ရန်ကုန်တိုင်း၊ မြောက်ဥက္ကလာပမြို့နယ်၊ ဃ ရပ်ကွက်၊ အဝိုင်းကြီးနားက ခေမာသီလမ်းနဲ့ သီရိကန်သာလမ်းထောင့်ရှိ မြောက်ဥက္ကလာပ အထွေထွေအုပ်ချုပ်ရေးဦးစီးဌာနဘေးမှာ ဖေဖော်ဝါရီ ၃ ရက် ဒီမနက် ၁၁ နာရီလောက်က အနက်ရောင်ကြွပ်ကြွပ်အိတ်နဲ့ ထုပ်ထားတဲ့ ကီးပတ်ဖုန်းပါ အဝေးထိန်းဗုံးတလုံးကို တွေ့ရှိခဲ့လို့ စစ်ကောင်စီတပ်ဖွဲ့ဝင်တွေ ဖောက်ခွဲလိုက်ပါတယ်။
ထွေအုပ်ရုံးထောင့်က မြောင်းအနားမှာ တွေ့တာဖြစ်ပြီး လူတွေတော့ ထိခိုက်တာ မရှိဘူးလို့ ဒေသခံ တဦးကပြောပါတယ်။
“အဲ့နားကို မြောက်ဥက္ကလာ မာရှယ်လော အထုတ်ခံရကတည်းက သူတို့ လမ်းပိတ်ထားတာ။ ဘေးမှာ တည်းခိုခန်းလည်း ရှိတယ်။ အဲ့လမ်းကနေ ဝင်မရလို့ အဝိုင်းကြီးကနေ ပတ်ဝင်ရတယ်လေ။ ထွေအုပ်မှာက ရုံးထဲနဲ့ ခြံအပြင်မှာ စီစီတီဗွီတွေရှိတယ်။ စစ်ကားတစီးနဲ့ စစ်သားတွေ ကင်းချထားတာ။ အဲ့ပိတ်ထားတဲ့လမ်းမှာ တွေ့တယ်ဆိုတော့ ဘယ်သူလုပ်သလဲ အသိဆုံးနေမှာပါ။ နောက်ပြီး ဗုံးတွေ့တယ်ဆိုရင် အရေးကြီးတဲ့ပုံစံဖြစ်ရမယ်။ ဗုံးအကာတွေဘာတွေ သေချာဝတ်ပြီးမှ နေရာရွှေ့ရတာပဲ မြင်ဖူးတယ်။ ဒီမှာ လှမ်းတွေ့လိုက်တော့ အဲ့ကြွပ်ကြွပ်အိတ်ကို ဒီတိုင်းကလေးဆွဲပြီး ဝေပုလ္လ ၆ လမ်းထောင့် နေရာလွတ်မှာ ကားတာယာအဟောင်းတွေနဲ့ ပတ်ပြီး ဖောက်လိုက်တာပဲ။ ၁၁ နာရီ မိနစ် ၂၀ လောက် ပေါက်သွားတယ်။ ဗုံးအသံတော့ တော်တော်ကျယ်တယ်။”
၂၀၂၃ ခုနှစ် ဖေဖော်ဝါရီအတွင်း မြောက်ဥက္ကလာပမှာ ပထမဆုံးအကြိမ် ဗုံးပေါက်ကွဲတာလို့ မြို့ခံတွေဆီက သိရပြီး ပြီးခဲ့တဲ့ ၂၀၂၂ ခုနှစ် ဖေဖော်ဝါရီလကနေ ဒီဇင်ဘာလအထိ ၁၁ လအတွင်း မြို့တွင်း ဗုံးပေါက်ကွဲမှု ၆ ကြိမ်လောက် ဖြစ်ပွားခဲ့တယ်လို့ သိရပါတယ်။
ရန်ကုန်၊ လှိုင်သာယာမြို့နယ်၊ ဘီအိုစီအနီး၊ စနေမလမ်းထိပ်က စစ်ကောင်စီတပ်တွေပ်စွဲထားတဲ့ စစ်တပ်ပိုင်အထည်ချုပ်စက်ရုံကို လှိုင်သာယာမြို့ပြပြောက်ကျားတပ်ဖွဲ့(CGF)က သြဂုတ် ၂၃ ရက် ည ၁၀ နာရီမှာ အဝေးထိန်းဗုံးနဲ့ ဖေါက်ခွဲတိုက်ခိုက်ခဲ့လို့ စစ်ကောင်စီတပ်သား အနည်းဆုံး ၂ ယောက် ပြင်းထန်စွာ ထိခိုက်မှုရှိခဲ့တယ်လို့ CGF က ထုတ်ပြန်ပါတယ်။
ပေါက်ကွဲမှုအပြီးမှာ ကင်းတဲက စစ်သားတွေက ချက်ချင်း ပြန်လည်ပစ်ခတ်ခဲ့ပြီး စက်ရုံအထဲက စစ်သားတွေကလည်း ပြေးထွက်ကာ လိုက်လံပစ်ခတ်ခဲ့ပေမဲ့ CGF ဘက်က ထိခိုက်မှုမရှိဘဲ အောင်မြင်စွာ ဆုတ်ခွာလာနိုင်ခဲ့တယ်လို့ သိရပါတယ်။
အဆိုပါ ဖောက်ခွဲ တိုက်ခိုက်မှုဟာ သြဂုတ် ၂၃ ရက် မနက်ပိုင်းက ဖြစ်ပွားခဲ့တဲ့ သမိုင်းမြို့သစ် အကြမ်းဖက်ပစ်ခတ်မှုအတွက် လက်တုံ့ပြန်မှု တခု ဖြစ်တယ်လို့ CGF က ထုတ်ပြန်ထားပါတယ်။
ဒီတိုက်ခိုက်မှုနဲ့ပတ်သက်ပြီး CGF တာဝန်ရှိသူတစ်ဦးက "သေဆုံးမှုရှိမရှိတော့ ကျနော်တို့လည်း အတည်ပြုလို့မရပါဘူး၊ ပေါက်ကွဲမှု အပြီး နှစ်ယောက်လဲကျပြီး မထနိုင်တာတော့ တွေ့ရပါတယ်။''လို့ပါတယ်။
ပြီးခဲ့တဲ့ သြဂုတ် ၂၀ ရက်နေ့ညမှာလည်း CGF အဖွဲ့က လှိုင်သာယာအရှေ့ပိုင်းမြို့နယ်၊ ၅ ထိပ် ရဲစခန်းကို ည ၇ နာရီကျော်လောက်က အဝေးထိန်းဗုံးနဲ့ တိုက်ခိုက်ခဲ့တယ်လို့လည်း ဆိုပါတယ်။
လှိုင်သာယာမှာ လူငယ်တော်တော်များများကို စစ်ကောင်စီတပ်တွေက ဖမ်းဆီးမှုများလာတဲ့အတွက် အခုလို ပြောက်ကျားတပ်ဖွဲ့ ဖွဲ့စည်းပြီး တုံ့ပြန်ခဲ့တာဖြစ်ပြီး ဒီဖောက်ခွဲရေးက ၃ ကြိမ်မြောက် ဖြစ်တယ်လို့သိရပါတယ်။
ပြောက်ကျားတပ်တွေအနေနဲ့ စစ်ကောင်စီအကြမ်းဖက်အဖွဲ့ကို တိုက်ခိုက်ဖို့အတွက် အထောက်အပံ့တွေ အလှူငွေတွေလိုအပ်နေပေမဲ့ လူထုအထင်လွဲမှာ ကြောက်တာကြောင့် မကောက်ရဲဘူးလို့ လှိုင်သာယာမြို့ပြပြောက်ကျားတပ်ဖွဲ့(CGF)က ပြောပါတယ်။
