ချင်းပြည်နယ်၊ ဖလမ်းမြို့နယ်၊ ရိခေါ်ဒါရ်မြို့ရဲ့ တောင်ကုန်းပေါ်ရှိ အမှတ် ၂ စခန်းမှာ တပ်စွဲထားတဲ့ စစ်ကောင်စီတပ်ဖွဲ့ကို အောက်တိုဘာ ၂၆ ရက် မနက်ပိုင်းက ရိက္ခာထုတ်ပြီးအပြန်မှာ အဝေးထိန်းမိုင်းနဲ့ ဖောက်ခွဲတိုက်ခိုက်ခဲ့တယ်လို့ ဒေသကာကွယ်ရေးအဖွဲ့က ပြောပါတယ်။
အဲဒီစစ်ကောင်စီတပ်ဖွဲ့ဟာ မြို့ပေါ် ရိက္ခာထုတ်ပြီးအပြန်လမ်းမှာ အသင့်တပ်ဆင်ထားတဲ့ အဝေးထိန်းမိုင်းနဲ့တိုက်ခိုက်ခံရတာဖြစ်ပြီး စုစုပေါင်း စစ်သား ၆ ဦးသေဆုံးကာ ထိခိုက်ဒဏ်ရာရသူတွေလည်း ရှိတယ်လို့ သိရပါတယ်။
Mountain Eagle Defence Force တာဝန်ရှိသူ တစ်ဦးက "သူတို့ ရိက္ခာသယ်ပြီး အပြန်မှာ အသင့်ပြင်ထားတဲ့ အဝေးထိန်းမိုင်းနဲ့ တိုက်ခိုက်ခဲ့တာပါ။ အကြမ်းဖက်စစ်သား ငါးယောက်က အဲ့ဒီမှာ ပွဲချင်းပြီးသေတယ်။ ကျန်တဲ့ တယောက်ကတော့ ညနေပိုင်းမှာသေသွားတယ်လို့ သိရတယ်။ သူတို့လူသေပြီးနောက်ပိုင်း အကုန်လိုက်ပတ်ရမ်းနေတယ်" လို့ ပြောပါတယ်။
မိုင်းဖောက်ခွဲတိုက်ခိုက်ခံရပြီးနောက် စစ်ကောင်စီတပ်ဖွဲ့က ပြန်လည် ပစ်ခတ်တာတွေ ရှိခဲ့ပြီး သေဆုံးသွားတဲ့ တပ်ဖွဲ့ဝင်အလောင်းတွေကို အနီးဝန်းကျင်က နေအိမ်ထဲထည့်ကာ မီးရှို့သွားကြတယ်လို့ သိရပါတယ်။
ဒဏ်ရာရတဲ့ စစ်သားတချို့ကိုတော့ ရိဒ်အမှတ် ၁ စခန်းဆီသယ်ဆောင်သွားကြတယ်လို့သိရပြီး မြို့တွင်းရှိ ဆိုင်တွေကိုလည်း စစ်ကောင်စီတပ်ဖွဲ့က ပိတ်ခိုင်းခဲ့တယ်လို့ ဒေသခံက ပြောပါတယ်။
ရိခေါ်ဒါရ်မြို့ဟာ အိန္ဒယနဲ့ မြန်မာနိုင်ငံက ချင်းပြည်နယ်အစပ်မှာတည်ရှိပြီး ပြီးခဲ့တဲ့ မတ်လ ၅ ရက်ကလည်း ချင်းပြည်နယ်ကာကွယ်ရေးတပ်ပေါင်းစုတွေနဲ့ ရိခေါဒါရ်တပ်စခန်းက စစ်ကောင်စီတပ်တို့ တိုက်ပွဲဖြစ်ပွားကာ စစ်သား ၅ ဦးထက်မနည်း သေဆုံးခဲ့ပါတယ်။
ရန်ကုန်တိုင်း၊ မှော်ဘီမြို့မှာ စစ်ကောင်စီက လုံခြုံရေးတင်းကျပ်ထားတဲ့ကြားက အောက်တိုဘာ ၁၂ ရက် ည ၇ နာရီလောက်က ရဲဘော်စျေးမှတ်တိုင် (မှော်ဘီ) အနီး စစ်မှုထမ်းဟောင်းအိမ်ရာကို Gurdians UG မှော်ဘီရင်သွေးတပ် (HYA)နဲ့ မဟာမိတ်ပူးပေါင်းအဖွဲ့ "ဒေါင်းအလံလွှင့်" စစ်ဆင်ရေး mission က အဝေးထိန်းမိုင်းနဲ့ ဖောက်ခွဲခဲ့တယ်လို့ ထုတ်ပြန်ထားပါတယ်။
အဲဒီစစ်ဆင်ရေးဟာ စစ်ကောင်စီ နဲ့ ပတ်သက်ဆက်နွှယ်သူတွေ၊ ဒေါက်တိုင်တွေကို ရှင်းလင်းသွားမယ့်အကြောင်း ကြိုတင်သတိပေးတဲ့အနေနဲ့ အဝေးထိန်းမိုင်း နဲ့ သတိပေးတာလို့ ဆိုပါတယ်။
ဖောက်ခွဲမှုအတွင်း စစ်မှုထမ်းဟောင်းအိမ်ရာအတွင်းက စစ်ကောင်စီနဲ့ပတ်သက်ဆက်နွှယ်သူတွေ ထိမှန်နိုင်ပြီး ပေါက်ကွဲမှုဖြစ်ပွားပြီးနောက် စစ်ကောင်စီရဲ့ လုံခြုံရေးတွေ လာရောက်စစ်ဆေးခဲ့တယ်လို့Gurdians UG အဖွဲ့တာဝန်ခံက ပြောပါတယ်။
Gurdians UG အဖွဲ့အနေနဲ့ စစ်အာဏာရှင်ပြုတ်ကျတဲ့အထိ စစ်အုပ်ချုပ်ရေးယန္တရားတွေ၊ ဒေါက်တိုင်တွေ၊ စစ်ကောင်စီ နဲ့ ပတ်သက်နေသူမှန်သမျှကို မဟာမိတ်အဖွဲ့တွေနဲ့အတူ ပူးပေါင်းလုပ်ဆောင်သွားမယ်လို့ သိရပါတယ်။
ရန်ကုန်တိုင်းအတွင်း လုံခြုံရေးတင်းကျပ်ထားတဲ့အတွက် mission ပြုလုပ်တဲ့နေရာမှာ အချိန်ယူလုပ်ဆောင်ရသလို mission လုပ်ဆောင်ပြီးတိုင်း လုံခြုံရေးအခြေအနေအရ နေရာပြောင်းရွှေ့ရတဲ့အတွက် UG ရဲဘော်တွေရဲ့ နေထိုင်စားသောက်စရိတ်အတွက် အခက်အခဲတွေရှိတယ်လို့ Gurdians UG အဖွဲ့တာဝန်ခံဆီက သိရပါတယ်။
ပြီးခဲ့တဲ့ စက်တင်ဘာ ၁၆ ရက် ည ၈ နာရီလောက်က သင်္ကန်းကျွန်းမြို့နယ်တရားရုံးရှေ့မှာ သွေးမအေးကြောင်း၊ ပြည်သူတွေနဲ့အတူ ပြတ်သားစွာရပ်တည်ကြောင်း၊ လွတ်လပ်ခြင်းနဲ့ တရားမျှတမှုအတွက် အဝေးထိန်းမိုင်း နဲ့ ဖောက်ခွဲခဲ့သလို စစ်ကောင်စီတပ်ဖွဲ့တွေက တရားရုံးလုံခြုံရေးဂိတ်အနီးရှိနေပေမယ့် အန္တရာယ်မရှိ ပြန်လည်ဆုတ်ခွာနိုင်ခဲ့တယ်လို့ သိရပါတယ်။
