထိ သိထားရသလောက်တော့ အထုတ်ခံရတဲ့ အလုပ်သမား ၂၇ ယောက်ရှိပြီ။ ညီမတို့ကတော့ ဥပဒေပါအတိုင်း ဆောင်ရွက်တာဖြစ်လို့ သူတို့အလုပ်ထုတ်တာကို အသိအမှတ်ပြုမထားဘူး" လို့ ပြောပါတယ်။

စက်ရုံက အလုပ်ထုတ်ခံရသူတွေဟာ အလုပ်ရှင်၊ အလုပ်သမား အလုပ်ခန့်ထားမှုဆိုင်ရာ သဘောတူစာချုပ် (EC) ကို ချိုးဖောက်တာကြောင့် နစ်နာကြေးမပေးဘဲ ထုတ်ရတာလို့ အကြောင်းပြထားပါတယ်။

EC စာချုပ်ပါ အလုပ်သုံးရက်ပျက်ကွက်လို့ဆိုပြီး အကြောင်းပြပေမယ့် ၁၉၅၁ အလုပ်သမားဥပဒေအရ  အလုပ်ပျက်ရာ မရောက်ဘဲ တောင်းဆိုမှုတွေ ပြုလုပ်နိုင်တယ်ဆိုတဲ့အချက်နဲ့ ဆန္ဒပြခဲ့တာလို့ အလုပ်သမားတွေကဆိုပါတယ်။

အခုလို စက်ရုံဘက်ကတဖက်သတ် အလုပ်က ထုတ်တာနဲ့ပတ်သက်လို့ ဥပဒေနဲ့အညီ ဆက်ပြီးရင်ဆိုင်သွားမယ်လို့ သူတို့က ပြောပါတယ်။

မြန်မာပေါင်ချိန်ဖိနပ်စက်ရုံဟာ Adidas အမှတ်တံဆိပ်ဖိနပ် အဓိကချုပ်နေတာလို့ သိရပါတယ်။

အဲဒီစက်ရုံအလုပ်သမားတွေက တရက်လုပ်ခ ၄၈၀၀ ကျပ်အစား ၈၀၀၀ ကျပ် တိုးမြှင့်ပေးဖို့ တောင်းဆိုထားကြတာပါ။ 

ထိုင်းနိုင်ငံအလယ်ပိုင်း ဆမွတ်ပရကန်ခရိုင် ဘန်ဘော်မြို့နယ်ရှိ ငါးသေတ္တာစက်ရုံမှာ မြန်မာ ရွှေ့ပြောင်းလုပ်သား အယောက် ၁၁၀ ရုတ်တရက် အလုပ်ဖြုတ်ခံခဲ့ရတယ်လို့ AAC အလုပ်သမား ကူညီစောင့်ရှောက်ရေး မဟာမိတ်အဖွဲ့က ပြောပါတယ်။

စက်ရုံမန်နေဂျာက သူတို့ကို အလုပ်မခန့်တော့ဘူးလို့ ပြီးခဲ့တဲ့ စက်တင်ဘာ ၁၉ ရက်က ပြောခဲ့ပြီး မနေ့မနက် ၈ နာရီလောက်မှာ အလုပ်ရုံကိုလာတော့ အထဲပေးမဝင်တော့ကြောင်း၊ အဲဒါကို မကျေနပ်လို့ အလုပ်သမားတွေဟာ NUG အစိုးရနဲ့ အလုပ်သမားအဖွဲ့တွေ လာရောက်ကူညီပေးဖို့ ဆိုင်းဘုတ်ထောင်ပြီး အလုပ်ရှင်အား ဆန္ဒပြခဲ့တယ်လို့ AAC အဖွဲ့ခေါင်းဆောင် ကိုရဲမင်းက ဒီဗွီဘီကို ပြောပါတယ်။

“သူတို့က ဆိုင်းဘုတ်တွေထောင်ပြီး ဆန္ဒပြသလို ကျနော်တို့အဖွဲ့ကိုလည်း လှမ်းပြီး ဆက်သွယ် အကူအညီ တောင်းခဲ့ပါတယ်ခင်ဗျ။ ကျနော်တို့လည်း NUG အစိုးရ အလုပ်သမားဝန်ကြီးဌာနကို အကြောင်းကြားတယ်။ ပြီးတော့ CDM လုပ်ထားတဲ့ အလုပ်သမား သံအရာရှိဟောင်း ဦးဝေလင်းမောင်နဲ့အတူ ကွင်းဆင်းပြီး ညှိနှိုင်းဖြေရှင်းပေးပါတယ်။ သူတို့ကို ကြိုတင်အကြောင်းမကြားဘဲ ရုတ်တရက် အလုပ်ဖြုတ်ပစ်တဲ့အတွက် နစ်နာကြေး တောင်းဆိုခဲ့တယ်။ နောက် အလုပ်သမားကတ် စာရွက်စာတမ်းကိစ္စ အပြီးလုပ်ပေးဖို့ရောပေါ့။ နစ်နာကြေး မပေးချင်တဲ့အခါကျတော့ စက်ရုံက သူတို့ကို အလုပ်မဖြုတ်တော့ဘူးလို့ ပြန်ပြောတယ်။ ဒါပေမဲ့ နောက်ပိုင်းမှာ လုပ်ငန်းခွင်ထဲ မနေချင်အောင် ပညာပြခံရမှာကို အလုပ်သမားတွေက ကြိုသိနေတော့ ဆက်မလုပ်ချင်တော့ဘူး။ အဲဒါကြောင့် ဆမွတ်ပရကန် ခရိုင်အလုပ်သမားကာကွယ်ရေးရုံးမှာ တိုင်ကြားစာ ပေးပို့ခဲ့ပါတယ်။”

အလုပ်သမားတွေဘက်ကနေ ကျန်ရှိလုပ်အားခတွေ အကုန်ရှင်းပေးဖို့၊ ကြိုတင်အကြောင်း မကြားဘဲ ရုတ်တရက် အလုပ်ဖြုတ်ခံရလို့ နစ်နာကြေး လစာ ၁ လစာပေးဖို့၊ အလုပ်ရှင်နဲ့ မှတ်ပုံတင်ထားတဲ့ အလုပ်သမားကတ်၊ နေထိုင်ခွင့်လက်မှတ်ကိစ္စ အပြီးအစီး ဆောင်ရွက်ပေးဖို့ တောင်းဆိုထားတယ်လို့ ဆိုပါတယ်။

လတ်တလော မြန်မာပြည်ကနေ အမ်အိုယူ အလုပ်သမားကတ်နဲ့ ဝင်ရောက်လာမယ့် အလုပ်သမားတွေ အများအပြားရှိနေပြီး သူတို့ကိုလက်ခံဖို့အတွက် အထောက်အထား မပြည့်စုံသေးသူတွေ၊ လုပ်လို့မပြီးပြတ်သေးသူတွေကို အလုပ်ဖြုတ်ပစ်တာတွေ မကြာခဏ ဖြစ်ပေါ်နေပါတယ်။

တဖက်ကလည်း အလုပ်ရှာဖွေပေးတဲ့ ပွဲစားတွေဟာ သူတို့လက်ထဲက အလုပ်သမားတွေကို ဟိုရွှေ့ဒီပြောင်း မကြာခဏလုပ်နေလို့ အလုပ်သမားတွေမှာ အခက်အခဲ ကြုံနေရတယ်လို့ ကိုရဲမင်းက ပြောသွားပါတယ်။